މާލެ ސިޓީ ކައުންސިލުގެ ބެލުމުގެ ދަށުގައި އޮތް ”އޮޅުހިޔާ“ މިއަދު ވަނީ ދަނޑުވެރިކަމާއި ދިރޭތަކެތީގެ މިނިސްޓްރީގެ ދަށަށް ރަސްމީކޮށް ބަދަލުކޮށްފިއެވެ.
މި ބަދަލާއެކު އެތަނުގެ ހުރިހާ ލިޔެކިޔުންތަކާއި ގާނޫނީ މުދާތައް ވަނީ މިނިސްޓްރީއާ ހަވާލުކޮށްފައެވެ.
މާލެ ސަރަހައްދުގެ މަގުތަކުގައި އުޅޭ ބުޅާތައް ބެލެހެއްޓުމަށް 5000 އަކަފޫޓުގެ ބިމެއްގައި ތަރައްގީކޮށްފައިވާ އޮޅުހިޔާއަކީ ރައީސް ޑރ. މުހައްމަދު މުއިއްޒު ހުޅުވައިދެއްވި ތަނެކެވެ. މި ފެސިލިޓީގައި ބުޅާތައް ކަރަންޓީނު ކުރާނެ ސަރަހައްދަކާއި، ކްލިނިކެއް، ލެބޯޓްރީއެއް އަދި ފާމަސީއެއް ހިމެނެއެވެ.
ދަނޑުވެރިކަމާއި ދިރޭތަކެތީގެ މިނިސްޓްރީގެ ސްޓޭޓް މިނިސްޓަރު އަލީ ސަފްވާން އިބްރާހިމް ބުނީ، ވީހާވެސް އަވަހަކަށް އެތަނުން ހިދުމަތް ދޭން ފެށުމަށް މަސައްކަތް ކުރަމުންދާ ކަމަށެވެ. މިއީ ރައީސްގެ ވައުދެއް ކަމަށްވާތީ، އެކަން އަވަސް ކުރުމަށް އިސްކަން ދޭނެ ކަމަށް އޭނާ ބުންޏެވެ.
މާލެ ސިޓީ ކައުންސިލާއި މިނިސްޓްރީއާ ދެމެދު ވެފައިވާ އެއްބަސްވުމުގައި ކައުންސިލުގެ ފަރާތުން ސޮއިކުރެއްވީ ސެކެރެޓަރީ ޖެނެރަލް އިބްރާހިމް ރަޝީދެވެ. އަދި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އަލީ ސަފްވާން އިބްރާހިމްއެވެ.
