މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލާފައިވާ ބޭރުފައިސާއާ ބެހޭ އާންމު ޤަވާއިދަށް އަމަލުކުރަން ފަށައިފިއެވެ.
މިއީ ބޭރު ފައިސާއާ ބެހޭ ޤާނޫނުގެ ދަށުން ހަދާފައިވާ ޤަވާއިދެކެވެ. އެގޮތުން މި ޤާނޫނުގެ ދަށުން ހަދަންޖެހޭ ގަވާއިދުތައް ހަދައި ހިންގާނީ، މޯލްޑިވްސް މަނިޓަރީ އޮތޯރިޓީން ކަމަށާއި،މި ގަވާއިދުތައް ޤާނޫނަށް ޢަމަލުކުރަން ފަށާ ތާރީޚުން ފެށިގެން 2 މަސްދުވަހުގެ ތެރޭގައި އޮތޯރިޓީން އެކުލަވާލައި، ދިވެހިސަރުކާރުގެ ގެޒެޓުގައި ޝާއިޢުކުރަންވާނެކަމަށް ޤާނޫނުން ލާޒިމުކޮށްފައިވެއެވެ.
ބޭރު ފައިސާއާ ބެހޭ ޤާނޫނަށް އަމަލުކުރަން ފަށާފައިވަނީ 1 ޖަނަވަރީ 2025 ގައެވެ.
ބޭރު ފައިސާއާ ބެހޭ އާންމު ޤަވާއިދަކީ ބޭރު ފައިސާއާ ބެހޭ ޤާނޫނުގައި ބަޔާންކޮށްފައިވާ ދިވެހިރާއްޖޭގައި ބޭރު ފައިސާއިން ކުރެވޭނެ މުއާމަލާތްތަކުގެ އިތުރުން، އިތުރު މުއާމަލާތުތައް ކަނޑައެޅުމާއި، ބޭރު ފައިސާއިން ލިބޭ އާމްދަނީ ބޭންކްތަކަށް ޖަމާކުރުމާއި، މާރުކުރަންވީ ގޮތުގެ އިޖުރާއަތުތައް ބަޔާންކުރާ ޤަވާއިދެވެ.
ރާއްޖޭގައި ބޭރު ފައިސާއިން ކުރެވޭނެ މުއާމަލާތްތަކުގެ ތެރެއިން ބައެއް ކަންކަމަށް ބަލާއިރު، ޓޫރިޒަމް ދާއިރާގެ މުދާ ވިއްކައި އަދި ޚިދުމަތްދޭ ފަރާތްތައް ނޫން އެހެނިހެން ފަރާތްތަކަށް އިންޝުއަރެންސް ކުންފުނިތަކުން ވިއްކާ އިންޝުއަރެންސް ޕޮލިސީތަކާ ގުޅިގެން އެ ކުންފުނިތަކާއި، ކުންފުނިތަކުގެ ކަސްޓަމަރުންނާ ދެމެދު ބޭރުފައިސާއިން އަދާކުރުމަށް އެއްބަސްވެގެން ކުރެވޭ މުއާމަލާތްތައް ހިމެނެއެވެ.
މީގެ އިތުރުން، ބޭރުފައިސާއާ ބެހޭ ޤާނޫނުގެ ދަށުން ހިމެނޭ ބޭރުފައިސާއިން އާމްދަނީ ލިބޭ ވިޔަފާރިއަކުން ބޭނުންވާނަމަ، އެ ވިޔަފާރިއަކާއި، ވިޔަފާރިއެއްގެ ހިއްސާދާރުންނާ ދެމެދު ކުރެވޭ މުއާމަލާތްތަކުގެ ތެރޭގައި ލޯނާއި، އެނޫންވެސް ޕޭމަންޓުތަކާ ގުޅޭ މުއާމަލާތްތަކާއި، ކަމާބެހޭ ޤާނޫނުތަކާ އެއްގޮތަށް ކުރެވޭ ބޭރުފައިސާގެ މުއާމަލާތްތައްވެސް ހިމެނެއެވެ.
މީގެ އިތުރުން، ޤާނޫނާ ޚިލާފުވާ ފަރާތްތަކުގެ މައްސަލަ ބެލުމުގައި އަމަލުކުރާނެ އުސޫލުތަކާއި، މި ކަންކަމުގެ އިޖުރާއަތުވެސް ޤަވާއިދުގައި ވަނީ ބަޔާންކޮށްފައެވެ.
ބޭރު ފައިސާއާ ބެހޭ އާންމު ގަވާއިދަށް އާންމުންނަށް ހިޔާލު ހުށަހެޅުމުގެ ފުރުސަތުވެސް އެމްއެމްއޭއިން ހުޅުވާލިއެވެ.
މިދިޔަ އޮކްޓޯބަރު މަހު އަމަލު ކުރަން ފެށި އައު ގަވައިދަށް އެމްއެމްއޭ އިން އާންމުންގެ ހިޔާލަށް ހުޅުވާލީ ގާނޫނީ އޮނިގަނޑަށް ލިބުނު ހުށަހެޅުންތަކަށް ބަލައި ޑޮލަރު މާރު ކުރުމަށް ދެ އިހުތިޔާރެއް ދިނުމަށް ފަހުއެވެ. އެއީ ރިސޯޓުތަކަށް އަންނަ ކޮންމެ ފަތުރުވެރިއެއްގެ ބޮލަކަށް 500 ޑޮލަރު މާރުކުރުން ނުވަތަ ކޮންމެ މީލާދީ މަހެއްގައި ލިބޭ ބޭރު ފައިސާގެ އާމްދަނީގެ ނުވަތަ ގްރޮސް ސޭލްސް ޕްރޮސީޑްސްގެ 20 މާރުކުރުމެވެ.
އެމްއެމްއޭއިން ވަނީ، ބޭރު ފައިސާއިން އަދާ ކުރަންޖެހިފައިވާ ޓެކްސްގެ އިތުރުން ސަރުކާރަށް ބޭރު ފައިސާއިން އަދާކުރަންޖެހޭ މުއާމަލާތްތައް އިސްތިސްނާ ކުރުމަށް ނިންމާފައެވެ.
މި ހާލަތުގައި އިސްތިސްނާވާ ފަރާތްތަކެއް ގާނޫނުގައި ކަނޑައަޅާފައިވެއެވެ. އެއީ ގިނަވެގެން 24 ގަޑިއިރު ހޭދަކޮށްފައި ނުވާ ޓޫރިސްޓުންނާއި، އުމުރުން ދެ އަހަރު ފުރިހަމަނުވާ ކުޑަކުދިންނާއި، ހިލޭ ނުވަތަ ކޮމްޕްލިމެންޓްރީކޮށް ތިބޭ މީހުންނެވެ.
ބޭރު ފައިސާގެ ގާނޫނެއް އެކުލަވާލައި އަމަލު ކުރަން ފަށާފައިވާއިރު އަހަރެއްގެ ތެރޭގައި ކާޑު ލިމިޓު ބޮޑުކޮށް، ޑޮލަރުގެ ކަޅު ބާޒާރު އެއްކޮށް ނައްތާލެވޭނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ވިދާޅުވެފައެވެ.
ރައީސް ވިދާޅުވީ ގާނޫނު ތަންފީޒު ކުރުމަށް ފެށުމާއި އެކު ޑޮލަރުގެ ކަޅު ބާޒާރު ވެސް ނައްތާލެވޭނެ ކަމަށެވެ. އަދި ގާނޫނަށް އަހަރެއް ވެގެންދާއިރު، ސަރުކާރުގެ އަމާޒަށް ވަސިލުވޭނެކަމަށް ވިދާޅުވި އެވެ.
ރައީސް ވިދާޅުވީ ހުރިހާ ވިޔަފާރިއަކުން ވެސް ގާނޫނާއި އެއްގޮތަށް ޑޮލަރު މާރު ކުރަން ފެށުމުން އެތައް މައްސަލައަކަށް ހައްލު ލިބިގެންދާނެކަމަށެވެ.
ފަތުރުވެރިކަމުގެ ކަމާއި ގުޅުން ހުރި ފަރާތްތަކާއި ބައްދަލުކޮށް ހުށަހެޅި ހިޔާލާއި މަޝްވަރާތަކަށް އެގޮތަށް ގާނޫނު ފާސްކޮށްފައި ވަނީ ޑޮލަރު މާރުކުރުމުން އިސްތިސްނާވާ އުމުރު 10 އަހަރުން 12 އަހަރަށް މަތިކުރުމަށް ފަހު އެވެ. އަދި ރިސޯޓަކުގައި މާލީ ދަތިކަމެއް ހުރިނަމަ، އާމްދަނީގެ 20 ޕަސެންޓަށް ވުރެ މަދުން ދައްކަން އެދުމުގެ އިޚުތިޔާރު ދީފައި ވެއެވެ. ނަމަވެސް އެ ލުއި ދެވޭނީ އެކަން އެމްއެމްއޭއަށް ސާބިތުކޮށްދިނުމުން ކަމަށް ގާނޫނު ބުނެއެވެ.
