ޕްރޮފެޝަނަލް ޑޭޓިންގއޭ ބުނުމުން އެއީ ކޯޗެއްކަން އެނގޭބާއެވެ. މީހަކާއި ލޯބީގެ ގޮތުން ގުޅިގެން އުޅޭއިރު ޒިންމާދާރު ގޮތެއްގައި ގުޅުން ބިނާކުރުމަކީ ޕްރޮފެޝަނަލް ޑޭޓިންއެވެ.
ޑޭޓިންގގެ ދުނިޔެއަކީ ގިނަ ބަޔަކު އޮޅުންބޮޅުންވެފައިވާ ދާއިރާއެކެވެ. ލޯބީގެ ގުޅުމެއް ބިނާކުރުމަށް ބޭނުންވާ ގިނަ މީހުން ތަފާތު ގޮތްތައް ތަޖުރިބާކުރަނީ ޕްލޭންއެއް ނެތި، އުންމީދު ބަހައްޓައިގެންނެވެ. އެއާއި ހިލާފަށް، ޕްރޮފެޝަނަލް ޑޭޓިންގއަކީ ގުޅުން ބިނާކުރުމުގައި ޒިންމާދާރު އަދި ހަރުދަނާ ގޮތެއްގައި ކުރިއަށްދިއުމެވެ. މި ލިޔުމުގައި އަޅުގަނޑުމެން އަލިއަޅުވާލާނީ ރީތި ގުޅުމެއް ބިނާކުރުމަށްޓަކައި ޕްރޮފެޝަނަލްކޮށް ޑޭޓް ކުރާނެ ގޮތްތަކުގެ މައްޗަށެވެ. މިއީ ހަމަގައިމުވެސް ރާއްޖެ ފަަދަ އާބާދީގެ ނިސްބަތުން ވަރި ގިނަ ގައުމެއްގައި ވިސްނާލުން މުހިންމު ނުކުތާތަކެވެ.
ޕްލޭބޯއިކަމާއި ޕްރޮފެޝަނަލް ޑޭޓިންގގެ ތަފާތު
ޕްލޭބޯއިއެއްގެ ގޮތުގައި ޑޭޓިންގގައި އުޅޭ މީހުން ޢާންމުކޮށް ބަލަނީ ވަގުތީ ބޭނުންތަކެއް ފުއްދުމަށެވެ. އެމީހުން ސަމާލުކަން ދެނީ ކުރު މުއްދަތުގެ މުނިފޫހިފިލުވުމަށާއި، ނަފްސާނީ ބޭނުންތައް ފުއްދުމަށެވެ. އަނެއްކޮޅުން، ޕްރޮފެޝަނަލް ޑޭޓިންގއަކީ ސާފު އަމާޒަކާއިއެކު ގުޅުން ކުރިއަށްގެންދިއުމެވެ. ޕްރޮފެޝަނަލް ޑޭޓިންގގައި އުޅޭއިރު، ތިމާ ބޭނުންވަނީ ކޮން ޒާތެއްގެ ގުޅުމެއްކަން ސާފުކުރުން މުހިންމެވެ. މީހަކާއި ރައްޓެހިވުމަށްފަހު އެ ގުޅުން ކައިވެންޏަކާއި ހަމައަށް ދާނެކަމާއި ދޭތެރޭ ވިސްނަން ޖެހެއެވެ.
ތިމާއާއި ނުގުޅޭ މީހަކާއެކު ވަގުތު ހޭދަކުރަންވީ ކީއްކުރަންތޯއެވެ؟ އެކަމުން ދެފަރާތުގެ ވަގުތު ބޭކާރުވާނެއެވެ. ދެފަރާތްވެސް އަގުހުރި ވަގުތު ހޭދަކުރަންވާނީ ތިމާއާއި ގުޅޭ މީހަކާއިއެއްކޮށް ދިރިއުޅުމެއް ބިނާކުރެވޭނެ ކަމުގެ އިޝާރާތް ޔަގީން ނަމައެވެ.
ޕްލޭބޯއިތަކުން އާންމުކޮށް ކުރާކަމަކީ އެއްފަހަރާ ބައިވަރު މީހުންނާއި ޑޭޓުކުރުމެވެ. ނަމަވެސް ޕްރޮފެޝަނަލް ޑޭޓިންގގައި ދެފަރާތުން އެއްބަސްވެއްޖެނަމަ މެނުވީ އެހެން މީހުންނާއި ވާހަކަދެއްކުން މަނާނުކުރާނެއެވެ. ކޮންމެހެން ގިނަ މީހުންނާއި ރައްޓެހިނުވިޔަސް، ގިނަ މީހުންނާއި ވާހަކަދެއްކިދާނެއެވެ. ތިމާއާއި އެންމެ ގުޅޭ މީހާއާއި ދިމާވާނީ ގިނަ މީހުންނާއި ވާހަކަދައްކައިގެންނެވެ. ތަފާތު މީހުންނާ ބައްދަލުކުރުމުން ތިމާއަށް ބޭނުންވާ ކަންކަން ދެނެގަނެވޭނެއެވެ.
ގުުޅުމުގެ މަޤްޞަދުތައް ސާފުކުރުމުން، އަނެކާއަށްވެސް ހާމަކަން ބޮޑުގޮތެއްގައި މުއާމަލާތްކުރެވޭނެއެވެ. ޝައްކެއްނެތް ގޮތުގައި ވަގުތު ފާއިތުވާއިރު މަޤްޞަދުތައް ބަދަލުވެދާނެއެވެ. އެހެންނަމަވެސް ގުޅުމުގެ ހަރުދަނާކަމަށްޓަކައި އަންނަ ބަދަލުތައް ސާފުބަހުން ބުނުމާއި އަނެއްފަރާތުގެ ޝުޢޫރުތަކަށް އިޙްތިރާމްކުރުން މުހިންމެވެ. އަދި ތިމާ ގަބޫލުކުރާ ވިސްނުންތަކާއި އުސޫލުތައް ލޯބިވެރިޔާއާއި އެއްގޮތްތޯ ބަލަން ވީހާވެސް ގިނައިން ސުވާލުކުރުން މުހިންމެވެ.
ހުޅުވިފައިވާ މުއާމަލާތެއް ގެންގުޅުން
ޕްރޮފެޝަނަލް ޑޭޓިންގގައި ފުރިހަމަ ތެދުވެރިކަމާއި ހާމަކަން ބޮޑު މުއާމަލާތެއް ބޭނުންކުރެއެވެ. މީގެ ސަބަބުން އޮޅުވާލުމުގެ ހިތާމައިން ދެފަރާތް ދުރުވެގެންދެއެވެ.
މުއާމަލާތްތައް އިޙްތިރާމުކުރުމުގެ މައްޗަށް ބިނާވެފައި އޮންނާނެއެވެ. ކޮންމެ ގުޅުމެއްވެސް ބިނާވެފައި އޮންނަންވާނީ ދެފަރާތުގެ އިޙްތިރާމުގެ މައްޗަށެވެ. އެހެންކަމުން ދެފަރާތުން ބޭނުންވާ ކަންކަމަށް އިހުތިރާމް ކުރުމަކީ ކާމިޔާބު ގުޅުމަކަށް މުހިންމު ކަމެކެވެ. އެއާއެކު، އަނެކާ ދައްކާ ވާހަކަ އަޑުއަހައިގެން އޭނާ ބުނާ އެއްޗެއް ދަސްވޭތޯ ބަލާށެވެ.
މިކަމުގައި ނޭދެވޭ ޝުޢޫރުތައް ދެނެގަނެ ހާމަކުރުމުގެ ޤާބިލުކަން ހުރުންވެސް މުހިންމެވެ. އިތުރު ކަމެއްގެ ގޮތުގައި، ތިމާގެ ކުރީގެ ގުޅުންތަކުގައި ދިމާވެފައިވާ މައްސަލަތަކާއި، މާލީ ގޮތުން ހުރި ކަންބޮޑުވުންތައް ހާމަކުރުން މުހިންމެވެ. ހާމަކުރަން ދަތިވާ ކަންކަން ވަންހަނާކޮށްގެން ގުޅުމެއް ބިނާކުރުމަކީ ގުޅުމުގެ ބިންގާ ދަމަކުން ކޮނުންފަދަ ކަމެކެވެ. ކޮންމެ ގުޅުމެއްގައި މައްސަލަތައް ޖެހޭނެއެވެ. އެހާލަތުގައި ދެފަރާތަށް ބަލައިގަނެވޭ ޙައްލުތައް ހޯދުމަށް މަސައްކަތްކުރާށެވެ.
ޝަޚްޞިއްޔަތުގެ ތަރައްޤީއަށް އިސްކަންދިނުން
ޕްރޮފެޝަނަލް ޑޭޓިންގގައި އުޅޭ މީހުން ވަގުތު ހޭދަކުރަނީ އަމިއްލަ ނަފްސުގެ ތަރައްޤީއަށާއި ޝަޚްޞިއްޔަތު ފުރިހަމަކުރުމަށެވެ. މީގެ ސަބަބުން ދެމީހުންގެ ގުޅުން ތާޒާކަންމަތީ ދެމެހެއްޓެއެވެ. ޕްރޮފެޝަނަލްކޮށް ޑޭޓިންގ ކުރުމުގެ ފުރަތަމަ ފިޔަވަޅަކީ ތިމާއަކީ ކާކުކަން ދެނެގަތުމެވެ. އަމިއްލަ ނަފްސަށް އިހުތިރާމްކުރުމުގެ ތެރޭގައި ތިމާ ގަބޫލުކުރާ އަސާސީ އުސޫލުތަކާއި ލަނޑުދަނޑިތައް ފާހަގަކުރުން ހިމެނެއެވެ. ލޯބީގެ ގުޅުމުގައި ތިމާއަށް ބޭނުންވާ ކަންކަން ވަޒަންކުރުންވެސް މުހިންމެވެ. އަމިއްލަ ނަފްސުގެ ބަލިފައި އަދި ވަރުގަދަ ކަންތައްތައް ބައިވެރިޔާއަށް މަޑުމަޑުން ހާމަކުރުންވެސް މުހިންމެވެ. ތިމާއަކީ ދުޅަހެޔޮ ލައިފްސްޓައިލްއެއް ގެންގުޅޭ މީހެއްނަމަ، ދުރުރާސްތާގައި ކާމިޔާބު ގުޅުމެއް ދެމެހެއްޓުން އެކަށީގެންވެއެވެ.
ރައްކާތެރި މާހައުލެއްގައި ބައްދަލުކުރުން
ކޮންމެ ގުޅުމެއްގެ ކުރީކޮޅު އެހާ ފަސޭހައިން އަނެކާއަށް ފުރިހަމައަށް އިތުބާރުކޮށްގެން ނުވާނެއެވެ. އެހެންކަމުން، ޒާތީ މައުލޫމާތު ހިއްސާކުރުމުގައި ވިސްނުންތެރިވާށެވެ. އަދި
އާއިލާއާއި ރައްޓެހިންނަށް ނޭނގި ލޯބިވެރިޔާއާއި ބައްދަލުކުރުމަކީ ރަނގަޅު ހިޔާލެއް ނޫންކަން ދަންނާށެވެ. ވަކިން ހާއްސަކޮށް، އޮންލައިން އެޕްތައް ބޭނުންކުރާއިރު، އަމިއްލަ މަޢުލޫމާތުތައް ގިނައިން ހާމަކުރުމުގެ ކުރިން އަނެއްފަރާތް ރަނގަޅަށް ދެނެގަތުމަކީ ބުއްދިވެރިކަމެކެވެ.
ރެޑް ފްލޭގްތަކަށް ސަމާލުވުން
މީހަކާއި ރައްޓެހިވެގެން އުޅޭއިރު އޭނާއަކީ ކޮންކަހަލަ މީހެއްކަން ދެނެގަންނަން ހަގީގަތުގައި ވަރަށް އުނދަގޫވާނެއެވެ. ނަމަވެސް ކޮންމެ ގުޅުމެއްގެ ވަކި ހިސާބަކުން ރަތް ސިގްނަލްތައް އަތުވާނެއެވެ. އެ ރަތް ސިގްނަލްތަކުގެ ތެރޭގައި ތިރީގައިމިވާ ކަންކަން ހިމެނޭނަމަ، ތި ގުޅުން އެހާހިސާބުން ނިންމާލުމަކީ އެންމެ ރަނގަޅު ގޮތެވެ.
– ތިމާގެ ބަހަށް އިޙްތިރާމްނުކުރުން
– ހައްދުތަކަށް އިޙްތިރާމްނުކުރުން
– ތިމާގެ އަމިއްލަ ޝަޚްޞިއްޔަތު ބަދަލުކުރަން މަސައްކަތްކުރުން
– އަބާދުވެސް ކޮންޓްރޯލްކުރަން ބޭނުންވުން
ހަމަހަމަ ގުޅުމެއް ބިނާކުރުން
ގަދަރުވެރި ގުޅުމަކަށް ބޭނުންވަނީ ބެލެންސްއެވެ. ހަމަހަމަކަމާއެކު ކުރިއަށްދިއުމަށްޓަކައި:
– ހަދިޔާތަކާއި ވަގުތު ހޭދަކުރުމުގައި ހަމަހަމަކަން ގެންގުޅޭށެވެ.
– ދެފަރާތުގެ އަމިއްލަ ވަގުތަށް އިޙްތިރާމްކުރާށެވެ.
– މާލީ ކަންކަމުގައި ހަމަހަމަ އުސޫލުތަކެއް ގެންގުޅޭށެެވެ.
