ޒަވާޖީ ޙަޔާތުގައި ކުރިމަތިވާ ކަންކަމާއި ގުޅިގެން އަހުރެންގެ ގާތަށް ލަފާ ހޯދަން އަންނަ ބައެއް މީހުންނަށް އެންމެ ބޮޑު ކަމަކަށްވަނީ އެމީހަކު ކުރަން ބޭނުން ނުވާ ގޮތަކަށް ކަންކަން ކުރަންޖެހުމެވެ. އެޙާލަތުގައި އެމީހުން ދެކެނީ އެމީހުން ދެރަވެ ނިކަމެތިވަނީ ކަމަށެވެ.
ނަމަވެސް މިއީ ރަނގަޅު ވިސްނުމެއް ނޫނެވެ. ކަންކަމުގައި ދޫދީ ތިމާ ކުރަން ބޭނުން ނުވާ ގޮތަށް ކަމެއް ކުރަން ޖެހުނަސް އެއީ ދެރަވެ ނިކަމެތިވުމެއް ނޫނެވެ. ދޫދިނުމުން ނުވަތަ ތިމާ ކުރަން ބޭނުން ނުވާ ގޮތަކަށް ކުރަންޖެހޭ ކަންކަން ކުރުމުން ފަހުން ކުރާނެ ފައިދާ މާބޮޑުވާނެއެވެ. ލިބޭ އުފާވެރިކަންވެސް މާބޮޑުވާނެއެވެ.
އެއިގެ ބަދަލުގައި ގޮތްދޫނުކުރާނަމަ ލލިބޭ ގެއްލުން މާބޮޑުވާނެއެވެ. ލިބޭ ދެރަވެސް މާބޮޑުވާނެއެވެ.
ތަޖުރިބާކާރު ޢިލްމުވެރިއެއްގެ މިބަސްކޮޅާއިއެކު މިގެނެސްދެނީ ކޮންމެ މުސްލިމަކުވެސް ޤަބޫލުކުރަންޖެހޭނެ ޙަޤީޤަތެއްގެ ވާހަކަކޮޅެކެވެ.
ބައެއް މީހުންނަށް ހީކުރެވެނީ އެމީހަކު ހިތް ނުއެދޭ ގޮތަކަށް ނުވަތަ ކުރަން ބޭނުންނުވާ ގޮތަކަށް ކަމެއް ކުރަން ޖެހިއްޖެނަމަ އެއީ އެމީހަކު ބަލިވީކަމަށެވެ. ނިކަމެތިވީ ކަމަށެވެ. ނަމަވެސް އެއީ އެކަން އޮތް ގޮތެއް ނޫނެވެ.
އެކަން އެނގިގެންދާ އެއް ޙާދިޘާއަކީ ރަސޫލާ ﷺ ޙައްޖުވެވަޑައިއިގަތުމަށް މައްކާއަށް ވަޑައިގެންފައި ޙައްޖުވެވަޑައި ނުގަންނަވައި މަދީނާއަށް ވަޑައިގެންނެވިކަމެވެ. އެކަމާއި ޚުދު ޞަޙާބީންވެސް ހިތްޕުޅު ހަމަނުޖެހި ކަންބޮޑުވުން ފައުޅު ކުރެއްވެވިއެވެ.
އެހެނަސް އެކަންވެގެންދިއައީ މުސްލިމުންނަށް ލިބުނު އެންމެ ބޮޑު އެއް ކާމިޔާބީއަށެވެ. އެހެންކަމަށްވާއިރު ކަންކަން ދިމާވާ ގޮތަކުން އަހަރެމެން ކުރަން އުޅޭ ކަމެއް އެހެން ގޮތަކަށް ކުރަން ޖެހުމުން އެއީ ނާކާމިޔާބީއެއް ކަމަށް ދެކެން ހެޔޮވާނީ ކިހިނަކުން ހެއްޔެވެ؟
ސޫރަތުލް ފަތުޙި
سورة الفتح އަކީ ކީރިތި ޤުރުޢާނުގެ 48 ވަނަ ސޫރަތެވެ. މިސޫރަތުގައި 29 އާޔަތްވާއިރު، މިސޫރަތް ބާވާލެއްވުނުނީ މަދީނާގައެވެ.
ސޫރަތުލް ފަތްޙުގެ ނަން އެސޫރަތުގެ އެންމެ ފުރަތަމަ އާޔަތުގައިވެސް އައިއްސައިވެއެވެ. “ ފާޅުވެ ބަޔާންވެގެންވާ ފަތަޙައަކުން، ހަމަކަށަވަރުން، ތިމަންރަސްކަލާނގެ ކަލޭގެފާނަށް ފަތަޙަދެއްވީމެވެ.“
ސޫރަތުލް ފަތްޙު ބާވައިލެއްވުން
ޙުދައިބިއްޔާގެ އެއްބަސްވުމަކީ ކީރިތި ރަސޫލާ صلّللّه عليه وسلّمގެ ޙަޔާތްޕުޅުގައި ކުރެވުނު އެންމެ މުހިއްމު އެއްބަސްވުމެވެ. މައްކާ ފަތަހަ ކުރެއްވުމުގެ ގާތްގަނޑަކަށް އެއް އަހަރުކުރިން، މުސްލިމުން، މަދީނާއިން މައްކާއަށް ގޮސް އުޅުނީ ހަމައެކަނި ދީނީ އަޅުކަންތައް އަދާކުރުމަށެވެ. ނަމަވެސް މުޝްރިކުން ހީކުރީ އެމީހުން އެއަންނީ މައްކާއަށް އަރައިގަންނަންކަމަށެވެ. އެހެންކަމުން މުސްލިމުންނާއި ހަނގުރާމަކުރަން ބޮޑު ފައުޖެއް ތައްޔާރުކުރިއެވެ. އަދި އެވަގުތު މުސްލިމުންނާއި މުޝްރިކުންނާއި ދެމެދު އެއްބަސްވުމެއް ޤާއިމުކުރެވިގެންދިޔައެވެ. އަދި ހުދައިބިއްޔާގެ އެއްބަސްވުން އެކުލަވާލެވިގެންދިޔައެވެ.
އަދި ބައެއް ސަޙާބީބޭކަލުން އެކަމާމެދު ނުރުހުންފާޅުކުރެއްވުމުން ކީރިތި ރަސޫލާ صلّللّه عليه وسلّم އެބޭކަލުންނާއި ވާހަކަފުޅު ދައްކަވާ ހިތްހަމަޖައްސައިދެއްވިއެވެ. އަދި ޢުމަރު ރަޟިޔަﷲ ޢަންހުވެސް ކީރިތި ރަސޫލާ صلّللّه عليه وسلّم އަރިހުގައި އެއެއްބަސްވުމާއި ގުޅިގެން ކަންބޮޑުވުންފާޅުކުރެއްވުމުން އެކަލޭގެފާނާއިވެސް ވާހަކަފުޅުދައްކަވާ ހިތްހަމަޖައްސުވައިދެއްވިއެވެ. މިއެއްބަސްވުން ޤާއިމްކުރެވިގެންދިޔަތާ މާގިނައިރެއްނުވެ ސޫރަތުލް ފަތްޙު ބާވާލެއްވެވިއެވެ. އަދި ހުދައިބިއްޔާގެ އެއްބަސްވުމަކީ މުސްލިމުންނަށް ލިބުނު ވަރަށް ފުރިހަމަ ނަޞްރެއްގެ ގޮތުގައި މާތްﷲ ވަހީ ކުރައްވާފައިވެއެވެ.
–އިސްލާމީ ތިލަފަތުގެ ދަރުސަކުން
