މަރާމާތުކޮށް އޮޕަރޭޝަނަށް ގެނައި ޖަނަރޭޓަރާއެކު، އައްޑޫ ސިޓީން ކަރަންޓު ކެނޑޭ މައްސަލަ ވަގުތީގޮތުން މިހާރު ހައްލުވެފައިވާކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ނަޖާހު ވިދާޅުވެއްޖެއެވެ. އައްޑޫ ސިޓީގެ ކަރަންޓު މައްސަލަ ހައްލުކުރުމަށް އިތުރު ޖަނަރޭޓަރު ގެންދިއުމުގެ މަސައްކަތް މިހާރުވެސް ދަނީ ކުރަމުންނެވެ.
އައްޑޫ ސިޓީން ކަރަންޓު ކެނޑޭ މައްސަލަ ކުރިމަތިވާން ފެށީ، އެ ސިޓީގައި ބޭނުންކުރަމުންދިޔަ 18 ޖަނަރޭޓަރުގެ ތެރެއިން، ގިނަ އިންޖީނުތަކެއް އޯވަހޯލް ނުކޮށް ދިގުލައިގެންދިއުމުން އެޖަނަރޭޓަރުތައް ހަލާކުވުމުގެ ސަބަބުންނެވެ.
ލޯޑު ބޮޑުވެ އައްޑޫ ސިޓީގައި މިހާރު ކަރަންޓު ދެނީ، އެކި ގަޑިތަކަށް އެކި ހިސާބުތަކުން ކަރަންޓު ކަނޑާ އުސޫލުންނެވެ. އައްޑޫ ސިޓީގެ ރައްޔިތުންގެ ބޮޑު ކަންބޮޑުވުމެއް މިކަމާ ގުޅިގެން އޮތްއިރު، ކަރަންޓު ކަނޑަންޖެހޭ މައްސަލަ ހައްލުކުރުމަށް ފެނަކައިން ގިނަ މަސައްކަތްތަކެއް ދަނީ ކުރަމުންނެވެ.
މިމައްސަލަ ހައްލުކުރުމަށް ކުރަމުންދާ މަސައްކަތްތަކާ ގުޅޭގޮތުން ފެނަކަ ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ނަޖާހު ވިދާޅުވީ، މައްސަލަ ހައްލުކުރުމަށް ކުންފުނިން މެދުނުކެނޑި މަސައްކަތް ކުރަމުންދާކަމަށެވެ.
އެގޮތުން އޯވަހޯލްކޮށް މަރާމާތުކުރަމުންދާ 1.6 މެގަވޮޓްގެ 2 ޖަނަރޭޓަރުސެޓްގެތެރެއިން، އެއް ޖަނަރޭޓަރުގެ މަސައްކަތް ނިންމާ މިހާރު ޚިދުމަތަށް ގެނެސްފައިވާކަމަށް ނަޖާހު ވިދާޅުވިއެވެ. މި ޖަނަރޭޓަރާއެކު، ސިލްސިލާކޮށް އެކި ހިސާބުތަކުން ކަރަންޓު ކަނޑަން ޖެހޭ މައްސަލައަށް ވަގުތީ ހައްލެއް ގެނެވިފައިވާކަމަށް ވިދާޅުވިއެވެ. ދެން ހިމެނޭ އަނެއް ޖަނަރޭޓަރުގެ މަސައްކަތްވެސް ނިމުމަކާ ގާތްވެފައިވާކަމަށް ފެނަކައިން މަޢުލޫމާތު ދެއްވައެވެ.
އައްޑޫ ސިޓީގައި ޕީކް ވަގުތުގައި ކަރަންޓުގެ ލޯޑު، 11.6 މެގަވޮޓަށް އަރައެވެ.
ނަޖާހު ވިދާޅުވީ އިތުރު 1 މެގަވޮޓްގެ ޖަނަރޭޓަރެއް، މާލެއިން އައްޑޫ ސިޓީއަށް ގެނައުމުގެ މަގުމަތީގައި މިހާރު ވާކަމަށެވެ. އަދި އެ ޖަނަރޭޓަރު ބަހައްޓާ ސެޓަޕްހެދުމާއި، އެކަމަށް ބޭނުންވާ ޓެކްނިކަލް ތައްޔާރީތައްވެސް މިހާރު ވަމުންދާކަމަށް ވިދާޅުވިއެވެ.
މީގެއިތުރުން އިންޑިއާއިން 1.8 މެގަވޮޓްގެ ޖަނަރޭޓަރެއްވެސް ރާއްޖެ ގެނައުމުގެ މަގުމަތީގައި ވާކަމަށް ނަޖާހު ވިދާޅުވިއެވެ. ފެނަކަ ކޯޕަރޭޝަންގެ މެނޭޖިންގ ޑިރެކްޓަރ ވިދާޅުވީ މިޖަނަރޭޓަރު މާލެއަށް އަންނާނީ ބުދަ ދުވަހުކަމަށެވެ. އަދި އެޖަނަރޭޓަރު ރާއްޖެ އައުމާއެކު، އައްޑޫ ސިޓީއަށް ފޮނުވާނެކަމަށް ވިދާޅުވިއެވެ.
މިވަގުތު ކުރަމުންދާ މަސައްކަތްތަކަކީ އައްޑޫ ސިޓީން ކަރަންޓު ކެނޑޭ މައްސަލައަށް ވަގުތީ ހައްލެއް ގެނައުމުގެ މަސައްކަތެވެ. މިއާއެކު އެކަމަށް ދާއިމީ ހައްލެއް ގެނައުމުގެ މަސައްކަތްވެސް ސަރުކާރުން ދަނީ ކުރިއަށްގެންދަމުންނެވެ. އައްޑޫ ސިޓީގައި އަޅަން ފަށާ ހުއްޓިފައިވާ، 32 މެގަވޮޓްގެ އިންޖީނުގޭގެ މަސައްކަތް އަލުން ފެށުމުގެ މަސައްކަތްވެސްދަނީ ކުރަމުންނެވެ. މިއާއެކު އައްޑޫ ސިޓީގެ ގުޅިފައިވާ ރަށްތަކުގެ ކަރަންޓުގެ މައްސަލައަށް ދާއިމީ ހައްލެއް ލިބޭނެއެވެ.
