ސުވަރުގޭގައިވާ ހޫރައްލީނުންނާ ގުޅޭ ގޮތުން އައްޑޫ މީދޫ ދާއިރާގެ ކުރީގެ މެމްބަރު ރޮޒައިނާ އާދަމް ދެއްކެވި ވާހަކަތަކާ ގުޅިގެން ފާޑުކިޔުންތައް ބޮޑުވުމުން ރޮޒައިނާ މާފަށް އެދިވަޑައިގެންފި އެވެ.
”ރާއްޖެ ޓީވީ“ އިން މިދިޔަ އާދިއްތަ ދުވަހު ގެނެސްދިން ޕްރޮގްރާމެއްގައި ރޮޒައިނާ ވިދާޅުވީ ރާއްޖޭގެ ސުޕްރީމް ކޯޓުގެ ފަނޑިޔާރުން ސަސްޕެންޑްކުރުން ފަދަ ބޮޑެތި މައްސަލަަތައް ހުރިއިރު ފަތުވާ ދޭ ކޮމިޓީން ދައްކަނީ ހޫރައްލީނުންނާ ގުޅޭ ފަދަ ބޭކާރު ވާހަކަތައް ކަމަށެވެ.
ރޮޒައިނާގެ މި ވާހަކަތަކާ ގުޅިގެން އޭނާއަށް ވަރަށް ބޮޑެތި ފާޑުކިއުންތައް ވަނީ އަމާޒުވެފައެވެ. ބައެއް މީހުން ސިފަކުރީ މިއީ ދީނަށް ފުރައްސާރަކުރުމުގެ ގޮތުގައެވެ.
ފާޑުކިއުންތައް މާބޮޑުވުމުން ރޮޒައިނާ މިއަދު ފޭސްބުކުގައި ވިދާޅުވީ ހޫރައްލީނުންނޭ ކިޔައި ދެއްކެވި ވާހަކައިގައި ”ބޭކާރު“ގެ ލަފުޒު ގެނެވިފައިވާތީ އެކަމުގެ މާނަ ބައެއް ބޭފުޅުންނަށް އޮޅިފައިވާ ކަމަށެވެ.
”ބޭކާރޭ އަޅުގަނޑު ބުނީ މި ވަގުތާ ހާލަތުގައި ދައްކަން އެޔަށް ވުރެން މުހިންމު މި ހާލަތާ ގުޅޭ ދީނީ ވާހަކަ ބަޔާންކޮށްދޭން. އެ ވާހަކައަކީ ބޭކާރު ވާހަކައެއް ކަމަށް ބުނާކަށް ނޫން. ދީނުގެ ހުރިހާ ކަންކަމަކީ ވެސް މުހިންމު ކަންކަން. ނަމަވެސް ވަގުތާއި ހާލަތު ބަލާ އެ ވަގުތަކު ހިނގާ ކަމަކާ ގުޅޭ ގޮތުން ދީނުގައި އޮތް ގޮތް ސާފުކޮށް ދިނުމަށް އިލްމުވެރިން އިސްކަމެއް ދޭން ޖެހޭ ކަމަށް އަޅުގަނޑަށް ގަބޫލުކުރެވޭ.“ ރޮޒައިނާ ވިދާޅުވި އެވެ.
އެހެންކަމުން ކަންކަން އޮޅޭ ގޮތަށް ވާހަކަތައް ދެކެވިފައިވާތީއާއި އަދި ނެގުނު މިސާލުވެސް ރަނގަޅުކަމަށް ނުފެންނާތީ ރޮޒައިނާ ވަނީ މާފަށް އެދިވަޑައިގެންފަ އެވެ.
