ޖުޑިޝަލް ސާވިސް ކޮމިޝަން (ޖޭއެސްސީ) އިން ފަނޑިޔާރެއްގެ ސުލޫކީ މައްސަލަ ބަލާއިރު، ގާނޫނުގައި ބުނާ ގޮތުގެ މަތީން ކޮމިޓީން ކުރާ ސުވާލުތަކަށް ޖަވާބުދޭން ޖެހޭނީ، ވަކީލު ނޫންކަމަށް ބުނެ ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރަށް އެ ކޮމިޝަނުން ރައްދު ދީފިއެވެ.
އަޒްމިރަލްދާގެ ތުހުމަތުތައް ދޮގުކޮށް، ޖޭއެސްސީ އާންމު ކުރި ބަޔާނުގައި ބުނީ ކޮމިޝަނުގެ ތަހުގީގުގައި ފަނޑިޔާރެއްގެ ގޮތުން ލިބެން ޖެހޭކަމަށް ކަނޑައަޅާފައިވާ ހުރިހާ ހައްގެއް އަޒްމިރަލްދާއަށް ފޯރުކޮށްދިން ކަމަށެވެ. އެގޮތުން ގާނޫނުއަސާސީގެ 53 ވަނަ މާއްދާއާއި، ޖުޑިޝަލް ސާވިސް ކޮމިޝަނުގެ ގާނޫނުގެ 25 ވަނަ މާއްދާގެ (ށ) ގައިވާ ގޮތުން ވަކީލެއްގެ އެހީތެރިކަން ހޯދުމަށް އަޒްމިރަލްދާ ހުށަހެޅުމުން އެ ފުރުސަތު ދިންކަމަށް ޖޭއެސްސީން ބުންޏެވެ.
ކޮމިޝަނުގެ ބަޔާނުގައި ބުނެފައި ވަނީ ގާނޫނީ ވަކީލު އިބްރާހިމް އައްޔަނު ކުރުމަށް، އެދުމުން 6 މާޗުގައި އަޒްމިރަލްދާއަށް އެ ހުއްދަ ދިންކަމަށެވެ. އެއަށް ފަހު މި މަހުގެ 11 ގައި އޮތް ތަހުގީގަށް އަޒްމިރަލްދާ ހާޒިރުވީ، ޝަމީލްއާއި އެކު ނަމަވެސް ވަކީލަށް ފުރުސަތު ނުދޭކަމަށް ބުނެ އޭނާ މީޑިއާތަކަށް ދީފައި ވަނީ ދޮގު މައުލޫމާތުކަމަށް ޖޭއެސްސީގެ ބަޔާނުގައި ވެއެވެ.
ޖޭއެސްސީން ބުނީ ފަނޑިޔާރުންނައި ގުޅޭ ސުލޫކީ މައްސަލަތައް ބެލުމަށް ގާނޫނުން މަތިކޮށްފައި ވަނީ އެ ކޮމިޝަނަށް ކަމަށެވެ. އަދި ފަނޑިޔާރުންގެ ސުލޫކީ މައްސަލަތައް ބެލުމުގައި އަމަލު ކުރަން ޖެހޭ ގޮތާއި، ގާނޫނީ ވަކީލުގެ ފުރުސަތު ދިނުމާއި ފަނޑިޔާރަކު އައްޔަނު ކުރާ ގާނޫނީ ވަކީލަށް، ޒިންމާއާއި މަސްއޫލިއްޔަތު އަދާކުރެވޭނެ ގޮތް ގާނޫނުގައި ބަޔާންކޮށްފައިވާކަމަށް ބުންޏެވެ.
ޖުޑިޝަލް ސާވިސް ކޮމިޝަނުގެ ގާނޫނުގެ މާއްދާތައް ފާހަގަކޮށް ކޮމިޝަނުން ބުނީ، 25 ވަނަ މާއްދާގެ (ނ) ގައި ބަޔާން ކުރާ ގޮތުގެ ތަހުގީގު ކޮމިޓީން ބަލަމުންދާ މައްސަލައާއި ގުޅޭގޮތުން ތަހުގީގު ކޮމިޓީން ކުރާ ސުވާލުތަކަށް ފަނޑިޔާރު ޖަވާބުދޭން ވާނެކަމަށެވެ. އަދި އެ މާއްދާގެ (ބ) ގެ މަތީން ތަހުގީގު ކޮމިޓީން ކުރާ ސުވާލުތަކަށް ޖަވާބުދިނުމުގައި ވަކީލާ މަޝްވަރކުރެވިދާނެކަމަށް ވެއެވެ.
އެހެންކަމުން އެ ގާނޫނުގައި ބުނާ ގޮތުން، ގާނޫނީ ވަކީލުގެ ޒިންމާ ސާފުކަމަށް ބަޔާނުގައި ވެއެވެ. އަދި ކޮމިޓީން ކުރާ ސުވާލުތަކަށް ޖަވާބުދޭން ޖެހޭނީ، ވަކީލު ނޫންކަމަށާއި އެކަން ކުރަން ޖެހޭނީ ފަނޑިޔާރުކަމަށް ޖޭއެސްސީން ބުންޏެވެ.
ކޮމިޝަނުން ބުނީ ވަކީލު ކުރަން ޖެހޭ ހަމައެކަނި ކަމަކީ، ލަފާ ދިނުންކަމަށެވެ. އަދި އެ ފުރުސަތު ޝަމީލަށް ވެސް ދިންކަމަށާއި، އަޒްމިރަލްދާއާއި ވަކިން މަޝްވަރާކުރުމުގެ ފުރުސަތުވެސް ތަކުރާރުކޮށް ދިންކަމަށް ބުންޏެވެ.
ޖޭއެސްސީ ބުނީ މިއީ އެއްވެސް މީހަކު އިސްތިސްނާ ނުވާ ގޮތަށް، އެންމެނަށް ވެސް ހިނގާ އުސޫލުކަމަށެވެ.
