ބިދޭސީންގެ އަތުން ނާޖާއިޒް މަންފާ ހޯދި ކަމުގެ ތުހުޕމަތުގައި ހައްޔަރުކޮށްފައިވާ މޯލްޑިވްސް އިމިގްރޭޝަންގެ ކުރީގެ ކޮންޓްރޯލާ ޖެނެރަލް މުހައްމަދު ޝަމްއާން ވަހީދުގެ އާއިލާގެ މީހެއްގެ ފޯނު ހިފަހައްޓައިފިއެވެ.
އިތުބާރުހުރި މަސްދަރަކުން ވަނީ މިކަން ކަށަވަރުވެފައެވެ. އެނގިފައިވާގޮތުގައި އެ މައްސަލައާ ގުޅިގެން ފުލުހުން އަންނަނީ ބައެއް މީހުންނާ ސުވާލުކުރަމުންނެވެ.
އެ މައްސަލައާ ގުޅިގެން ފުލުހުން ވަނީ ދެ މީހެއްގެ ފޯނު ހިފަހައްޓާފައެވެ. ފުލުހުންގެ މީޑިއާ އޮފިޝަލް ވިދާޅުވީ އެ މައްސަލައިގެ ތަހުގީގަށް ކޯޓް އަމުރެއްގެ ދަށުން ދެ މީހެއްގެ ފޯނު ހިފަހައްޓާފައިވާ ކަމަށެވެ. ނަމަވެސް އެއީ ކޮން ބައެއް ކަމެއް ފުލުހުން ހާމައެއްނުކުރެއެވެ.
އެ މައްސަލައާ ގުޅިގެން ހައްޔަރުކުރި ޝަމްއާންގެ ބަންދަށް 15 ދުވަސް އަދި ދެ އޮފިސަރުންގެ ބަންދަށް 10 ދުވަސް ކްރިމިނަލް ކޯޓުން ވަނީ ޖަހާފައެވެ.
ފުލުހުން ބުނީ 530,000 ދިވެހި ރުފިޔާއާއެކު އިމިގްރޭޝަނުން ޑިޓެންޝަނަށް ގެންދެވުމު ބިދޭސީއަކު ދަންވަރުގެ ވަގުތެއްގައި ޑިޓެންބަނުން ދޫކޮށްލައިފައިވާކަން ތަހުގީގަށް އެނގިފައިވާ ކަށެވެ.
އަދި ޑިޓެންޝަނަށް ގެންދިޔަ މީހާ އުޅުނު ގެ ބަލައި ފާސްކުރުމުގައި އަމަލީ ގޮތުން ބައިވެރިވި މުވައްޒަފަކު ޑިޓެންޝަނުން ދޫކޮށްލި ބިދޭސީ މީހާ މަގުމަތިން ހުއްޓުވައި, އޭނާގެ އަތުން ފައިސާތައް ހިފައިގެން ޝަމްއާން ދިރިއުޅޭ އިމާރާތަށް ވަދެފައިވާކަން ވެސް ތަހުގީގަށް ކަށަވަރުކުރެވިފައިވާކަން ފުލުހުން ހާމަކުރިއެވެ.
މި މައްސަލައިގައި ކޯޓު އަމުރެއްގެ ދަށުން ޝައްމާން ދިރިއުޅޭ ގެ ބަލައި ފާސްކޮށް ގިނަ އަދަދެއްގެ ފައިސާއާއެކު އިލެކްޓްރޮނިކް ސާމާނުތަކެއް ވަނީ ފުލުހުންގެ ބެލުމުގެ ދަށަށް ގެންގޮސްފައެެވެ.