ޒަމާނީ މޫސުމާބެހޭ އިންފްރާސްޓްރަކްޗަރ އަށް ކުރާ އިންވެސްޓްމަންޓްތަކުގެ ތެރެއިން މޫސުމީ އިންޒާރުދޭ ނިޒާމުތައް ޤާއިމުކުރުމުގެ މަސައްކަތް ކުރަމުންދާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދުނިޔޭގެ މޫސުމާބެހޭ ދުވަހާ ގުޅިގެން ސޯޝަލް މީޑިޔާގައި ޙިއްސާކުރެއްވި މެސެޖެއްގަ ރައީސް ވިދާޅުވީ މޫސުމާ ބެހޭ ޒަމާނީ ވަސީލަތްތަކަށް ކުރާ އިންވެސްޓުމަންޓުތަކުގެ ތެރެއިން ކޮންމެ ރައްޔިތަކަށްވެސް މޫސުމީ އިންޒާރުތައް ވަގުތުން ލިބޭނެ ގޮތް ހެދުމަށް ސަރުކާރުން މަސައްކަތް ކުރަމުން އަންނަ ކަމަށެވެ. ރާއްޖެ އިން ދެމި އޮންނާނީ އަވަސް އިންޒާރުގެ ފަރަގު ކުޑަކުރުމަށް ކަމަށް ރައީސް ވިދާޅުވި އެވެ.
ސަރުކާރުގެ ސިޔާސަތުތައް ބައްޓަންކޮށްފައިވަނީ މޫސުމީ ބަދަލުތަކާ ބެހޭ ސިޔާސަތުތަކާއި ކާރިސާތަކުގެ ގެއްލުން ކުޑަކުރުމުގެ ފްރޭމްވަރކުގެ ތެރެއިން ދުރާލާ މޫސުމީ އިންޒާރުދޭ ނިޒާމުތައް ޤާއިމުކުރުމަށް ކަމަށްވެސް ރައީސް ވިދާޅުވި އެވެ.
މޫސުމީ ބަދަލުތަކުގެ ސަބަބުން ރާއްޖޭގެ އެކި ހިސާބުތަކުގައި ބައެއް ދުވަސްވަރުތަކުގައި ވައި ވަރަށް ނުސަާފުވެއެވެ. އެގޮތުން މި އަހަރުގެ އިރުވައި މޫސުން ފެށުނު ދުވަސްވަރު، ރާއްޖޭގެ ސަރަހައްދުގައި ވައި ވަރަށް ބޮޑަށް ނުސާފުވެ، އާންމު ސިއްޚަތަަށް ނުރައްކާވާ ދަރަޖައަށް ދިޔައެވެ.
މޫސުމީ ބަދަލުތަކަށް ވިލުންވެރިވެފައިވާ ރާއްޖެއަކަށް ގޮންޖެހުންތަކާއެކު ނަމަވެސް އެ އަމާޒަަށް ވާސިލުވުމުގައި ކާމިޔާބީތަކެއް ލިބެމުންދާކަމަށް ރައީސް ވަނީ މީގެ ކުރިން ވިދާޅުވެފަ އެވެ. އެގޮތުން އެނަރޖީ ޕޮލިސީ އެންޑް ރޯޑްމެޕް އިފްތިތާހުކުރެވިފައިވާކަމަށާއި އަދި ކާބޯތަކެތީގެ ޔަގީންކަން ކަށަވަރުކުރުމަށާއި، އަގުހެޔޮ ބޯހިޔާވަހިކަމެއް ފޯރުކޮށްދިނުމަށް ތިމާވެއްޓާއި ރަށްޓެހި މަޝްރޫޢުތަކެއް ސަރުކާރުން ވަނީ ފަށަފަ އެވެ.
