އަޅުގަނޑުގެ ފިރިމީހާ ކުރާ މަސައްކަތުގެ ގޮތުން ގިނަބައަކު އޭނާއާއި ބައްދަލުކުރަން ގެއަށް އައުދެއެވެ. އަދި މީހުން ގޮވައިގެންވެސް އައުދެއެވެ. އައިސް ދިރުހުޅުވާފައި އެމީހުން ގޮވައިގެން ވަންނަނީ ކުއްލިއަކަށެވެ. އެހެންވެ ވަރަށް ދެރަ ގޮތްތައް މެދުވެރިވެއެވެ.
ގެކުޑަވެފައި ހޫނުވެސް ގަދަވުމާއި އަދި ގޭތެރޭގެ މަސައްކަތުގައި އުޅެންޖެހޭތީ ގިނައިން ތިބެވެނީ ބުރަުގާ ނަގައިގެން ކަމަށްވާތީއެވެ. މިވާހަކަ ފިރިމީހާގެ ގާތުގައި އެތައް ފަހަރަކު ބުނެފީމެވެ. ނަމަވެސް މާބޮޑު ސަމާލުކަމެއް ނުދެއެވެ.
އަޅުގަނޑުގެ ސުވާލަކީ ފިރިމީހާކަމަށްވީތީ އެގޮތަށް ކަންތައްކުރުން ހުއްދަވާނެތޯއެވެ؟
ކިޔުންތެރިޔާއަށް ބުނެލަން އޮތީ އެއީ ކަންތައް ކުރަން ހުއްދަގޮތެއް ނޫނެވެ. ގެއަށް މެހްމާނުން ވައްދާނަމަ ގޭގައި ތިބި އަންހެނުން ނިވާކުރުވަންޖެހޭނެއެވެ. އެއްގޮތަކީ އެމީހުންނަށް އެކަނބަލުން ނުފެންނާނެ ގޮތެއް ހެދުމެވެ. ނޫންނަމަ ބުރުގާއަޅައި ނިވާވުމުގެ ފުރުޞަތު އެކނބަލުންނަށް ދޭންޖެހޭނެއެވެ.
ތިޜީގައިވާ ލިޔުންވެސް ވިދާޅުވެލައްވާށެވެ!
މިހާރަކަށް އައިސް ފަރުދާވެގެން އުޅުން މިވަނީ ނެތިގެން ގޮސްފައެވެ. ގެއަށް މެހްމާނަކު އަތުވެއްޖެނަމަ އެންމެން ތިބެނީ ހާމައަށް ފެންނާށެވެ. ހަމައެއާއިއެކު ގޭގައި ގެންގުޅޭ ނޯކަރުންނާއި ޅިޔަނުންނާއިމެދު ދެކެވޭ ގޮތް ބަދަލުވުމުގެ ސަބަބުން ބޮޑެތި ނުރައްކަލާއި ކުރިމަތިލާންޖެހެނީވެސް މަދަކުން ނޫނެވެ. އެހެންކަމުން ތަންކޮޅެއް ބޮޑަށް ވިސްނާލަން އެބަޖެހެއެވެ.
މިހާރަކަށް އައިސް ގޭގައި ގެންގުޅޭ ނޯކަރު ފިރިހެނުންނާއި ގޭގައި ކުއްޔަށް ގެންގުޅޭ ފިރިހެނުންނާއި ގޭގައި އުޅޭ ޅިޔަނުން ފަދަ ހިލޭ ފިރިހެނުންގެ ކުރިމަތީގައި އަޢުރަ ނިވާނުކޮށް އުޅެމުން އެބަގެންދެއެވެ.
އެއްގޭގައި އުޅުމަކީ ޢާއިލީ ހައިޞިއްޔަތަށް އެއްވެސް ބަދަލެއް އަންނަކަމެއް ނޫނެވެ. ކައިވެނި ޙަރާމްވެ ހުއްދަވުމުގައި އެއްވެސް ބަދަލެއް ނުއަންނާނެއެވެ. ވީމާ އެއް ގެއެއްގައި އުޅުނު ނަމަވެސް ގެއަށް ޒިޔާރަތްކުރާ ކިތަންމެ ގާތް އެކުވެރިން ނަމަވެސް ހިލޭ ފިރިހެނުންވާނީ ހަމަ ހިލޭ ފިރިހެނުންނަށެވެ. އެމީހުންގެ ކުރިމަތީގައި އަޢުރަ ނިވާނުކުރާނަމަ ފާފަވެރިވާނެއެވެ.
ދިވެހިބަހުން ބުރުގާ އެޅުން މިކިޔަނީ އަންހެނުންގެ ހަށިގަނޑުން ހިލޭ ފިރިހެނުންނަށް ނުދައްކައި ފޮރުވަންޖެހޭބައި ނިވާކޮށް ފޮރުވުމަށެވެ. އެބައަކީ އަންހެނާގެ އަޢުރަ ކަމުގައިވާތީ އަޢުރަ ނިވާކުރުމަށެވެ.
ވީމާ ގޭގައި މަސައްކަތްކުރާ ނޯކަރު ނުވަތަ ބުނެވިދިއަ މީހަކީ މަޙްރަމަކަށް (ތިމާ ކައިވެނި ޙަލާލުނުވާ މީހަކަށް) ނުވާނަމަ، އެއްވެސް ޙާލެއްގައި އޭނާގެ ކުރިމަތީގައި ބުރުގާނާޅައި އުޅުމަކީ އިސްލާމްދީނުގައި ހުއްދަކަމެއްނޫނެވެ. އަދި އެކަމުގެ ސަބަބުން ތިމާ ފާފަވެރިވާނެއެވެ. والله أعلم
–އިސްލާމީ ތިލަފަތުގެ ދަރުސަކުން
