މެމްބަރުންގެ މުސާރަ ކުޑަ ކުރުމަށް ގޮވާލައި ޕެޓިޝަނެއްގައި ސޮއި ކުރަން ފަށައިފި
ދެންމެ | 01 އޭޕްރިލް 2025

ރައްޔިތުންގެ މަޖިލީހުގެ މެންބަރުންގެ މުސާރަ އާއި އިނާޔަތްތައް ކުޑަކުރަން ގޮވާލާ ޕެޓިޝަނެއްގައި ސޮއިކުރަން ފަށައިފި އެވެ.

އޮންލައިންކޮށް ސޮއިކުރެވޭ މި ޕެޓިޝަންގައި ވަނީ ރައްޔިތުންގެ މަޖިލީހުގެ މެމްބަރުންނަށް ލިބޭ މުސާރައާއި ކޮމެޓީ އެލަވަންސްތަކާއި ޕްރިމިއަމް ހެލްތް އިންޝުއަރެންސް އިނާޔަތްތަކުގެ ސަބަބުން އިގްތިސާދަށް މާލީ ގޮތުން މާބޮޑު ބުރައެއް އުފަލަންޖެހޭތީ ކަންބޮޑުވާކަމަށެވެ.

ޤައުމީ ދަރަންޏާއި ބަޖެޓް ޑެފިސިޓް އިތުރުވުން ފަދަ އިގްތިސާދީ ބޮޑެތި ގޮންޖެހުންތަކާ ކުރިމަތިލާން ޖެހިފައިވާ މި ދަނޑިވަޅުގައި، ސަރުކާރުގެ ބޭކާރު ހަރަދުތައް ކުޑަކުރުމަށް ފިޔަވަޅުތަކެއް އެޅުމަކީ ކޮންމެހެން ކުރަންޖެހޭ ކަމެއްކަމަށްވެސް މި ޕެޓިޝަންގައިވެއެވެ. މިގޮތުން މިހާރު މަޖިލީހުގެ މެމްބަރުންނަށް މުސާރައިގެ އިތުރުން ބޮޑު އަދަދަކުން ކޮމިޓީ އެލަވަންސް ލިބި މެމްބަރުންގެ ޖުމްލަ އާމްދަނީ ވަރަށް ބޮޑުކަމަށް މި ޕެޓިޝަންގައިވެއެވެ.

މީގެ އިތުރުން، އާންމު ރައްޔިތުންނަށް ލިބެން ހުންނަ އާސަންދަ ސްކީމަށް ވުރެ މާ ބޮޑު ޕްރިމިއަމް ހެލްތް އިންޝުއަރެންސް ޕެކޭޖެއް މެމްބަރުންނަށް ލިބޭކަމަށްވެސް މި ޕެޓިޝަންގައިވެއެވެ.

އެވްރެޖް ދިވެއްސަކަށް ދިރިއުޅުމުގެ ހަރަދު ބޮޑުވެ، މާލީ އުނަދަގޫތަކާއި ކުރިމަތިލާން ޖެހިފައިވާ ދަނޑިވަޅެއްގައި، މި ތަފާތުކަމަކީ ބޭއިންސާފު އަދި ބޭއިންސާފު ކަމެއް.“ އޮންލައިންކޮށް ސޮއިކުރެވޭ ޕެޓިޝަންގައިވެއެވެ.

މުސާރަ ކުޑަކުރުމުގެ އިތުރުން ކޮމެޓީ އެލަވަންސް އުވާލުމަށްވެސް މި ޕެޓިޝަންގައި ވަނީ ގޮވާލާފައެވެ.

“ ކޮމެޓީގެ ބައިވެރިވުމުގެ އިތުރު އެލަވަންސަކީ ބޭކާރު ހަރަދެއް ކަމަށާއި އެ އެލަވަންސް އުވާލަން ޖެހޭ.“ މި ޕެޓިޝަންގައިވެއެވެ.

މީގެއިތުރުން ކުރީގެ މެމްބަރުންނަށް އިނާޔަތްތައް ހުއްޓުވަންވެސް މި ޕެޓިޝަންގައި ވަނީ ގޮވާލާފައެވެ. މަޖިލީހުގެ މެންބަރެއްގެ މުސާރަ އާއި އެލަވަންސުގެ ގޮތުގައި މަހަކު 85،000ރ. ލިބެ އެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!