އިނގިރޭސި ވިލާތުގެ ލިވަޕޫލްގެ އެންފީލްޑު ސްޓޭޑިއަމްގައި ރަސްމީކޮށް ރާއްްޖެ އިޝްތިހާރު ކުރަން ފަށައިފިއެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)، ވިޒިޓް މޯލްޑިވްސް ގުޅިގެން، އިނގިރޭސިވިލާތުގެ ލިވަޕޫލް ފުޓަބޯޅަ ކްލަބާ އެކު ކުރިއަށްގެންދާ ރާއްޖޭގެ ފަތުރުވެރިކަން އިޝްތިހާރު ކުރުމުގެ ކެމްޕޭނު ރަސްމީކޮށް ފެށީ ރޭގައެވެ.
އެގޮތުން މި ކެމްޕޭން ލޯންޗު ކުރުމާއެކު އެންފީލްޑުގައި ރޭ އެވަޓަން އާ ދެކޮޅަށް ކުޅެމުންދިޔަ މެޗުގައި، ދަނޑުގެ ވަށައިގެން ޖަހާފައިވާ ލެޑު ބޯޑުތަކުން ރާއްޖޭގެ ފަތުރުވެރިކަމުގެ އިޝްތިހާރުތައް ވަނީ ދައްކާފައެވެ.
މި ކެމްޕޭނު ލޯންޗު ކުރުމުގައި ރައީސް ޑރ. މުހައްމަދު މުއިއްޒު ވަނީ ބައިވެރިވެވަޑައިގެންފައެވެ.
ކްލަބް ލިވަޕޫލް އަކީ ދުނިޔޭގެ އެކިކަންކޮޅުތަކުގެ މީހުންގެ މެދުގައި ވަރަށް މަގުބޫލު ކްލަބެކެވެ. އެމްއެމްޕީއާރްސީން ބުނީ، 100 ގައުމެއްގައި 316 އޮފިޝަލް ލިވަޕޫލް ސަޕޯޓާސް ކްލަބް ހިމެނޭ ކަމަށެވެ. އެހެންކަމުން ލިވަޕޫލާއެކު ހެދި މި އެއްބަސްވުމުގެ ސަބަބުން ރާއްޖެއަށް ދުނިޔޭގެ ފެންވަރުގެ ބޮޑު އެކްސްޕޯޝާއެއް ލިބިގެންދާނެ ކަމަށް އެމްއެމްޕީއާރްސީން ވަނީ ބުނެފައެވެ.
މި ކެމްޕޭނުގެ ދަށުން ސްޓޭޑިއަމްގެ އެކި ސަރަހައްދުތަކުގައި ރާއްޖޭގެ ޓޫރިޒަމް ބްރޭންޑިން ޖަހައި އެލްއެފްސީގެ ރަސްމީ ޕަބްލިކޭޝަންތަކުގައި ވެސް ރާއްޖެ ޕްރޮމޯޓު ކުރާނެ ކަމަށް އެ ކުންފުނިން ވަނީ ބުނެފައެވެ. އަދި ޕްރިމިއާ ލީގުގެ ހޯމް މެޗުތަކުގައި ރާއްޖޭގެ އެލްއީޑީ ނިޝާން ފެންނާނެ ކަމަށްވެސް އެމްއެމްޕީއާރްސީން ވަނީ ބުނެފައެވެ.
މީގެ އިތުރުން ޔޫރަޕްގެ އެކި ހިސާބުތަކުގައި މުހިއްމު މާކެޓުތަކުގެ ޓޫރިސްޓުންނަށް އަމާޒު ކޮށްފައިވާ ބިލްބޯޑުތަކުން ރާއްޖެ ދައްކާލަން ހަމަޖެހިފައިވާ ކަމަށްވެސް އެ ކުންފުނިން ވަނީ ބުނެފައެވެ.
އެމްއެމްޕީއާރްސީން ބުނީ މި އެއްބަސްވުމުގެ ދަށުން ލިވަޕޫލްގެ އެކި ކުޅުންތެރިންނާ އެކު ވެސް ރާއްޖޭގެ ޓޫރިޒަމް ޕްރޮމޯޓްކުރުމުގެ އެކި ހަރަކާތްތައް ހިންގާނެ ކަމަށެވެ. އަދި ރާއްޖޭގައި ލިވަޕޫލްގެ އެކަޑަމީއެއް ގާއިމުކޮށް، ސްޕޯޓްސް ޓޫރިޒަމް ހަރުދަނާ ކުރުމާއި ޑެސްޓިނޭޝަން ބްރޭޑިން އިތުރުކުރުން ފަދަ ހަރަކާތްތައް ވެސް މި ކެމްޕޭންގައި ހިންގާނެ ކަމަށް ވަނީ ބުނެފައެވެ.
2.5 މިލިއަން ޑޮލަރު އިންވެސްޓްކުރާ މި ކެމްޕޭނުން 200 މިލިއަން ޑޮލަރުގެ އާމްދަނީއެއް ލިބޭނެ ކަމަށްވެސް އެ ކުންފުނިން ވަނީ ލަފާ ކޮށްފައެވެ. އެ ކުންފުނިން ބުނީ މި ކެމްޕޭންގެ ސަބަބުން ޓޫރިޒަމާއި އިގްތިސާދީ ގޮތުން ރާއްޖެއަށް ބޮޑެތި ފައިދާތަކެއް ލިބިގެންދާނެ ކަމަށެވެ.
