ރޭ ތ. ހިރިލަންދޫ އިން ފުރައިގެން މާލެ ދަތުރުކުރަމުން ދިޔަ ”ހޮޅުދޫ ބޯޓު“ ގައި އަލިފާން ރޯވި ހާދިސާގައި ގެއްލުނު ލ. މާވަށަށް ނިސްބަތްވާ 25 އަހަރުގެ އަލީ މުޝްފިގް އަދިވެސް ނުފެންނަ ކަމަށް އެމްއެންޑީއެފުން ބުނެފި އެވެ.

ޖުމްލަ 18 މީހުންނާ އެކު ދަތުރުކުރަމުންދިޔަ މުދާ އުފުލާ ބޯޓުގައި އަލިފާން ރޯވިކަމުގެ މަޢުލޫމާތު ލިބުނީ ރޭ 21:07 ހާއިރު އެވެ. އެމްއެންޑީއެފުން އެ ސަރަހައްދަށް ގޮސް، ބޯޓުގައި ތިބި 17 މީހުން ވަނީ ސަލާމަތްކޮށްފަ އެވެ.

އެމްއެންޑީއެފުން އަދިވެސް ދަނީ ގެއްލުނު މުޝްފިގު ހޯދުމުގެ މަސައްކަތް ކުރަމުންނެވެ. އެގޮތުން، އެމްއެންޑީއެފް ކޯސްޓްގާޑް ޝިޕް އާޒީ، އެފްއައިސީ މާފަތް، އެޗްޕީ 114، ޑައިވަރުންނާއި އެއާ ކޯގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުން މުޝްފިޤް ހޯދުމުގެ މަސައްކަތް ކުރަމުންދާ ކަމަށް ވަނީ ބުނެފަ އެވެ.

ބޯޓު ކަނޑުމަތީގައި އެއްކޮށް އަނދާ ހުލިވެ، ރޭ ދަންވަރު 2:07 ގައި ވަނީ އަޑިއަށް ގޮސްފަ އެވެ. އެ ބޯޓު އަޑިއަށް ގޮސްފައި ވަނީ ތ. ވަންދޫއާ ކައިރިންނެވެ. މި ބޯޓުގައި އަލިފާން ރޯވާން ދިމާވި ސަބަބު އަދިވެސް ނޭންގެ އެވެ.

އެމްއެންޑީއެފުން ވަނީ ބޯޓުގެ ބައިތައް އޮޔާދާތީ އެ ސަރަހައްދުން ކަނޑު ދަތުރުކުރާ ފަރާތްތަކުން ސަމާލުވުމަށް ވެސް އެދިފަ އެވެ.