އީރާނަށް ހަމަލާދޭކަށް ނޫޅެން، އެސަމާސާއެއް، މަސްވަރާ ކުރަން ބޭނުން: އެމެރިކާ
ދެންމެ | 03 އޭޕްރިލް 2025

ދުނިޔޭގެ އެންމެ ބާރުގަދަ ގައުމުކަމަށް ދައުވާކުރާ އެމެރިކާގެ ރައީސް ޑޮނާލްޑް ޓްރަމްޕްގެ ހަރުކަށި އިންޒާރުތަކަކަށް ފަހު، އީރާނަށް ޙަމަލާ ދިނުމާގުޅޭ ވާހަކަތަކުގެ ރާގު މިހާރު މުޅިން ބަދަލުވެއްޖެއެވެ.

މިހާރު އެމެރިކާއިން ބޭނުންވަނީ ނިއުކްލިޔަ މަޝްރޫޢާ ގުޅޭގޮތުން އީރާނާއެކު މަޝްވަރާކުރުމަށެވެ. އަދި އެގޮތަށް އެވާހަކަތައް ކުރިއަށް ގެންދިއުމަށް އެމެރިކާ ސަރުކާރުގެ ފަރާތުން ވަނީ ހުށަ ވެސް ހަޅާފައެވެ. އެހެން ނަމަވެސް އީރާނުން ވަނީ އެމެރިކާގެ ހުޅަހެޅުމަށް ނޫނެކޭ ބުނެފައެވެ. އަދި އެއްވެސް މެދުވެރިއަކު ނެތި އެމެރިކާއާ ކުރާނެ މަޝްވަރާއެއް ވެސް، ދައްކާނެ ވާހަކައެއް ވެސް ނެތް ކަމަށް ބުނެފައެވެ.

މަސްރަހު ދިރާސާކުރާ ބައެއް ފަރާތްތަކުން ބުނާގޮތުގައި އެމެރިކާއިން ހީކުރި ވަރަށް ވުރެ ހަތިޔާރުގެ ގޮތުން އީރާން ކުރިއަރާފައިވާތީ، ހަމަލާދޭން އެމެރިކާ ޖެހިލުންވަނީއެވެ. އަނެއް ބަޔަކު ބުނާގޮތުގައި ރަޝިޔާއިން ދިން ނުސީދާ އިންޒާރުގެ އިތުރުން ޗައިނާގެ ވާހަކަތަކުން އީރާނު އޮތީ އެކަނި ނޫންކަން އެނގުމުން ބަލިކޮށްލެވިދާނެ ކަމުގެ ޔަޤީންކަން ނެތީއެވެ.

އަނެއްކޮޅުން އެމެރިކާއިން އީރާނަށް ޙަމަލާއެއް ދީފިނަމަ، އީރާނުން އިޒްރޭލަށް ޙަމަލާ ދޭނެއެވެ. އެހެންކަމުން އިޒްރޭލުގެ ދައުރެއް ވެސް މިކަމުގައި އޮވެދާނެ ކަމަށް ބެލެވެއެވެ. އެހެނީ އިޒްރޭލުން މިހާރު މަސައްކަތްކުރަމުން އެދަނީ ޣައްޒާ ހިފުމަށް ފަހު، ބިންތަކަށް ވެރިވެގަންނާށެވެ. މިދަނޑިވަޅުގައި އިރާނުގެ ޙަމަލާތަކެއް އަމާޒުވެެއްޖެ ނަމަ، ޣައްޒާގެ ހަނގުރާމައިގާ ބޭނުންކުރާ ވަޞީލަތްތައް އަނބުރާ ގައުމަށް ގެންދާންޖެހޭނެއެވެ.

އިރާނުން އަބަދުވެސް ބުނަމުން ދަނީ، އެމީހުން އޮތީ އެމެރިކާއިން ދީފާނެ ޙަމަލާއަކަށް ތައްޔާރަށް ކަމަށާއި، ބޮމަކަށް ބޮމެއް، މިސައިލަކަށް މިސައިލެއް، ރޮކެޓަކަށް ރޮކެޓެއް ރައްދުގައި ފޮނުވާލާނެ ކަމަށާއި، ފޯޅަވަހީގައި އޮތް އެމެރިކާގެ އަސްކަރީ މަރުކަޒު ގޮއްވާލާނެ ކަމަށެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!