އދ.ގެ ’ކޮމިޝަން އޮން ދަ ސްޓޭޓަސް އޮފް ވިމެން‘ (ސީއެސްޑަބްލިއު)ގެ މެމްބަރަކަށް ވުމަކީ ރާއްޖެއަށް ލިބުނު ބޮޑު ފަހުރެއް ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ސޯޝަލް މީޑިއާގައި ކުރެއްވި ޕޯސްޓެއްގެއް ރައީސް ވަނީ އދ. ގެ އަންހެނުންގެ ކޮމިޝަން (ޔޫއެން ވިމެން) ގެ މެމްބަރުކަމަށް 2026-2030 ގެ ދައުރަށް ރާއްޖެ ހޮވިފައިވާކަން އިއުލާންކުރައްވައި، އެކަމަކީ ރާއްޖެއަށް ލިބުނު ވަރަށް ބޮޑު ޝަރަފެއް ކަމުގައި ވިދާޅުވެފައެވެ.
އެގޮތުން ރާއްޖޭގެ އިތުރުން، އެ ކޮމިޝަނަށް ހޮވުނު އެހެން ހުރިހާ ޤައުމުތަކަށްވެސް ރައިސް ވަނީ މަރުޙަބާ ދަންނަވާފައެވެ. އެކުވެރި ޕާޓްނަރޝިޕެއްގެ ތެރެއިން، އަންހެނުންގެ ޙައްޤުތަކާއި ބާރުވެރިކަމާ ގުޅޭ މުހިންމު މައްސަލަތަކުގައި ކޮމިޝަނަށް އެހީތެރިވުމަށް ރާއްޖެއިން ތައްޔާރަށް ތިބިކަމުގައި ވެސް އެމަނިކުފާނު ވަނީ ވިދާޅުވެފައެވެ.
ވޭތުވެދިޔަ އަހަރުތަކުގައި، ޤައުމީ އަދި ބައިނަލްއަޤްވާމީ ފެންވަރުގައި އަންހެނުންގެ ޙައްޤުތަކާއި ދަރަޖަ ކުރިއެރުވުމުގައި ދިވެހިރާއްޖެއިން ވަނީ މުހިންމު ފިޔަވަޅުތަކެއް އަޅާފައެވެ. ކުރިއަށް އޮތް މުސްތަޤްބަލަކަށްޓަކައި ކޮމިޝަންގެ މަސައްކަތްތައް ހަރުދަނާކުރުމަށް ހުރިހާ ބައިވެރިންނާއެކު މަސައްކަތްކުރުމަށް ބޭނުންވާ ކަން ވެސް ރައީސް ވަނީ ފާހަގަކުރައްވާފައެވެ.