މަސްއޫލިއްޔަތުތަކާއި ބުރަބޮޑު ދުވަހީ ދިރިއުޅުމުން ނުކުމެލާފައި، ހިތްހަމަޖައްސާ މަޖާކޮށްލަން ކޮންމެ މީހަކުވެސް ބޭނުންވާނެއެވެ. މަސައްކަތުގެ މާހައުލުން ނުވަތަ ގޭގެ ހަތަރުފާރުން ބޭރަށްގޮސް، ގުދުރަތީ މަންޒަރުތަކުން ހިތް ފުރާލަން އެދޭނެއެވެ. މިފަދަ މާހައުލުތައް ތެރެއިން އެންމެ ހިތްގައިމުކަމާއި ހަމަޖެހުން ލިއްބައިދޭނެ އެއް ތަނަކީ ޓްރީހައުސް ޕާކްތަކެވެ. ވާހަކަ ފޮތްތަކުގައި ސިފަކޮށްދޭފަދަ ގަހުގައި ބިނާކޮށްފައި ހުންނަ ގެތަކެވެ. ނުވަތަ ގަސްމަތީ ގެއެވެ. ޓްރީހައުސްއަކަށް އެރުމަކީ އަޅުގަނޑުމެންގެ ތެރެއިން ގިނަ ބަޔަކު ޅަފަތުގައި ދެކުނު ހުވަފެނެއްކަން ޔަޤީނެވެ. އެއީ ހަމަ ’ޗައިލްޑް ހުޑް ޑްރީމް‘ އެކެވެ. ކާޓޫނުތަކުން ފެނުނު އެ މަންޒަރުތައް އަދު ހަޤީޤަތަކަށް ވެއްޖެއެވެ. ދުނިޔޭގެ އެކި ހިސާބުތަކުގައި އެފަދަ ޓްރީހައުސްތައް ޤާއިމްކޮށްފިއެވެ.
ބިމުން މަތީގައި ހުންނަ ޖާދުވީ މިފަދަ ޓްރީހައުސްތަކުން ލޮލަށް ދައްކުވައިދެނީ ހުވަފެނީ މަންޒަރުތަކެވެ. ވަށައިގެންވާ މާހައުލުގެ ޗާލުކަމާއި ފުރިހަމަކަމެވެ. ޗުއްޓީއަށް ނުވަތަ ހިތްހަމަޖައްސާލުމަށް ކުރާ ދަތުރުތައް، އިތުރަށް ފުރިހަމަކޮށްދޭނެ އެއް ޒަރީޢާއަކީ މިފަދަ ޓްރީހައުސްތަކެވެ. އެހެންކަމުން، ވޮޝިންގޓަންގައި ކުއްޔަށް ހިފޭ ޓްރީހައުސްތަކުގެ މައްޗަށް ނަޒަރެއް ހިންގާލަމާ ހިނގާށެވެ.
ވޮޝިންގޓަން ގެ ޓްރީހައުސްތައް؛
ވޮޝިންގޓަންއަކީ ފެހިކަންގަދަ ގަސްގަހާއި ގެއްސަށް މުއްސަނދި ތަނެކެވެ. އެހެންކަމުން ޓްރީހައުސްތައް އެޅުމަށް އެ ގަސްތަކުގެ ބޭނުންހިފުމަކީ އެއްވަނައިގެ ކަމެއްކަން ގައިމެވެ. އެކަމުގެ ބޭނުން އެންމެ ފުރިހަމައަށް އެމީހުން ހިފާފައިވާކަން ހާމަވަނީ، ގިނަ އަދަދެއްގެ ޓްރީހައުސްތަކުން އެ މަންޒިލްތައް ޖަރީކޮށްފައިވާތީއެވެ. އެ ޓްރީހައުސްތަކަކީ ފަތުރުވެރިންގެ ސަމާލުކަން ދަމައިގަންނަ ދަގެންފާނެކޭ ބުނުމަކުން ދޮގަކަށް ނުވާނެއެވެ.
1. ޕީޓް ނެލްސަން އޮރިޖިނަލް ޓްރީހައުސް
ޕީޓް ނެލްސަން އޮރިޖިނަލް ޓްރީހައުސްއަކީ ޕެސިފިކް ނޯތްވެސްޓްގެ ޓްރީހައުސްތަކުގެ ތެރެއިން ހަޤީޤީ ޓްރީހައުސްގެ އަސްލާއި ކުލަވަރު ފެންނަ ތަނެކެވެ. މި މަަންޒިލުގައި، ގަހުގައި ވަރަށް އަރާމުގައި ނިދާލެވޭއިރު، ވަށައިގެންވަނީ ގުދުރަތީ މާހައުލާއި އޭގެ ހިތްގައިމުކަމެވެ. ފިނި ވައިރޯޅިތައް ޖެހޭ ގަސްތައް ހުންނާތީ ގުދުރަތީ ރީތިކަމާއި ޖާދުވީކަން އިޙްސާސްކުރެވެއެވެ. ހަމަ މިދަނޑިވަޅުގައި، ޓްރީހައުސްގައި ތިބިނަމަވެސް، ޢާއްމު ވަސީލަތްތައްވެސް ނުހަނު ފަސޭހަކަމާއެކު ބޭނުންކުރެވޭ ނިޒާމު ވަނީ ހަމަޖައްސާފައެވެ. އެގޮތުން، ފެންވެރޭނެ ގޮތާއި، ހޮޓް ޓަބްތަކުގެ އިތުރުން، 100 އިންޗީގެ ސްކްރީންއާއި ޕްރޮޖެކްޓަރވެސް ބޭނުންކުރެވެން ހުރެއެވެ. މިއީ މީހުން އައުމަށް ނުހަނު ކަމުދާނެ މަންޒިލެއްކަމަށް އޮސްޓްރޭލިއާގެ ބްލޮގަރ އަދި ފޮޓޯގްރާފަރ ރެނީ ހާމަކުރެއެވެ.
2. ދަ ކްލިކިޓެޓް ޓްރީހައުސް
ކްލިކިޓެޓް ޓްރީހައުސްގެ ފަރުމާގެ ފަހަތުގައިވާ ޙިޔާލު ނުވަތަ އިންސްޕިރޭޝަން އުފެދިގެން އައީ ސްކެންޑިނޭވިއަން އާކިޓެކްޗަރގައި ހުންނަ ސާދާކަމާއި ފަސޭހަ ޑިޒައިންތަކުގެ ތެރެއިންނެވެ. މިތަނުގެ ކުޑަދޮރުތައް ފުޅާވެފައި ދިގެވެ. ތަޅުމުން ފެށިގެން ސީލިންގއާއި ހަމައަށް އަރާ އެ ކުޑަދޮރުތައް ހަޤީޤަތުގައި ސައިޒުގެ ގޮތުން ބޮޑެވެ. ބޭނުންކޮށްފައިވާ މި ކުޑަދޮރުތަކާއި ’ސްކައިލައިޓުތަކުގެ‘ ސަބަބުން، ޖަންގަލިތެރެއާއި ފަރުބަދަތައް ނުހަނު ރީތިކޮށް ފެންނަންހުރެއެވެ.
3. ދަ އޯލް މިލް ޓްރީހައުސް
ފަންނީގޮތުން ބަލައިލުމަށް ޓްރީހައުސްއެއް ނޫންނަމަވެސް، އޯލް މިލް ޓްރީހައުސްއަކީ ރީތި ޖަންގަލި ސަރަހައްދެއްގައި ހުންނަ ތަނެކެވެ. މިތަނަށް ޒިޔާރަތްކުރާ ފަރާތްތަކަށް، އެނދުކައިރީ ހުންނަ ލަގްޒަރީ ސޯކިންގ ޓަބެއްގެ އިތުރުން، އުސް ސީލިންގތަކާއި ކުޑަ ބަދިގެއެއް ބޭނުންކުރެވޭނެއެވެ. އަދި އުޅެލަން ފަސޭހަ މަތީ ބައެއް ނުވަތަ ފަންގިފިލާއެއްވެސް ހުރެއެވެ. މި ތަނުގައި އެންމެ ފާހަގަކޮށްލެވޭ މޮޅުކަމަކީ އެތަނުގައި ހުންނަ ވޯޓަރ ވީލް އަދިވެސް މަސައްކަތްކުރާކަމެވެ. އޭގެ ސަބަބުން ވަރަށް ހިތްގައިމުކަމާއި ހިތްފަސޭހަކަން މާހައުލަށް ގެނެސްދެއެވެ.
4. ލޮތްލޯރިއަން ވުޑްސް ޓްރީހައުސް
ލޮތްލޯރިއަން ވުޑްސް ޓްރީހައުސްގައި ތިބޭއިރު، ހޮޓް ޓަބްގައި ހަމަޖެހިގެން އަރާމުކޮށްލެވެއެވެ. އަދި އިރާއި ހަނދުގެ އިތުރުން ނަލަ ތަރިތައް ފިޔަޖަހާތަން ވަރަށް ރީތިކޮށް ބަލައިލެވެއެވެ. މައުންޓް އެޑަމްސް ނަމަކަށް ކިޔާ ފަރުބަދައިގެ ކައިރީގައި ހުންނަ މިތަނަކީ ބަލައިލަން ރީތި އަދި ޗާލު މަންޒިލެކެވެ. މިތަނުގައި ފާހަގަކޮށްލެވޭ ޚާއްސަކަމަކީ، އޮޅުކޮށްގެން ގެންގުޅޭ ’ޕެޓްސް‘ ވެސް މި ޓްރީހައުސްއަށް ގެނެވޭކަމެވެ.
5. ޓްރީހައުސް ޕްލޭސް އެޓް ޑިއަރ ރިޖް
ޓްރީހައުސް ޕްލޭސް އެޓް ޑިއަރ ރިޖްއަކީ ހުވަފެނެއްފަދަ ޖާދުވީ މަންޒިލެކެވެ. ހަމައެކަނި އެޔެއް ނޫނެވެ. މި ޓްރީ ހައުސްގައި، އަލިފާންގަނޑެއް ޖެހޭނެ ތަނުގެ ކައިރީގައި، އެންމެ ފެންވަރުގެ ސޯކިންގ ޓަބްއެއް ހުރެއެވެ. އެވެސް ޓީވީއިން ނެޓްފްލިކްސް ބެލޭނެ ގޮތަށެވެ. ތަނުގެ ވަށައިގެން ފިތުރޯނު ގަސްތަކެވެ. މި ޓްރީހައުސް ހުންނަނީ ސީއެޓަލްއާއި މާދުރުނޫން ހިސާބެއްގައެވެ. އެހެންކަމުން މީހުން އުޅޭ ސަރަހައްދާއި ކައިރި ހިސާބަކުން ޓްރީހައުސް އިޙްތިޔާރު ކުރާ ފަރާތްތަކަށް މިއީ އެންމެ އެކަށޭނެ އެއް މަންޒިލެވެ.
6. އީގަލްސް ބްލަފް ޓްރީހައުސް
ޕެސިފިކް ނޯތްވެސްޓް ޓްރީހައުސްއެއްގައި ގިނަ މީހުން ބޭނުންވާނީ އަމިއްލަ ނަފުސަށް ހުސްކޮށްލާނެ ވަގުތެވެ. ހިތްހަމަޖެހުމެވެ. ގުދުރަތީ ރީތިކަން ތަޖުރިބާކޮށްލާ ހިތްހަމަޖައްސާލުމަށް މި އީގަލްސް ބްލަފް ޓްރީހައުސްއަކީ ނުހަނު ކަމުދާނެ ތަނެކެވެ. ހަމައެހެންމެ، ގަސްތައް ބޯ ސަރަހައްދުގައި ހުންނަ މި ޓްރީހައުސްގައި، ހިތަށް ފިނިކަމާއި ހަމަޖެހުން ގެނެސްދޭފަދަ ރާޅުތައްޖަހާ އަޑުއަހަމުން، ނިދާލެވެއެވެ. އެއީ މި ޓްރީހައުސް، މޫދާއިވެސް ކައިރިވީމައެވެ. ހަނދުގެ ޖާދުވީ އަލި ފެތުރިފައިވާއިރު، ނުހަނު ހަމަޖެހިލައިން ރޭގަނޑުގެ ވަގުތުތައް ހޭދަކުރެވެއެވެ. އަދި އަރައިގެން އަންނަ އިރާއެކު އިވޭނީ ދޫނިތައް ކިޔާ މިޔުޒިކީ ލަވަތަކުގެ އަޑެވެ. ހިތްފަސޭހަ ވަގުތުކޮޅެއް ހޭދަކުރުމަށްޓަކައި މިތަނުގައި ދެވައްތަރުގެ އުނދޯލިވެސް ހުރެއެވެ.
7. އޮސްޕްރޭ ޓްރީހައުސް
ޕެސިފިކް ނޯތްވެސްޓުގައި ކުއްޔަށްދޭ ހިތްގައިމު ޓްރީހައުސްތަކުގެ ތެރޭގައި އޮސްޕްރޭ ޓްރީހައުސް ހިމެނެއެވެ. މިތަނަށް މިނަން ދެވިފައިވަނީ، އެ ސަރަހައްދުން ޢާއްމުކޮށް ފެންނަ އޮސްޕްރޭ ދޫންޏާއި ގުޅުވައިގެންނެވެ. އަމިއްލަ ރަށެއްގައި ހަދާފައިވާ މި ޓްރީހައުސްގައި ހުންނަ ބެލްކަންޏަށް ނުކުތުމުން، ގަސްތައް މަތީގައި އުޅެވޭކަހަލަ އިޙްސާސްއެއް ކުރެވޭނެއެވެ.
މި ދެކެވުނީ ވޮޝިންގޓަންގެ ޓްރީހައުސްތަކުގެ ވާހަކައެވެ. އެ ޓްރީހައުސްތަކުގެ ހިތްގައިމުކަމާއި ޗާލުކަމުގެ ދާސްތާނެވެ. ނަމަވެސް މީގެ ޖާދުވީ ކުލަވަރުތައް އަޅުގަނޑުމެންގެ މި ފެހިކަންގަދަ ރާއްޖެއިން ފެނުމަކީ ފަހަރުގައި ދުރުގައި އޮތްކަމެއް ނޫނެވެ. އެއީ ރާއްޖޭގެ ސަލްޓަން ޕާކް ތަރައްގީ ކުރައްވާނީ އެއްގަހުން އަނެއް ގަހަށް ދެވޭގޮތަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާތީއެވެ. ’ރައްޔިތުންނާ އެކު‘ ޕޮޑްކާސްޓުގައި ރައީސް ވިދާޅުވީ، ސަލްޓަން ޕާކަކީ ގިނަ ގަސްތައް ހުންނަތަނެއްކަމުން، އެތަން ތަރައްގީކުރާއިރު، އެއްގަހުން އަނެއް ގަހަށް ދެވޭގޮތަށް ހަދަން ނިންމަވާފައިވާކަމަށެވެ. އެއީ އެކި ކަހަލަ ހަރަކާތްތަކާއި އެކި ބައިބައިވެސް ހިމެނޭފަދަ ގޮތަކަށެވެ. އެހެންކަމުން ޓްރީހައުސްގެ ކޮންސެޕްޓެއް ސަލްޓަން ޕާކުން ފެނިގެން ދިއުމަކީ ތަސައްވަރުކޮށްލެވޭ ކަމެކެވެ.
