ސޯޝަލް މީޑިއާއިން ފެންނަ ކަންކަން ކުރަން ބޭނުންވި ނަމަވެސް މުސްލިމުންނަށް އޮތީ ކޮންމެ ކަމެއްވެސް އިސްލާމް ދީނުގައި އޮތްގޮތަށް ކުރުމެވެ. ބައަކު ކުރާހައި ކަމެއް ކުރުން ހުއްދައެއް ނޫނެވެ.
މިހާރަކަށް އައިސް އެއް އަނބިންނަށްވުރެ ގިނަ އަނބިން ގެންގުޅޭ މީހުން ހުރިހާ އަނބިންނާ އެކުގައި އެއްފަހަރާ ރޭކުރަން ބޭނުންވުމުގެ މައްސަލަތައް އެބަ ކުރިމަތިވެއެވެ. މިފަދަ ކަންކަމަށް ނުރުހޭ އަނބިން ވަރިކުރާ ކަމުގެ ޝަކުވާވެސް ލިބެއެވެ.
މިކަމުގައި ދީނުގައި އޮތީ ކޮން ގޮތެއްތޯ ކިޔުންތެރިން ސުވާލުކުރައްވާތީ ދަންނަވަމެވެ.
ޑރ. މުޙައްމަދު އިޔާޟް ޢަބްދުއްލަޠީފް ވިދާޅުވެފައިވަނީ ”ގިނަ އަނބިން ގެންގުޅޭ ފިރިން ހުރިހާ އަނބިންނާ އެއްކޮށް ނިދުމަކީ ޙަރާމް ކަމެކެވެ. ކޮންމެ އަންބަކަށް ވަކި ސަކަނެއް (ހުންނާނެ ތަނެއް) ހަމަޖައްސައިދޭންވާނެއެވެ.
މާނައަކީ މިޘާލަކަށް 4 އަނބިން ތިބެ، ހުރިހާ އަނބިން އެއްގެއެއްގައި އުޅޭނަމަ 4 އަނބިންނަށް 4 ކޮޓަރި ހުންނަން ޖެހޭނެއެވެ. ނިދަން ޖެހޭނީ ކޮންމެ އަންތބަކާއިއެކުވެސް ވަކިންނެވެ.
