ވަރަށް އަވަހަށް އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެ ވަޑައިގަންނަވާނެކަމަށް އިންޑިއާގެ ނޫސްތަކުން ރިޕޯޓުކޮށްފިއެވެ.
ޓައިމްސް އޮފް އިންޑިއާއިން ބުނީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ޒައާމަތުގައި އިންޑިއާގެ ބޮޑުވަޒީރު މޯދީ ރާއްޖެއަށް ކުރައްވާ ފުރަތަމަ ދަތުރުފުޅު މި އަހަރުގެ ޖުލައި މަހު ކުރެއްވުމަށް އިންޑިއާ ސަރުކާރުން ވިސްނަމުންދާކަމަށެވެ.
މިއީ ރާއްޖޭގެ ޚާރިޖީ ވަޒީރު ޢަބްދުﷲ ޚަލީލް ފާއިތުވި ހަފްތާގައި އިންޑިއާއަށް ކުރެއްވި ދަތުރުފުޅުގައި ރައީސް މުޢިއްޒުގެ ފަރާތުން ރާއްޖެ ވަޑައިގެންނެވުމަށް ބޮޑުވަޒީރު މޯދީއަށް ދެއްވި ހާއްސަ ދައުވަތާއި ގުޅިގެން ކުރައްވަން ނިންމެވި ދަތުރުފުޅެއްކަމަށް ނޫހުންވަނީ ރިޕޯޓުކޮށްފައެވެ.
މި ދަތުރުފުޅުގެ އެޖެންޑާ އަދި ކަނޑައެޅިފައި ނުވިނަމަވެސް ރާއްޖޭގެ މިނިވަންދުވަސްކަމަށްވާ ޖުލައި 26 އާ ގުޅުވައިގެން ދަތުރުފުޅު ކުރައްވަން ނިންމަވާފައިވާކަމަށާއި މިއީ ދެގައުމުގެ ގުޅުން އިތުރަށް ބަދަހިވެގެންދާނެ ދަތުރުފުޅެއްކަމަށް ޓައިމްސް އޮފް އިންޑިއާއިން ވަނީ ރިޕޯޓުކޮށްފައެވެ.
ޚާރިޖީ ވަޒީރު ޚަލީލް އިންޑިއާއަށް ކުރެއވި ދަތުރުފުޅުގައި އިންޑިއާގެ މިނިސްޓަރ އޮފް އެކްސްޓަރނަލް އެފެއާރޒް ޑޮކްޓަރ އެސް. ޖައިޝަންކަރާއި ބައްދަލުކުރައްވައި ދެ ޤައުމުގެ ގުޅުން އިތުރަށް ހަރުދަނާ ކުރުމުގެގޮތުން މަޝްވަރާތައް ވަނީ ކުރިއަށް ގެންގޮސްފައެވެ. މީގެ އިތުރުން އިންޑިއާއިން ރާއްޖޭގައި ކުރިއަށް ގެންދާ ތަރައްޤީގެ މަޝްރޫއުތައް އަވަހަށް ނިންމުމަށާއި، ދިފާޢީ އަދި ސަލާމަތީ ކަންކަމާއި ވިޔަފާރިއާއި އިންވެސްޓްމަންޓްގެ ދާއިރާތަކުން އެއްބާރުލުން އިތުރުކުރުމާ ބެހޭގޮތުން މަޝްވަރާކުރައްވާފައިވެއެވެ.
މީގެ އިތުރުން އެ ދަތުރުފުޅުގައި ރާއްޖެއާއި އިންޑިއާގެ ހައިލެވެލް ކޯ ގްރޫޕްގެ ދެވަނަ ބައްދަލުވުން ވަނީ ބާއްވާފައެވެ.
މިހައިލެވެލް ކޯ ގްރޫޕުގެ ބައްދަލުވުން ތަކަކީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިންޑިއާއަށް ކުރެއްވި ފުރަމާނަ ދަތުރުފުޅުގެ ތެރެއިން ދެ ޤައުމު ދެމެދު އެކުލަވާލެވުނު ތަޞައްވަރު، ’އަ ވިޝަން ފޮރ ކޮމްޕްރިހެންސިވް އިކޮނޮމިކް އެންޑް މެރިޓައިމް ސެކިއުރިޓީ ޕާރޓްނަރޝިޕް‘ ގެ ތެރެއިން އުފެދިފައިވާ އަދި މި ތަޞައްވަރުގެ އެންމެހައި ކަންކަންކުރިއަށް ގެންދިއުމާގުޅޭ މަޝްވަރާ ބައްދަލުވުން ތަކެކެވެ.
