އެމްޑީޕީގެ ޗެއަރޕާޝަން ކަމުން ފައްޔާޒު އިސްތިއުފާ ދޭނެ ކަމަށް ކުރިން ބުނި ނަމަވެސް މިހާރު އިސްތިއުފާ ނުދޭނެ ކަމަށް ޕާޓީ ލީޑަރ ސިޕަށް އެންގުމުން މައްސަލަ ހޫނުވެއްޖެ އެވެ.
މައުލޫމާތު ލިބިފައިވާ ގޮތުގައި އޯގަސްޓް މަހު ބޭއްވުމަށް ހަމަޖެހިފައިވާ އެމްޑީޕީ އާދަޔާ ހިލާފް ކޮންގްރެސްގެ ކުރިން ފައްޔާޒު އިސްތިއުފާ ދޭނެ ކަމަށް ކުރިން އޮތީ އެއްބަސްވެފަ އެވެ. އެހެންނަމަވެސް ޕާޓީގެ އެތެރޭގެ ކޯޅުން ބޮޑުވެ ފައްޔާޒު މިހާރު ވަނީ އިސްތިއުފާ ނުދޭނެ ކަން ރައީސް އިބޫއަށް ވެސް އަންގާފަ އެވެ.
އެމްޑީޕީގެ ތެރޭގައި ދެތިން ހަތަރު ފެކްޝަނެއް އޮތް ކަމުގައި ވީ ނަމަވެސް ނަން ހިނގާ އަދި ޕާޓީގެ އިންތިޚާބީ މަގާމުތަކުގެ ކޮންޓްރޯލް އޮތީ ހަމައެކަނި މިހާރުގެ ޗެއާޕާސަން ފައްޔާޒުގެ ފެކްޝަނާއި ކުރީގެ ރައީސް އިބޫ ސޯލިހުގެ ފެކްޝަނަށް އެކަންޏެެވެ. ޝާހިދު އާއި އާދަމް އާޒިމްގެ ފެކްޝަނެއް އޮތް ނަމަވެސް ހަގީގީ ބާރުވެރިކަމެއް މިދެ ފެކްޝަނެއްގައި އަދިއެއް ނެތެވެ.
ފައްޔާޒު ފެކްޝަނުން އިބޫ ފެކްޝަނާއި ދިމާލަށް ކޮރަޕްޝަންގެ އިނގިލި ދިއްކުރާއިރު، އިބޫ ސޯލިހުގެ ފެކްޝަނަކީ ނިމިދިޔަ ސަރުކާރުގައި ބޮޑެތި ޚިޔާނާތުގެ އެތައް ކަމެއް ހިންގާ ދައުލަތް ދަރުވާލުމުގައި އިސް ރޯލެއް ކުޅުނު ވަގުންގެ ޓީމު ކަމަށް ފައްޔާޒުގެ ފެކްޝަނުން ތުޙުމަތު ކުރެއެވެ. ހަގީގަތުގައި ދެ ފެކްޝަނުގައި ވެސް ތިބީ ނިމިދިޔަ ސަރުކާރުގައި ނާޖާއިޒު އެތައް ފައިދާތަކެއް ހޯދާ ގާނޫނުތަކާއި ގަވާއިދުތައް ބޮލާލައި ޖަހާ ހިތުހުރި ގޮތަކަށް ކަންކަން ކޮށްފައި ތިބި ބައެކެެވެ.
އެމްޑީޕީގެ ތެރޭގައި ޗެއާޕާސަން ފައްޔާޒު ކަންކަން ހިންގާ ގޮތާއިމެދު ހިތްހަމަނުޖެހޭކަން ވަރަށް ފާޅުކަން ބޮޑު ގޮތެއްގައި އިބޫ ސޯލިހުގެ ފެކްޝަނުން އަންނަނީ ބުނަމުންނެވެ. މިދިޔަ އާދީއްތަ ދުވަހު އާންމުވި ވީޑިއޯއެއް ގައި އިބޫ ސޯލިހުގެ ޅިޔަނެއް ކަމަށްވާ އަލިފުށީ ދައިރާގެ ރައީސް ބިގޭ ފައްޔާޒާއި މެދު ހިތްހަމަނުޖެހޭ އެތައް ކަމެއް ހުރި ކަމަށް ބުނާ ވީޑިއޯއެއް ވަނީ ވައުރަލް ވެފައެވެ. މިއަދު އިބޫ ސޯލިހުގެ ކޮއްކޮ އަދި އެމްޑީޕީގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒު ވަނީ ނަޝީދު އަށް ހޫނު ބަހުގެ ހަމަލާއެއް ސޯޝަލް މީޑިއާ އެކްސް ގައި ދީފައެވެ. އިރުކޮޅެއް ފަހުން ޑިމޮކްރެޓްސްގެ މެންބަރު ވައްޑެ ވަނީ އަލީ ނިޔާޒުގެ ވާހަކަތަކަށް ރައްދު ދީފައެވެ. އެމްޑީޕީ ރޫޅާލަން ޖެހުނީ ކީއްވެކަން ބުނެފައެވެ.
