އިސްރާއީލުން އީރާނަށް ދިން ހަނގުރާމަވެރި ހަމަލާ ކުށްވެރިކޮށް، އެއީ ”އިންސާނިއްޔަތާ ދެކޮޅު ކުށެއް“ ކަމަށް ބުނެ، އިސްރާއީލަކީ ސުލްހައަށް އޮތް “ކެންސަރެއް“ ކަމަށާއި، ދުނިޔޭގެ ސަލާމަތުގެ މައިގަނޑު ކުށްވެރިޔާކަމަށް އުތުރު ކޮރެއާއިން ބުނެފިއެވެ.
ބުރާސްފަތި ދުވަހު އެ ގައުމުގެ ސަރުކާރުގެ ސީއެންސީއޭ މެދުވެރިކޮށް ނެރުނު ބަޔާނެއްގައި، އުތުރު ކޮރެއާގެ ފޮރިން މިނިސްޓްރީގެ ތަރުޖަމާނެއް ވިދާޅުވީ، އިރާނުގެ މަދަނީ، ނިއުކްލިއަރ އަދި ހަކަތައިގެ ތަންތަނަށް އިސްރާއީލުން ދިން ހަމަލާތަކާމެދު އެ ގައުމުން ވަރަށް ބޮޑަށް ކަންބޮޑުވެފައިވާ ކަމަށާއި އެކަން ހަރުކަށި އިބާރާތުން އެކަން ކުށްވެރިކުރާ ކަމަށެވެ. އަދި މެދުއިރުމަތީގެ ހަލަބޮލި ސަރަހައްދުގައި ފުޅާ ދާއިރާއެއްގައި ހަނގުރާމައެއް ފެށިދާނެކަމުގެ އިންޒާރު އޭނާ ވަނީ ދީފައެވެ.
ތަރުޖަމާނު ވިދާޅުވީ އިސްރާއީލުގެ ހަމަލާތަކުގައި މަދަނީން މަރުވުމަކީ މާފުނުކުރެވޭނެ އިންސާނިއްޔަތާ ދެކޮޅު ކުށެއް ކަމަށެވެ. އަދި އެ ސަރަހައްދުގައި ”އާ ފުރިހަމަ ހަނގުރާމައެއް“ ފެށުމުގެ ރިސްކު އިތުރުކުރަމުންދާ “ދައުލަތުން ރޭވިގެން ހިންގާ ޓެރަރިޒަމް“ގައި އިސްރާއީލުން ބައިވެރިވަމުންދާ ކަމަށް ތުހުމަތުކުރައްވާފައިވެއެވެ.
އުތުރު ކޮރެއާއިން ވަނީ އެމެރިކާ އާއި ޔޫރަޕުގެ ގައުމުތަކަށްވެސް އިތުރަށް އެކަމުގައި ބައިވެރިނުވުމަށް އިންޒާރު ދީފައެވެ.
”މިހާރު ދުނިޔެއަށް ފެންނަމުންދާ ނުރައްކާތެރި ހާލަތުން ސާފުކޮށް ދައްކުވައިދެނީ އެމެރިކާ އާއި ހުޅަނގުގެ އެހީތެރިކަމާއި ހިމާޔަތް ލިބިގެން އިސްރާއީލަކީ މެދުއިރުމަތީގެ ސުލްހައަށް ކެންސަރެއް ފަދަ ގޮތަކަށް، އިސްރާއީލަކީ ދުނިޔޭގެ ސުލްހަ އާއި ސަލާމަތް ނައްތާލުމުގެ މައިގަނޑު ކުށްވެރިޔާކަން،“ ފޮރިން މިނިސްޓްރީގެ ތަރުޖަމާނު ވިދާޅުވިއެވެ.
”ޝިކާރައަކަށްވެފައިވާ އިރާނުގެ ޤާނޫނީ ސިޔާދަތީ ހައްޤާއި އަމިއްލަ ދިފާއުގެ ހައްޤު ބޭނުންކުރުމާމެދު މައްސަލަ ޖައްސައި، ހަނގުރާމައިގެ އަލިފާން ރޯކުރަމުންދާ އެމެރިކާ އާއި ހުޅަނގުގެ ބާރުތަކަށް ބައިނަލްއަޤްވާމީ މުޖުތަމައުއިން ވަރަށް ގާތުން ބަލަމުންދޭ،“ އޭނާ އިތުރުކުރެއްވިއެވެ.
އުތުރު ކޮރެއާއިން މި ބަޔާން ނެރެފައި ވަނީ އެމެރިކާގެ ރައީސް ޓްރަމްޕް އިރާނާމެދު ”ކެތްތެރިކަން ހުސްވެއްޖެ“ ކަމަށް ވިދާޅުވުމަށްފަހުއެވެ.
އުތުރު ކޮރެއާއިން އެމެރިކާއަށް އިންޒާރުދީ ބުނެފައިވަނީ އެމެރިކާ އާއި އެގައުމުގެ އެކުވެރިންގެ ޢަމަލުތަކުން ”މެދުއިރުމަތީގެ ހާލަތު ކޮންޓްރޯލް ނުކުރެވޭ ކާރިސާގެ މަރުހަލާއަކަށް“ ގެންދަމުންދާ ކަމަށެވެ.
