ހަމާލާދިން އިރު އިރާނުގެ ނިއުކްލިއަރ ސައިޓްތަކުގައި ރޭޑިއޭޝަން ކުރުވާފަދަ މާއްދާއެއް ނެތްކަމަށް ދައުލަތުގެ މީޑިއާއިން ބުނެފިއެވެ.
އިރާނުގެ ދައުލަތުގެ ނޫސް އެޖެންސީ އައިއާރްއެންއޭ އިން ބުނެފައިވާ ގޮތުގައި، އެމެރިކާއިން ވާގިވެރިވެ އިސްރާއީލުން ހަމަލާދިން ކަމަށް ބުނާ ނިއުކްލިއަރ ސައިޓްތަކުގައި ރޭޑިއޭޝަން ކުރުވާފަދަ އެއްވެސް މާއްދާއެއް ނެތެވެ.
”މި ތިން ނިއުކްލިއަރ ސައިޓުގައި ރޭޑިއޭޝަން ކުރުވާފަދަ އެއްވެސް މާއްދާއެއް ނެތް“ އިރާނުގެ ދައުލަތުގެ ބްރޯޑްކާސްޓަރުގެ އިސް އޮފިޝަލަކު ވިދާޅުވިއެވެ.
މި ބަޔާނުން ދޭހަވާ ގޮތުގައި، ހަމަލާ ދިނުމުގެ ކުރިން އިރާނުގެ އިސްވެރިން އެ ސައިޓްތަކުގައި ހުރި އެންރިޗްޑް ޔުރޭނިއަމް އެހެން ތަނަކަށް ބަދަލުކޮށްފައިވުމަކީ އެކަށީގެންވާ ކަމެކެވެ.
ޔަހޫދީންނަށް ވާގިވެރިވާ އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނުގެ ތިން ނިއުކްލިއަރ މަރުކަޒަށް އެމެރިކާގެ އަސްކަރިއްޔާއިން ހަމަލާދީފައިވާ ކަމަށް އިއުލާނު ކޮށްފައެވެ. މި ހަމަލާ އަމާޒުކުރެވުނީ ފޯރުދޯ، ނަތަންޒް އަދި އިސްފަހަން ނިއުކްލިއަރ މަރުކަޒުތަކަށެވެ.
އަނިޔާވެރި ރައީސް ޓްރަމްޕްގެ ބަޔާނުގައި ބުނި ގޮތުގައި، ފޯރުދޯ މަރުކަޒަށް ހަމަލާދިނުމަށް 14 ޓަނުގެ ޖީބީޔޫ-57 ބޮމުގެ ގިނަ އަދަދެއްގެ ބޮން ވަނީ އަޅާފައެވެ. އަދި މި އޮޕަރޭޝަނުގައި ބައިވެރިވި ހުރިހާ ޖެޓް މަތިންދާބޯޓުތަކެއް ވަނީ އީރާނުގެ ވައިގެ ސަރަހައްދުން ރައްކާތެރިކަމާއެކު ނިކުމެފައިވާ ކަމަށް އޭނާ ބުންޏެވެ.
މި ހަމަލާއާ ގުޅޭގޮތުން ވާހަކަދައްކަވަމުން ރައީސް ޓްރަމްޕް ބުނީ، ”އެމެރިކާގެ އަސްކަރިއްޔާ ފިޔަވައި މި ވަރުގެ ހަމަލާއެއް ދެވޭނެ އިތުރު އެއްވެސް އަސްކަރިއްޔާއެއް ދުނިޔޭގައި ނުހުންނާނެ“ ކަމަށެވެ. އަދި މިއީ ސުލްހައިގެ ފެށުން ކަމަށްވެސް އޭނާ ވަނީ ސިފަކޮށްފައެވެ.
