މިއީ އަހުރެންގެ ގޮވެލިފައްޗެއް ނޫނެވެ. މިއީ އިޒުރޭލުގެ ޔަހޫދީންގެ މިއަދުގެ އަޑެވެ. އިޒުރޭލުން ވަނީ އެ ޤައުމުގެ އާބާދީގެ ދެބައިކުޅަ އެއްބައި މީހުން ރައްކާތެރި އެހެން ތަންތަނަށް ގެންގޮސްފައެވެ. އީރާނުން އިޒުރޭލާއި ދެކޮޅަށް ކުރަމުން ދިޔަ ހަނގުރާމަ ހުއްޓާލުމަށް އެދި ހުށަހެޅީ އިޒުރޭލުންނެވެ. ހަނގުރާމަ ހުއްޓާލުމަށް އިޒުރޭލުން އެދުނު އެދުމަށް އީރާނުން އެއްބަސްވާކަން އެ ޤައުމުން ވަނީ ހާމަކޮށްފައެވެ. އެކަމަކު، ޔަހޫދީންނަކީ އަހުދާއި ޚިލާފުވުމުގެ ދިގު ތާރީޚެއް އޮތް ބަޔަކަށް ވާތީ، އީރާނުގެ އަސްކަރިއްޔާ އަބަދުވެސް އޮންނާނީ ތައްޔާރަށް ކަމަށް، އެ ޤައުމުން ބުނެފައިވެއެވެ. ދެ ޤައުމުގެ މެދުގައި މެދުވެރިއެއްގެ ބައި އަދާކުރަން ޓުރަމްޕް ވަނީ އެއްބަސްވެފައެވެ. އީރާނުން ހަނގުރާމަ ހުއްޓާލުމަށް އެއްބަސްވީ ވަރަށް ވަރުގަދަ ޝަރުތުތަކަކާ އެކުގައެވެ.
ހަނގުރާމަ ހުއްޓާލުމަށް އީރާނުން ހުށަހެޅި ޝަރުތުތައް ޔަހޫދީންނަށް އެހާ ފަސޭހައިން ބަލައިނުގަނެވޭ ކަމުން، މި ހަނގުރާމަ މާ އަވަހަށް ނިމޭނެ ހެނެއް ހިޔެއް ނުވެއެވެ. މި ޝަރުތުތަކުގެ ތެރޭގައި އިޒުރޭލުގެ ސިފައިން ޣައްޒާއިން އެއްކޮށް ފޭބުމާއި، ޣައްޒާއަށް އަޅާފައިވާ ދަތިކުރުމުގެ ފިޔަވަޅުތައް އުވާލުމާއި، ޣައްޒާ އަލުން އާރާސްތުކުރުމާއި، ލުބުނާނުން ފޭބުން ހިމެނެއެވެ. މިކަންކަމަށް ވުރެ، އީރާނާއި އެމެރިކާއާ ދެމެދު ބާކީ ހުރި މައްސަލަތައް ހައްލުވެގެން ދިއުމަކީ ނަތަންޔާހޫގެ ސިޔާސީ ޙަޔާތް ކަފުންކޮށް ވަޅުލެވި، ޚުދު ސިޙުޔޫނީ ދައުލަތް ވެއްޓިދާނެ ކަމެކެވެ.
ވަރަށް އަވަހަށް ޤަތަރުގެ ދޯހާގައި ކުރެވޭ ސިއްރު މަޝްވަރާތަކުގެ ޙަޤީޤަތްތައް ހާމަވެ، އެމެރިކާއާއި ސިހުޔޫނީ ދައުލަތުން ފެށި ހަނގުރާމަ، އޭގެ އަމާޒުތަކަށް ވާސިލުނުވެ ނިންމާލަން މަޖުބޫރުވި ގޮތް އެންމެންނަށް އެނގޭނެއެވެ.
ޝައްކެއްވެސް ނެތްގޮތުގައި، ރޭ ޤަތަރުގައި ހުންނަ އެމެރިކާގެ އަސްކަރީ މަރުކަޒަކަށް އީރާނުން ދިން ހަމަލާއަކީ އެމެރިކާގެ ނަޒަރިއްޔާ ބަދަލުކުރުމުގައި މުހިންމު ދައުރެއް އަދާކުރި ކަމެކެވެ. 10 އަހަރު ވަންދެން ޔަހޫދީން ރާވަމުން ދިޔަ ރޭވުން، 12 ދުވަސް ފަހުން އެކަން ކުރިއަށް ގެންދެވޭނެ ހިތްވަރު ނެތި، މިގޮތަށް ހަނގުރާމަ ނިމިގެން ދިއުމަކީ، އެއީ ސިހުޔޫނީންނަށް ލިބޭ ވަރަށް ބޮޑު ހިތާމައެކެވެ. ވޭނެކެވެ.
ހަނގުރާމައިގެ ހަމައެކަނި މަޤުޞަދަކީ އީރާނުގެ ވެރިކަން ބަދަލުކުރުމެވެ. އެމެރިކާއާއި ޔަހޫދީންނަކަށް އެކަމެއް ހާސިލެއް ނުކުރެވުނެވެ. އީރާނުގެ ރަސްކަމަށް އިސްވާން ވެގެން ފުށްޖަހާ ލިޕްސްޓިކް ޖަހަމުން ދިޔަ، ރެޒާ ޕަހެލަވީގެ ހުވަފެންތައް ސައިބޯނި ބޮތްކެތްހެން ފަޅައިގެން ދިޔައީއެވެ. މީގެ މާނައަކީ އިޒުރޭލާއި އެމެރިކާ ބަލިވެ، ލަދުން ފަހަތަށް ޖެހުނީއެވެ.
އިޒުރޭލުގެ ދިފާޢީ ނިޒާމާ ބެހޭގޮތުން އަޑުގަދަކޮށް ވާހަކަ ދައްކާ، އިސްލާމީ ދުނިޔޭގެ ޤައުމުތަކަށް ދެއްކި ބިރާއި، އުފެއްދި ދޮގު ވަހުމު ފަޅާއަރައި، އެ ދޮގު ވަހުމު ފުނޑު ފުނޑުވެގެން ދިޔައީއެވެ. އެހެންކަމުން އިޒުރޭލު ހުތުރު ބައްޔަކުން ބަލިވީއެވެ!
އީރާނަކީ ހިތްވަރުގަދަ ޤައުމެއްކަން ސާބިތުވި ނަމަވެސް، އީރާނުގެ ޖާސޫސީ ނެޓްވޯކާއި ވައިގެ ސިފައިން އިންތިހާއަށް ބަލިކަށިކަން ސާބިތުވެ، އެކަމުގެ ސަބަބުން އީރާނަށް ބޮޑެތި ގެއްލުންތަކާއި މާލީ ގެއްލުންތަކެއް ލިބުނެވެ.
މި ހަނގުރާމައިން ލިބުނު ފިލާވަޅަކީ، ކާމިޔާބީއާއި ބަލިވުމާ ދެމެދު އޮތް ހަމައެކަނި ހުރަހަކީ އަހުރެމެން ގަންނަ ”ބިރެވެ.“ އީރާނަކީ ދުޝްމަނުންނާ އަޅާބަލާއިރު ނިސްބަތުން ބަލިކަށި ޤައުމެއްކަމުގައި ވިޔަސް، އީރާނުން ސާބިތުކޮށްދީފައިވަނީ ބިރުގެ ކުރިމަތީގައި ކުޑަކަކޫ ނުޖަހާނެ ކަމެވެ.
