ލ. ގަމުގައި މިއަދު ހިނގި އެކްސިޑެންޓެއްގައި އަނިޔާވި ދެ އަންހެނުންގެ ހާލު ސީރިއަސް ކަމަށް ގަމު ރީޖަނަލް ހޮސްޕިޓަލުން މައުލޫމާތު ދީފިއެވެ.
ފުލުހުން މިއަދު ބުނީ މިއަދު 9:12 އެހާކަންހާއިރު ލ. ފޮނަދޫން ގަމަށް ދަތުރުކުރި ސައިކަލެއް، މާމެންދޫން ގަމަށް އަރާ ބެންޑުގައި ހުރި ހޮޅިދަނޑިއެއްގައި ޖެހި އެކްސިޑެންޓް ވެފައިވާ ކަމަށެވެ.
އެކްސިޑެންޓުވި ސައިކަލުން ދަތުރުކުރަމުންދިޔަ ދެ އަންހެނުންނަށް އަނިޔާވުމުގެ ސަބަބުން ލ. ގަން ރީޖަނަލް ހޮސްޕިޓަލަށް ގެންގޮސްފައިވާ ކަމަށެވެ.
އެ ހޮސްޕިޓަލުގެ ސީއީއޯ އަބްދުލް ހަނާން އަބްދުއްރަހީމް ”ވަން“ އަށް މިއަދު ވިދާޅުވީ އަނިޔާވި ދެ އަންހެނުންގެ ހާލުވެސް ސީރިއަސް ކަމަށެވެ. އޭގެ ތެރެއިން އެކެއްގެ އޮޕަރޭޝަނެއް މިހާރުވެސް ކުރަމުން އަންނަ ކަމަށެވެ.
ދެން އަނިޔާވި މީހާއަށްވެސް އަވަސް ފަރުވާ ދެމުން އަންނަކަމަށް ހަނާން ވިދާޅުވިއެވެ.
އޭނާ ވިދާޅުވީ އެ ދެ އަންހެނުންނަށް ލިބިފައިވާ އަނިޔާގެ ތަފުސީލެއް އަދި ލިބިވަޑައިގެންފައި ނުވާ ކަމަށެވެ.
ފުލުހުން އަންނަނީ މި އެކްސިޑެންޓުގެ މައްސަލަ ތަހުގީގު ކުރަމުންނެވެ.
