ކަންފަތަށް ދިރޭ އެއްޗެއް ވަނުމަކީ، ޚާއްޞަކޮށް ހޫނު މޫސުމުގައި ނުވަތަ ނިދުމުގެ ތެރޭގައި، ގިނަ ފަހަރު ދިމާވާ ކަމެކެވެ. މިއީ މީހުން އަންދާޒާކުރާ ވަރަށްވުރެ އާއްމު ކަމެކެވެ. އެކި މީހުންގެ ކަންފަތަށް އެކިފަހަރު ވަންނަނީ އެކި ކަހަލަ ދިރޭ އެއްޗެއްސެވެ. އެގޮތުން ކުރައްޕަކީވެސް އިންސާނުންގެ ކަންފަތައް ވަދެ ނުކުމެ އުޅޭ އެއްޗެކެވެ.
ކަންފަތަށް ދިރޭ އެއްޗެއް ވަނުމަކީ އާދައިގެ ކަމެކެވެ. ހޫނު، އަނދިރި އަދި ތެތް ތަންތަނަކީ ދިރޭ ތަކެތި ޝައުގުވެރިވާ މާހައުލުތަކެވެ. ކަންފަތުގެ އެތެރެއަކީ ހަމަ އެފަދަ ތަނެކެވެ. ރޭގަނޑު ބިމުގައި، ފާރު ކައިރީގައި ނުވަތަ ބިންގަނޑު ކައިރީގައި ނިދާނަމަ، ދިރޭ އެއްޗެއް ކަންފަތުގެ ތެރެއަށް ވަނުމުގެ ފުރުސަތު ބޮޑުވެއެވެ. އަދި ރީތި ކޮޓަރިއެއްގައި ނިިދާނަމަވެސް މިފުރުސަތަކީ ނެތްފުރުސަތެކޭ ނުބުނެވޭނެއެވެ.
ކަންފަތަށް ދިރޭއެއްޗެއް ވަދެއްޖެނަމަ ތިރީގައިވާ ކަހަލަ އަލާމާތްތައް ފެނިދާނެއެވެ:
. ވަރަށް ބޮޑަށް ތަދުވުން ނުވަތަ ވޭނެއް އިޙްސާސްވުން.
. ކަންފަތުގެ އެތެރޭގައި އެއްޗެއް ހިރުވުން ނުވަތަ ދުވެހެލޭ ކަހަލަ އިޙްސާސެއްވުން.
. ގުޑުގުޑުއަޑު ޒާތުގެ އަޑު އިވުން.
. އަޑުއިވުން ކުޑަވުން ނުވަތަ އަޑުތައް ރަނގަޅަށް ނީވުން.
. ބައެއް ފަހަރު ލޭ އައުން ނުވަތަ ދިޔާ އެއްޗެއް ބޭރުވުން.
މިފަދަ ހާލަތެއް ދިމާވެއްޖެނަމަ އަޅަންވީ ފިޔަވަޅުތަކަށް ސަމާލުވުން މުހިއްމެވެ. ކަންފަތަށް އެއްޗެއް ވަދެއްޖެނަމަ، ކަންފަތް ސާފުކުރާ ބުރު ނުވަތަ އިނގިލި ބޭނުންކޮށްގެން އެ އެއްޗެއް ނެރެން މަސައްކަތްކުރުމުން ދުރުހެލިވާށެވެ. އެގޮތަށް ކަންތައް ކޮށްފިނަމަ އެ އެއްޗެއް އިތުރަށް އެތެރެއަށް ވަދެދާނެއެވެ. މިފަދަ ހާލަތެއްގައި ތިރީގައިވާ ކަންކަން ކުރުން މުހިންމެވެ:
. ހަމަޖެހިލާށެވެ. އަދި ދިރޭ އެއްޗެއް ވަދެފައިވާ ކަންފަތް ބިމާ ދިމާލަށް ވާނެހެން ބޯ އަނބުރާލާށެވެ.
. ލިބެން ހުރިނަމަ، ކަންފަތަށް ތެޔޮ، ބޭބީ އޮއިލް، ނުވަތަ ސެލައިން އަޅާށެވެ. މިކަމުގެ ސަބަބުން ދިރޭ އެއްޗެއް މަރުވެ ނުވަތަ ނުކުންނަން މަގުފަހިވާނެއެވެ.
. އެހީތެރިކަމަށް ޑޮކްޓަރެއްގެ ގާތަށް ވަގުތުން ދާށެވެ. ކަންފަތުގެ ޚާއްސަ ޑޮކްޓަރުންނަށް ރައްކާތެރިކަމާއެކު އެ އެއްޗެއް ނެރެދެވޭނެއެވެ.
ކަންފަތަށް ދިރޭއެއްޗެއް ވަދެއްޖެނަމަ ނުކުރަންވީ ކަންކަން:
. ކަންފަތުގެ ތެރެއަށް އެއްވެސް ތޫނު އެއްޗެއް ނުލާށެވެ.
. އެތެރޭގައި ހުރި ދިރޭ އެއްޗަކީ ދިރިހުރި އެއްޗެއްތޯ ނުވަތަ މަރުވެފައިވާ އެއްޗެއްތޯ ނޭނގި ފެން ނާޅާށެވެ. ފެން އެޅުމުގެ ސަބަބުން އެ އެއްޗެއް ބިރުގަނެ، އިތުރަށް އެތެރެއަށް ދިއުމަށް މަސައްކަތްކޮށްފާނެއެވެ.
ކަންފަތަށް ދިރޭ އެއްޗެއް ވަދެދާނެކަމީ ޙަޤީޤަތެކެވެ. އެހެންކަމުން ސާފުތާހިރުކަމަށް ސަމާލުކަންދީ، އަދި މިފަދަ ހާލަތެއް ދިމާވެއްޖެނަމަ ރައްކާތެރިކަމާއެކު އަމަލުކުރުމަކީ ވަރަށް މުހިންމު ކަމެކެވެ. އަބަދުވެސް މިފަދަ ކަންކަމުގައި ޑޮކްޓަރެއްގެ އެހީ ހޯދުމަކީ އެންމެ ރަނގަޅު ގޮތެވެ.
