މައްސަލަ ޙައްލުކޮށް މާލެއާއި ހުޅުމާލޭގެ އެކި ސަރަހައްދުތަކަށް ކަރަންޓު ދޭން ފަށައިފިއެވެ.
ސްޓެލްކޯއިން ބުނީ، މާލެއާއި ހުޅުމާލޭގެ އެކި ސަރަހައްދުތަކަށް ކަރަންޓުގެ ޚިދުމަތް ދޭން މިހާރު ފަށާފައިވާކަމަށެވެ. އަދި ބައެއް ސަރަހައްދުތަކަށް މިހާރު ކަރަންޓު ލިބިފައިވާކަމަށްވެސް އެކުންފުނިން ބުނެފައިވެއެވެ.
އެގޮތުން ހުޅުމާލެ ފޭސް 1ގެ ހުރިހާ ސަރަހައްދަކަށް ކަރަންޓު މިހާރު ދީފައިވާކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ވަނީ ބުނެފައެވެ. އަދި ފޭސް 2 ގެ ބައެއް ސަރަހައްދުތަކަށާއި، މާލޭގެ އެކި ސަރަހައްދުތަކަށްވެސް ސްޓެލްކޯއިން ވަނީ އަލުން ކަރަންޓުގެ ޚިދުމަތް ދީފައެވެ.
މިއަދު ހެނދުނު 9:30 ހާއިރު މާލެއާއި ހުޅުމާލެއިން ކަރަންޓު ކެނޑުނީ ޓެކްނިކަލް މައްސަލައެއް ދިމާވެގެން ކަމަށް ސްޓެލްކޯއިން ހާމަކޮށްފައިވެއެވެ. އަދި އެމައްސަލަ ބަލަމުން ދާކަމަށް އެ ކުންފުނިން މަޢުލޫމާތު ދިނެވެ.
މުޅި މާލެއިން ކަރަންޓު ކެނޑުމާއި ގުޅިގެން ރައްޔިތުންނަށް ދިމާވި ދަތިތަކަށް ސްޓެލްކޯއިން ވަނީ މަޢާފަށް އެދިފައެވެ. އަދި ވީހާވެސް އަވަހަކަށް ހުރިހާ ސަރަޙައްދުތަކަށް ކަރަންޓުގެ ޚިދުމަތް އަނބުރާ ގެނައުމަށް މަސައްކަތްކުރަމުންދާ ކަމަށް އެ ކުންފުނިން ބުނެފައިވެއެވެ.
