ވެލިދޫ ދާއިރާގެ މެންބަރު މުޙައްމަދު އައްބާސް، ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ 14 ވަރަކަށް މެންބަރުން ޕާޓީ ދޫކޮށްލަން ތައްޔާރަށް ތިބިކަމަށް ވިދާޅުވެ ދެއްކެވި ވާހަކަފުޅުތަކަކީ ހަގީގަތާ ހިލާފު ދޮގެއްކަން ހާމަވެފައިވާއިރު، ގިނަ ބަޔަކު ދަނީ އައްބާސްގެ ސިޔާސީ ހަގީގަތް ހާމަކުރަމުންނެވެ. އެންމެ ފަހުގެ ރައްޔިތުންގެ މަޖިލީހުގެ އިންތިހާބުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފޮޓޯފުޅާއެކު “އަހަރުމެންގެ މީހާ” މި ޝިއާރު ޖަހައިގެން، އެމަނިކުފާނުގެ މަގުބޫލުކަމުގެ ހިޔަލުގައި މަޖިލިސް ގޮނޑި ކާމިޔާބު ކުރެއްވުމަށްފަހު، މިހާރު ސަރުކާރާ ދެކޮޅު ހަރަކާތްތަކެއް ހިންގަވަން ފެއްޓެވުމުން އައްބާސްގެ ހަޤީޤަތް މިއޮތީ ވަރަށް ސާފުކޮށް ރައްޔިތުންގެ ކުރިމަތީގައި ބޭޒާރުވެފައެވެ.
އައްބާސް “އެކްސް” ގައި ކުރެއްވި ޕޯސްޓެއްގައި ވިދާޅުވީ ޕީއެންސީގެ ޕާލިމެންޓަރީ ގްރޫޕްގެ ބައްދަލުވުމެއްގައި ގިނަ މެންބަރުންތަކެއް ސަރުކާރުގެ ސިޔާސަތުތަކާ މެދު ކަންބޮޑުވުން ފާޅުކުރެއްވި ކަމަށެވެ. އަދި ރަށްރަށުގެ ތަރައްގީގެ މަޝްރޫއުތައް ނުހިނގާ ކަމަށާއި، މެންބަރުންގެ މަޝްވަރާ ނެތި ކަންކަން ނިންމާ ކަމުގެ ޝަކުވާތައް ބައެއް މެންބަރުން ކުރެއްވި ކަމަށްވެސް އޭނާ ތުހުމަތު ކުރެއްވިއެވެ. މި ވާހަކަތައް އައްބާސް ދައްކަވާފައި މިވަނީ، ކައުންސިލްތައް ޒިންމާދާރު ކުރުވުމަށް ސަރުކާރުން ހުށަހެޅި ލާމަރުކަޒީ ގާނޫނަށް އިސްލާހު ގެނައުމުގެ ބިލް މަޖިލީހުން ފާސްކުރި ދުވަހުއެވެ. އެއީ ސަރުކާރުގެ މެޖޯރިޓީއިން ރައްޔިތުންނަށް ފައިދާހުރި ކަމެއް ކުރުމަށް ފާސްކުރި ބިލެކެވެ.
ނަމަވެސް، އައްބާސްގެ މި ވާހަކަތަކަކީ އެއްވެސް އަސްލެއް ނެތް ދޮގު ވާހަކަތަކެއްކަން ޕީއެންސީގެ އިސް ސަފުގައި ހިމެނިވަޑައިގަންނަވާ ގިނަ މެންބަރުން ވަނީ ކަށަވަރުކޮށްދެއްވާފައެވެ. މިކަމާ ގުޅިގެން ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ ވިދާޅުވީ، އެ ބައްދަލުވުމުގައި އެމަނިކުފާނުވެސް ބައިވެރިވެވަޑައިގެންނެވި ކަމަށާއި، އައްބާސް ފަތުރަނީ ކަނޑައެޅިގެން ދޮގު ޚަބަރުތަކެއް ކަމަށެވެ. އަދި “މިހެން ފަތުރާ ދޮގު ޚަބަރުތަކުން ބައިބައިވާ ވަރަށްވުރެ ޕީއެންސީގެ ޕީޖީ މާ ވަރުގަދަވާނެ” ކަމަށް ވިދާޅުވެ، ޕާޓީގެ އެއްބައިވަންތަކަން ވަނީ ހާމަކޮށްދެއްވާފައެވެ.
ރައީސް ޑރ. މުޢިއްޒު ވެރިކަމަށް ވަޑައިގެންނެވުމަށްފަހު ބޭއްވި 20 ވަނަ ރައްޔިތުންގެ މަޖިލީހުގެ އިންތިހާބުގައި ޕީއެންސީއަށް ވަނީ ތާރީޚީ ސުޕަރމެޖޯރިޓީއެއް ލިބިފައެވެ. 93 ގޮނޑީގެ ތެރެއިން 75 ގޮނޑި ކާމިޔާބުކޮށް، ސަރުކާރު ހިންގާ ޕާޓީއަށް ރައްޔިތުންގެ ފަރާތުން ވަނީ ވަރަށް ވަރުގަދަ އިތުބާރެއް ދީފައެވެ. މި މެޖޯރިޓީއާއެކު، ސަރުކާރުން ރައްޔިތުންނަށް ވެފައިވާ ވައުދުތައް ފުއްދުމަށް ބޭނުންވާ ގާނޫނީ ބާރުވެރިކަން ވަނީ ލިބިފައެވެ. މިފަދަ ވަރުގަދަ މެންޑޭޓެއް ލިބިފައިވާއިރު، މަޖިލިސް މެންބަރަކު މިފަދަ ދޮގު ވާހަކަތައް ފެތުރުމަކީ ރައްޔިތުންގެ އިތުބާރާ ކުޅުމުގެ އިތުރުން، ޤައުމުގެ ހަމަޖެހުން ނަގާލުމަށް ކުރާ މަސައްކަތެއް ކަމުގައި ގިނަ ބަޔަކު ދެކެއެވެ.
ސިޔާސީ މަސްރަހު ދިރާސާކުރާ ފަރާތްތަކުން ފާހަގަކުރާ ގޮތުގައި، އައްބާސް ފަދަ ގިނަ މެންބަރުންނަށް މަޖިލިސް ގޮނޑި ކާމިޔާބު ކުރެވުނީ އެބޭފުޅުންގެ އަމިއްލަ މަގުބޫލުކަމަކުން ނޫނެވެ. އެއާ ހިލާފަށް، އެއީ ރައީސް ޑރ. މުޢިއްޒުގެ ސިޔާސަތުތަކަށާއި، ޤައުމީ ހިމާޔަތުގެ އެޖެންޑާއަށް ރައްޔިތުން ދިން ތާޢީދުގެ ވަޒަނެވެ.
އިންތިޚާބުގެ ކެމްޕޭންގައި އައްބާސްގެ ޕޯސްޓަރުގައި ރައީސް މުޢިއްޒުގެ ފޮޓޯފުޅު ބޭނުންކޮށް “އަހަރުމެންގެ މީހާ” ގެ ގޮތުގައި ސިފަކޮށްފައިވުމުން މިކަން ވަރަށް ރަނގަޅަށް ހާމަވެއެވެ. ވީމާ، ރައީސްގެ ފޮޓޯފުޅު ބޭނުންކޮށްގެން، އެމަނިކުފާނުގެ ނަންފުޅުގައި ރައްޔިތުންގެ ވޯޓު ހޯއްދެވުމަށްފަހު، މިއަދު އަމިއްލަ އެދުމަކަށްޓަކައި ސަރުކާރު ބަލިކަށިކޮށްލުމަށް މަސައްކަތްކުރުމަކީ ރައްޔިތުންގެ އިތުބާރަށް ދެވޭ ބޮޑު ޚިޔާނާތެއް ކަމުގައި ގިނަ ބަޔަކު ދެކެއެވެ.
