މީހަކު މަރަން ބުނެފައެއް ނޯންނާނެ ކަމަށް ވިދާޅުވެ ބައެއް މީޑިއާތަކުން މަސައްކަތް ކުރާ ގޮތުން އެ މީޑިއާގެ މުވައްޒަފުން އުލުބައިންދަން ޖެހޭ ކަމަށް ޕީއެންސީގެ ޕީޖީ ލީޑަރު، އިބްރާހިމް ފަލާހު ދެއްކެވި ވާހަކަ އޭނާ ދިފާއުކޮށްފި އެވެ.
ރައްޔިތުންގެ މަޖިލީހުން ދައުރުން ބޭރުން މިދިޔަ ބުދަ ދުވަހު ބޭއްވި ޖަލްސާގައި މީޑިއާ ބިލަށް ވާހަކަދައްކަމުން ފަލާހު ވިދާޅުވީ އޭނާއާ ގުޅޭ ގޮތުން ބައެއް މީޑިއާތަކުން ދޮގު ހަބަރުތަކެއް މީގެ ކުރިން ފަތުރާފައިވާ ކަމަށާއި އެފަދަ މީޑިއާތައް އުލުބައިންދަންޖެހޭ ކަމަށެވެ.
ފަލާހުގެ މި ވާހަކަތަކާ ގުޅިގެން އެ މައްސަލަ ތަހުގީގުކޮށްދިނުމަށް އެދި ދިވެހި ނޫސްވެރިންގެ ޖަމިއްޔާ (އެމްޖޭއޭ) އިން ވަނީ ފުލުހަށް މައްސަލައެއް ހުށަހަޅާފަ އެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ މަޖިލީހުގައި ފަލާހު ދެއްކެވި ވާހަކަ ތަހުގީގު ކުރުމާމެދު ގާނޫނީ ލަފައެއް ހޯދަން އިއްޔެ ބަންޑާރަނައިބުގެ އޮފީހަށް ހުށަހަޅާފައިވާ ކަމަށެވެ.
”ރައްޔިތުންގެ މަޖިލީހުގެ މެންބަރަކު މަޖިލީހުގެ ތަޅުމުގައި ދައްކާފައިވާ ވާހަކައަކާ ގުޅިގެން މޯލްޑިވްސް ޖާނަލިސްޓްސް އެސޯސިއޭޝަނުން ހުށަހަޅާފައިވާ މައްސަލައެއް ތަހުގީގު ކުރުމާމެދު ގާނޫނީ ލަފައަކަށް އެދި، ދިވެހި ފުލުހުންގެ ހިދުމަތުން 28 އޯގަސްޓު 2025 ވަނަ ދުވަހު، ޕްރޮސެކިއުޓާ ޖެނެރަލްގެ އޮފީހަށް ވާނީ ހުށަހަޅާފަ އެވެ،“ ފުލުހުން ފޮނުވި މެސެޖުގައި ބުންޏެވެ.
ފުލުހުން އެހެން ބުނުމާ ގުޅިގެން އެކްސްގައި ކުރެއްވި ޕޯސްޓެއްގައި ފަލާހު ވިދާޅުވީ އޭނާ ”މީހަކު މަރަން ބުނެފައެއް“ ނޯންނާނެ ކަމަށެވެ.
”އުލުބޭންދުން އަޅުގަނޑުމެން ހިސާބުގައި ބޭނުން ކުރަނީ ބަސްނާހާމީހުން ބިމަށްވުރެ މަތީތާކަށް އެރުވުމަށް،“ ރ. އިންނަމާދުއަށް ނިސްބަތްވެ ވަޑައިގަންނަވާ ފަލާހު ވިދާޅުވި އެވެ.
ފުލުހުން އޭނާގެ ވާހަކަ ތަހުގީގު ކުރުމާ މެދު ގާނޫނީ ލަފައަކަށް އެދުން ފަލާހު ސިފަ ކުރެއްވީ ”ވަރަށް ރަނގަޅު ނިންމެވުމެއް“ގެ ގޮތުގަ އެވެ.
