ދިވެހި ދައުލަތުގެ އެންމެ މަތީވެރިޔާ ރައީސުލްޖުމްހޫރިއްޔާގެ އޮފީސް ކުރިމަތީ ބެރުދުންމާރި ތާޅަފިލި ފުމެ, ލެތް ކުޅުމަކީ މީޑިޔާގެ މިނިވަން ކަމާއި ހިޔާލުފާޅު ކުރުމުގެ ހައްގެއް ނޫންނެވެ.
ހިޔާލުފާޅުކުރުމުގެ ހައްގަކީ އިންސާނީ ތަބީޢީ ސިފައެއް ނަމަވެސް އެކަމަށް ވެސް އުސޫލުތަކަކާއި ހަމަތަކެއް ކަނޑައެޅިފައިވާ ކަމީ ހަގީގަތެވެ.
މިނިވަން މީޑިޔާ އާއި ހިޔާލުފާޅުކުރުމަކީ މުޅި ދައުލަތުގެ ކަރާމަތާއި ގައުމުގެ އިސްތިގްލާލް ގެއްލުވާލުން ކަމަށް ދެވޭނަމަ އެއީ މިނިވަން ކަމެއް ނޫނެވެ.
ޑިމޮކްރަސީގެ ހަތަރު ބާރަކީ މީޑިޔާކަމަށް ވާއިރު, މީޑިޔާއަކީ ވެސް ފެން ހިފޭ ޒިންމާދާރު ބަޔަކަށް ވާންޖެހޭ ކަމީ ހަގީގަތެވެ.
ނޫސްވެރިއަކަށް ވުމަކީ ގައުމުގައި ހެދިފައިވާ ގާނޫނުތަކާއި ގަވައިދުތަކުގެ ބޭރުން އަމަލުކުރެވި ގައުމުގެ އިޖްތިމާއީ ފޭރާން ހަލާކުކޮށް ގައުމުގެ ވެރިންނާއި ކަމުވޮށިގެންވާ ރައްޔިތުންގެ ހައްގުތައް ނިގުޅައިގަތުމަށް ދެވޭ ލައިސެންސެއް ނޫނެވެ.
ރައްޔިތުންނާއި ދައުލަތުގެ ގާނޫނު އަސާސީން މީޑިޔާތަކާއި ނޫސްވެރިންނަށް މަތިކޮށްފައި ވަނީ މާ މަތިވެރި ހައްގުތަކަކާއި ޒިންމާއެކެވެ. އެއީ ދައުލަތު އަނެއް ތިން ބާރަށް ފާރަވެރިވުމުގެ ހައްގުކަމަށް ވާއިރު, ނޫސްވެރިންނަކީ ގަދަރުވެރި ތެދުވެރި އިހްލާސްތެރި އަމާނާތްތެރި ގާނޫނާއި ގަވައިދަށް ކިޔަމަންތެރި ރައްޔިތުންނަށް ނަމޫނާ އަދި ހުދޫދެއްގެ ތެރޭގައި ތިބެއްޖެހޭ ބައެކެވެ.
ސިޔާސީ ހަލަބޮލިކަމުގައި ނޫސްވެރިން ސިޔާސީ އެކްޓިވިސްޓުންގެ ގޮތުގައި ފެނިގެން ދިއުމަކީ ބަލައިގަނެވޭނެ ހަމައެއް ނޫނެވެ. އެއީ މީޑިޔާގެ މިނިވަން ކަމެއް ވެސް ނޫނެވެ.
ގައުމުގައި ދިރިއުޅޭ އެންމެހާ ރައްޔިތުން ދިރިއުޅެންވީ އުސޫލުތަކެއް ގާނޫނު އަސާސީގައި ލިޔެވިފައިވެއެވެ. ދައުލަތުގެ ތިންބާރާއި މުއައްސާސަތަކާއި ގައުމުގެ ވިޔަފާރިތަކާއި އެހެން ތަންތަން މޮނިޓަރ ކުރާނެ ހަމަތަކާއި އުސޫލުތަކެއް ގާނޫނާއި ގަވައިދުތަކުން ކަނޑައަޅައިފައިވެ އެވެ.
ދައުލަތުގެ ހަތަރު ވަނަ ބާރުކަމުގައިވާ މީޑިޔާތައް ވެސް މޮނިޓަރ ކުރާނެ ލިޔެވިފައިވާ ފެން ހިފޭ ގާނޫނަކާއި ގަވައިދެއް ކޮންމެހެން އޮންނަން ޖެހެއެވެ. އެއީ މީޑިޔާގެ ބައެއް ފަރާތްތައް ރުހުނަސް ނުރުހުނަސް ކުރަން ވެއްޖެ ކަމެކެވެ.
