ޝެއިހް ހަސީނާ މެރުމަށް ބަންގްލަދޭޝް ކޯޓަކުން ހުކުމްކޮށްފިއެވެ.
ބަންގްލަދޭޝްގެ ކުރީގެ ބޮޑުވަޒީރު ޝެއިހް ހަސީނާ މެރުމަށް އެ ގައުމުގެ މައުކޯޓުގެ އިސް ފަނޑިޔާރު ހުކުމްކޮށްފައި މިވަނީ ހަސީނާގެ ސަރުކާރު ވެއްޓުމުގެ ކުރީން އެ ގައުމުގައި ހިނގައިދިޔަ ހަމަނުޖެހުންތަކުގެ މައްސަލަ ތަހުގީގުކުރުމަށްފަހު ކަމަށް އޮފިޝަލުންނާ ހަވާލާދީ ރިޕޯޓުތައް ބުނެއެވެ.
ވެރިކަން ވެއްޓުމާއެކު ގައުމު ދޫކުރައްވައި ފިއްލަވައިގެން އިންޑިއާގައި ދިރިއުޅުއްވާ ޝެއިހް ހަސީނާގެ މައްޗަށް ވަނީ އިންސާނިއްޔަތާ ހިލާފު އަމަލު ހިންގި ކަމަށް ސާބިތު ވެ ހުކުމްކޮށްފައެވެ. އެގޮތުން ހަސީނާގެ ވެރިކަމުގެ ފަހުކޮޅު އެ ގައުމުގައި ހިނގައިދިޔަ މުޒާހަރާތައް ކޮންޓްރޯލް ކުރުމަށް އެޅި ފިޔަވަަޅުތަކުގެ ސަަބަބުން 1،400 މީހުން މަރުވެފައިވާކަމަށް ރިޕޯޓުތައް ބުނެއެވެ.
ހުކުމް ކުރަމުން އިސް ފަނޑިޔާރު ވަނީ ހަސީނާއަށް ހައްގުވަނީ 1،400 މަރުގެ ހުކުމް ކަމަށާއި ނަމަވެސް އެއީ އިންސާނުންނަށް ކުރެވޭނެ ކަމެއް ނޫންކަމުން އެއްފަހަރު މަރުގެ އަދަބު ދިނުމަށް އަމުރުކުރާ ކަމަށެވެ.
ހަސީނާގެ އިތުރުން އެ ސަރުކާރުގެ އިންޓީރިއާ މިނިސްޓަރު، އަސަދުއްޒަމާން ހާން ކަމާލްވެސް މެރުމަށް އެކޯޓުން ހުކުމްކޮށްފައިވެއެވެ. ނަމަވެސް ކަމާލްވެސް ވަނީ ގައުމު ދޫކޮށް ފިލައިފައެވެ.
ބަންގްލަދޭޝްގެ ސިޔާސީ މަޝްރަހު އަދިވެސް ހަމަޔަކަށް އެޅިފައި ނުވާއިރު އެ ގައުމުގެ ރިޔާސީ އިންތިހާބު އަންނަ އަހަރުގެ ފެބްރުއަރީ މަހު ބާއްވަން ވަނީ ނިންމައިފައެވެ. އެ އިންތިހާބުގައި ބައިވެރިވުމުގެ އިތުރުން އެއްވެސް ހަރަކާތެއް ބޭއްވުން ހަސީނާގެ އަވާމީ ލީގް ޕާޓީއަށް ވަނީ މަނާކޮށްފައެވެ.
