މި އަހަރުގެ މިހާތަނަަށް ދައުލަތަށް ބޭރު ފައިސާއިން ލިބުނު އާމްދަނީ 39.1 އިންސައްތަ އިތުރުވެފައިވާކަން މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގެ ތަފާސްހިސާބުތަކުން ދައްކައިފިއެވެ.
މީރާގެ ތަފާސްހިސާބުތަކަށް ބަލާއިރު، މިއަހަރުގެ ޖަނަވަރީ މަހުން ފެށިގެން ސެޕްޓެންބަރުގެ ނިޔަލަށް މީރާއަށް 1.1 ބިލިއަން ޑޮލަރު ލިބިފައިވެއެވެ. 2024 ވަނަ އަހަރުގެ އެ މުއްދަތުގައި މީރާއަށް ލިބުނީ 804 މިލިއަން ޑޮލަރެވެ.
އެހެންކަމުން މި އަހަރުގެ އެ މުއްދަތުގައި މީރާއަށް ލިބުނު އާމްދަނީ ނިމުނު އަހަރު ލިބުނު އާމްދަނީއަށްވުރެ 39.1 އިންސައްތަ އިތުރުވެފައިވެއެވެ.
ބޭރު ފައިސާގެ އާމްދަނީގެ ތެރެއިން އެންމެ ބޮޑު ކުރިއެރުމެއް ލިބިފައިވަނީ ޓެކުހުގެ ގޮތުގައި ލިބުނު އާމްދަނީންނެވެ. އެގޮތުން މި އަހަރު ޓެކުހުގެ ގޮތުގައި ލިބުނު ބޭރު ފައިސާގެ އަދަދު 851.3 މިލިއަން ޑޮލަރަށް އަރާއިރު، ނިމުނު އަހަރުގެ އެ މުއްދަތުގައި ޓެކުހުގެ ގޮތުގައި ލިބުނީ 627.9 މިލިއަން ޑޮލަރެވެ.
ޑިޕާޗަރ ޓެކުހުގެ ރޭޓުތައް މަތިކުރުމާއި، އާމްދަނީން ނަގާ ޓެކުހުގެ އުސޫލުތަކަށް ގެނެވުނު ބަދަލުތަކާ ގުޅިގެން، މި ދާއިރާތަކުން ލިބުނު އާމްދަނީވެސް ވަނީ ބޮޑުތަނުން އިތުރުވެފައެވެ. ޑިޕާޗަރ ޓެކުހުގެ ގޮތުގައި މި އަހަރު 90.9 މިލިއަން ޑޮލަރު ލިބިފައިވާއިރު، އާމްދަނީން ނަގާ ޓެކުހުގެ ގޮތުގައި 120.1 މިލިއަން ޑޮލަރު ލިބިފައިވެއެވެ.
އޭގެ އިތުރަށް ގްރީން ޓެކުހުގެ ރޭޓަށް ގެނައި ބަދަލާއެކު މި އަހަރު ގްރީން ޓެކުހުގެ ގޮތުގައި ދައުލަތަށް ލިބުނު ބޭރު ފައިސާވެސް ވަނީ އިތުރުވެފައިވެއެވެ. އެގޮތުން ނިމުނު އަހަރު ގްރީން ޓެކުހުގެ ގޮތުގައި 52.7 މިލިއަން ޑޮލަރު ލިބުނު ނަމަވެސް މި އަހަރުގެ ސެޕްޓެންބަރުގެ ނިޔަލަށް 108.6 މިލިއަން ޑޮލަރު ގްރީން ޓެކުހުގެ ގޮތުގައި ލިބިފައިވެއެވެ.
ގްރީން ޓެކުހުގެ ރޭޓަށް ގެނެވުނު ބަދަލާ ގުޅިގެން، މި އަހަރުގެ ސެޕްޓެންބަރުގެ ނިޔަލަށް 108.6 މިލިއަން ޑޮލަރު ލިބިފައިވާއިރު، ޓީޖީއެސްޓީގެ ގޮތުގައި 531.3 މިލިއަން ޑޮލަރު ލިބިފައިވެއެވެ. މީގެ އިތުރުން، ޓެކުސް ނޫން ގޮތްގޮތުން ލިބުނު އާމްދަނީވެސް 268 މިލިއަން ޑޮލަރަށް އަރާފައިވެއެވެ.
ދައުލަތަށް ލިބޭ ބޭރު ފައިސާގެ އާމްދަނީ އިތުރުވުމާ ގުޅިގެން، ދައުލަތުގެ ބޭރު ފައިސާގެ ރަސްމީ ރިޒާވް 130 އިންސައްތައަށް އިތުރުވެފައިކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ މާލީ ހިސާބުތަކުން ދައްކައެވެ.
