ކޮންމެ ދުވަހަކު ފެންވެރުމަކީ ސާފުތާހިރުކަމުގެ އެންމެ މުހިންމު އެއް އާދައަށް ވީ ނަމަވެސް، މާ ގިނައިން ފެންވެރުމަކީ ހަށިގަނޑުގެ ދުޅަހެޔޮކަމަށް ގެއްލުންހުރި ކަމެއް ކަމަށް ދިރާސާތަކުން ދައްކައިފިއެވެ.
ޔޫޓާ ޔުނިވާސިޓީން ކުރި ދިރާސާއަކުން ހާމަވެފައިވަނީ، މާ ބޮޑަށް ހަށިގަނޑު ސާފުކުރުމުގެ ސަބަބުން އިންސާނާގެ ”މައިކްރޯބަޔޯމް“ އަށް ގެއްލުންވެދާނެއެވެ. މައިކްރޯބަޔޯމްއަކީ ހަށިގަނޑުގެ ތެރެއާއި ބޭރުގައި ދިރިއުޅޭ ބެކްޓީރިއާ، ވައިރަސް އަދި އެހެނިހެން ކުދި ދިރުންތަކުގެ ޖަމާއަތެކެވެ. މިއީ އިންސާނާގެ ދިފާއީ ނިޒާމު، ކާނާ ހަޖަމުކުރުން އަދި ހިތުގެ ދުޅަހެޔޮކަމަށް ވެސް ވަރަށް މުހިންމު ދައުރެއް އަދާކުރާ ބައެކެވެ.
މި މައިކްރޯބަޔޯމްތަކަށް ބަދަލު އައުމުން ދިފާއީ ނިޒާމު ބަލިކަށިވެ، ކާނާ ހަޖަމުކުރުމަށް ދަތިވެ، ހިތުގެ ދުޅަހެޔޮކަމަށް ވެސް ނޭދެވޭ އަސަރުތައް ކޮށްފާނެއެވެ.
އެހެންނަމަވެސް، ޑާމަޓޮލޮޖިސްޓުންގެ މި އިރުޝާދުތަކަށް ބަލައިގެން ކޮންމެ މީހަކު ވެސް އޭނާގެ ފެންވެރުމުގެ އާދަ ބަދަލުކުރަން ނުޖެހޭ ކަމަށް ބުނެފައި ވެއެވެ. އެއީ ކޮންމެ މީހެއްގެ ހަންގަނޑު ވެސް ތަފާތުވާނެތީ އާއި އަދި ކޮންމެ ސީޒަނެއްގައި ވެސް ހަންގަނޑަށް ބަދަލު އަންނާތީއެވެ. މިސާލަކަށް، ފިނި މޫސުމުގައި ހަންގަނޑު ހިކިވުން އިތުރުވެދާނެއެވެ. މިފަދަ ހާލަތްތަކުގައި މާގިނައިން ފެންވެރުމަކީ ހަންގަނޑު މާ ބޮޑަށް ހިކި ކުރަކިވުމަށް މަގުފަހިކުރާ ކަމެކެވެ.
ހާއްސަ މުނާސަބާއެއް ނެތްނަމަ ތަޖުރިބާކާރުން ހުށަހަޅާ ގޮތުގައި ގިނަ މީހުންނަށް ހަފްތާއަކު ގިނަ ފަހަރު ފެންވެރުމުން ފުދެއެވެ. އެގޮތުން މާ ބޮޑަށް ހަޑިވެ، ދާހިތްލާފައި ނުވަތަ އިތުރަށް ފެންވެރެން ޖެހޭ ސަބަބެއް ނެތް ނަމަ ފެންވެރުމަކީ ބޭކާރު ކަމެއް ކަމަށް ވަނީ ބުނެފައެވެ.
ހާއްސަކޮށް ފިނި މޫސުމުގައި ކޮންމެ ދުވަހަކު ފެންވެރުމަކީ ހަންގަނޑުގައި ހުންނަ ތެލުގެ ބައި ނެތިދިއުމަށް މެދުވެރިވާ ކަމެކެވެ. މިއީ ހަންގަނޑު ތެތްކަންމަތީ ބެހެއްޓުމަށްޓަކައި ވަރަށް މުހިންމު ދައުރެއް އަދާކުރާ އެއްޗެކެވެ. އެހެންކަމުން، ގިނައިން ފެންވެރޭ ނަމަ، ނޫނީ ހޫނު ފެނުން ގިނައިރު ފެންވެރޭ ނަމަ، ހަންގަނޑު ކަހައި ހިރުވައި، ކުރަކިވުމަށް މަގުފަހިވެދާނެއެވެ.
ގިނައިން ފެންވެރުމަކީ ހަންގަނޑުން މުހިންމު ތެޔޮތައް ނެތިކޮށްލާ، ހަންގަނޑު ހިކި، އެކްޒީމާ އަދި ސޯރިއާސިސް ފަދަ ބަލިތައް ގޯސްކޮށް، ހަންގަނޑު ރައްކާތެރިކޮށްދޭ ފައިދާހުރި ބެކްޓީރިއާ ގެއްލިގެންދާ ކަމެކެވެ. މިކަމަށް ހައްލެއްގެ ގޮތުން، ހަރަކާތްތެރިވާ މިންވަރާއި ހަންގަނޑުގެ ބާވަތަށް ބަލައި ފެންވެރޭ ފަހަރު މަދުކޮށް، ހޫނު ފެނުގެ ބަދަލުގައި ހޫނުކަން ކުޑަ ފެން ބޭނުން ކުރުމަށާއި، ފެންވެރުމަށްފަހު މޮއިސްޗަރައިޒަރެއް ބޭނުންކުރުމަށް އިރުޝާދު ދެއެވެ. އަދި ހަންގަނޑަށް މަޑު ކްލެންޒަރެއް ނުވަތަ މޮއިސްޗަރައިޒިން ބޮޑީ ވޮޝްއެއް ބޭނުންކުރުން ރަނގަޅެވެ.
އެއްގޮތަކަށްވެސް ފެންނުވަރާ ހުރުމަކީވެސް އެކަށީގެންވާ ކަމެއް ނޫނެވެ. މަދުމަދުން ފެންވެރި ހުރުމަކީ ހަންގަނޑަށް ފައިދާހުރި ކަމަކަށް ވެދާނެ ނަމަވެސް، އެކަށީގެންވާ ވަރަށް ފެން ނުވެރިއްޖެ ނަމަ، ހަށިގަނޑުގައި ހަޑިތަކާއި ދާ އަދި މަރުވެފައިވާ ހަންގަނޑުގެ ސެލްތައް ޖަމާވެ، ހަށިގަނޑުން ނުބައި ވަސްދުވުމަށް މަގުފަހިވެއެވެ.
އަދި ހަންގަނޑުގެ ބިހި ނެގުމާއި ކަހައި ހިރުވައި ރަތްވުން ފަދަ މައްސަލަތައް ދިމާވެ، ބެކްޓީރިއާ ނުވަތަ ފަންގަސްގެ ބަލިތައް ފެތުރި، އިޖުތިމާއީ ގޮތުން ނުސާފުކަން އުފެދިދާނެއެވެ.
