ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ތަރައްގީކުރުމަށް ފީފާގެ ރައީސް ޖިއާނީ އިންފަންޓީނޯ އާއިއެކު ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޝްވަރާ ކުރައްވައިފިއެވެ.
އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ފީފާފެ ރައީސް ޖިއާނީ އިންފަންޓީނޯ ރާއްޖެއަށް ވަޑައިގަތުމުން މެހެމާންދާރީ އަދާކުރުމުގެ ފުރުސަތު ލިބުމުން އުފާކުރައްވާ ކަމަށެވެ.
ފީފާއިން ރާއްޖޭގެ ފުޓްބޯޅަ ކުރިއެރުވުމަށް އަބަދު ވެސް މަސައްކަތް ކުރައްވަމުން ގެންދަވާ ކަމަށް ރައީސް ވިދާޅުވިއެވެ. އަދި ވިދާޅުވީ ފުޓްބޯލް އެސޯސިއޭޝަން އޮފް މޯލްޑިވްސް ތަރައްގީކުރުމަށް ފީފާގެ ރައީސްއާއެކު މަޝްވަރާކުރެއްވި ކަމަށެވެ.
ފީފާގެ ރައީސް އާއި ރައީސް ވަނީ އިއްޔެ ރައީސް އޮފީހުގައި ބައްދަލުކުރައްވާފައެވެ. އެ ބައްދަލުވުމުގައި ދެ ފަރާތުން ވެސް ވަނީ ރާއްޖޭގައި ފުޓްބޯޅައިގެ ދާއިރާ ކުރިއެރުވުމަށާއި، އެފްއޭއެމްގެ ތަރައްގީއަށް އެއްބާރުލުން ދެއްވާނެކަމުގެ ޔަގީންކަން ދެއްވާފައެވެ.
އެފްއޭއެމްގެ ރައީސް އަހްމަދު ތާރިގުގެ ދައުވަތަކަށް ފީފާގެ ރައީސް އިންފަންޓީނޯ ރާއްޖެއަށް ކުރައްވާ ޒިޔާރަތުގެ ތެރެއިން ރައީސްއާ ބައްދަލުކުރެއްވިއިރު، އިއްޔެ ހަވީރު ގައުމީ ފުޓްބޯޅަ ދަނޑުގައި ކުރިއަށްދިޔަ ހާއްސަ ފުޓްބޯޅަ ފެސްޓިވަލްގައި ވެސް ދެ ބޭފުޅުން ވަނީ ބައިވެރިވެޑައިގެންފައެވެ.
