ގްރޭޓާ މާލެ ސަރަހައްދުން އަލަށް ގެދޮރު ގަންނަން ބޭނުންވާ ފަރާތްތަކަށް މާލީ ނިޒާމުގެ ތެރެއިން ފައިނޭންސިން ހަމަޖެއްސުމުގެ މަގުސަދުގައި ”އިންކްލޫސިވް ނޭޝަނަލް އެފޯޑަބަލް ހައުސިން ސްކީމް“ގެ ނަމުގައި ފައިނޭންސިން ސްކީމްއެއް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ތައާރަފް ކޮއްފިއެވެ.
އެމްއެމްއޭ އިން ވަނީ،ހުރިހާ ބޭންކްތަކުން ލޯން ޕޯޓްފޯލިއޯގެ ތެރެއިން މަދުވެގެން 10 ޕަސެންޓާއި 15 ޕަސެންޓް މި ސްކީމަށް ކަނޑައަޅަންޖެހޭނެ ކަމަށް ބުނެފައެވެ. އަދި ކުރިއަށް އޮތް ފަސް އަހަރު ދުވަހަށް މިސްކީމް ކުރިއަށް ގެންދަން އެމްއެމްއޭ އިން ނިންމާފައިވާއިރު، ސްކީމުގެ މައިގަނޑު އަމާޒަކީ ފަސް އަހަރު ތެރޭ 3،500 ހައުސިން ޔުނިޓަށް މި ސްކީމުގެ ތެރެއިން ފައިސާ ހަމަޖައްސާ ދިނުން ކަމަށް އެ ބޭންކުން ބުނެއެވެ.
މި ސްކީމްގެ ދަށުން ދޫކުރާ ލޯނުތަކަށް ފައިސާ ދައްކާ އެންމެ ދިގުމުއްދަތަކަށް 25 އަހަރު ދުވަހުގެ މުއްދަތެއް ކަނޑައަޅާފައިވާއިރު ކަސްޓަމަރުންނަށް އޭގެ ކުރިންވެސް ފައިސާ ދައްކާ ޚަލާސްކުރުމުގެ ފުރުސަތު ލިބޭނެއެވެ.
މި ސްކީމްގެ ދަށުން މައިގަނޑު ގޮތެއްގައި ދެ ގޮތަކަށް ފައިސާ ދޫކުރުމަށް ހަމަޖެހިފައިވެއެވެ. އެއީ ’ލީސް އެންޑިންގ ވިތު އޯނަޝިޕް‘ އަދި ޔޫޒާ ފައިނޭންސް އޮޕްޝަން، މި ދެގޮތެވެ.
މާލީ ދާއިރާ ތަރައްޤީކޮށް ކުރިއެރުވުމުގެ އިތުރުން، އާންމު ރައްޔިތުންގެ މާލީ ފުދުންތެރިކަން އިތުރުކުރުމަށް ހެޔޮ އަގުގައި ފައިނޭންސިން ހޯދައިދިނުމަކީ އެމްއެމްއޭއިން އިސްކަންދޭ ފައިނޭންޝަލް އިންކުލޫޝަން ނުވަތަ މާލީ ބައިވެރިވުމުގެ ބައެއް ކަމަށް އެ ބޭންކުން ވަނީ ބުނެފައެވެ. މިގޮތުން، މާލީ ނިޒާމްގެ ތެރެއިން އާންމުންނަށް ލިބެންހުރި ޚިދުމަތްތައް ފުޅާކޮށް އެކަށީގެންވާ ހެޔޮ އަގެއްގައި ފައިނޭންސް ހަމަޖެހިގެން ދިއުމަކީ މާލީ ނިޒާމުގެ އިތުރުން ގައުމުގެ އިޖްތިމާއީ އަދި އުމްރާނީ ތަރައްޤީއަށްވެސް އޭގެ ހެޔޮ އަސަރު ކުރާނެ ކަމެއްކަމަށް އެމްއެމްއޭއިން ހާމަކުރެއެވެ.
އެމްއެމްއޭއިން މީގެ ކުރިން، 2017 ގައި ބޭންކުތައް މެދުވެރިކޮށް ކާމިޔާބުކަމާ އެކީ މިފަދަ ހައުސިންގ މަޝްރޫޢުތައް ހިންގާފައިކަން ފާހަގަ ކޮށްލެވެއެވެ. އެގޮތުން، އަރަބިއްޔާ އަދި ގާކޮށި ފްލެޓްތައް ގިނަ ބަޔަކު އަތްފޯރާފަށުގައި ގަނެފައިވަނީ އެމްއެމްއޭއިން ހިންގި މިފަދަ ހައުސިން މަޝްރޫޢުތަކުގެ ސަބަަބުންނެވެ.
