މާލޭގެ އަވަށްތަކަށް އަމާޒުކޮށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބާއްވަމުން ގެންދަވާ ސިލްސިލާ ބައްދަލުވުންތަތުގެ ތެރެއިން ފަސްވަނަ ބައްދަލަވުން އަންނަ ހަފްތާގެ އަންގާރަ ދުވަހުގެރޭ ބާއްވަން ތާވަލުކޮށްފިއެވެ.
ގަކޮޅަށް ނިސްބަތްވާ މާލެ ރައްޔިތުންނާއި އެ ސަރަހައްދުގައި ދިރިއުޅޭ ރަށްވެހިންނަށް އަމާޒުކޮށްގެން ބާއްވާ މި ބައްދަލުވުން އޮންނާނީ މި މަހުގެ 16 ވާ އަންގާރަ ދުވަހުގެރޭ 20:30 ގައި އިމާދުއްދީން ސްކޫލުގައެވެ.
މި ޖަލްސާއަށް ވަޑައިގެންދެއްވުމަށް ސަރުކާރުންވަނީ ގަލޮޅުގައި ދިރިއުޅޭ ހުރިހާ ރައްޔިތުންނަށް ދައުވަތު އަރުވާފައެވެ.
މާލޭގެ އަވަށްތަކުގެ ތަރައްގީ ކުރިއަށްގެންދާނޭ ގޮތުގެ މަޝްވަރާ ކުރެެއްވުމަށް، މާލޭގެ އަވަށްތަކަށް އަމާޒުކޮށްގެން މާލޭގެ ރަށްވެހިންނާއި މާލޭގައި ދިރިއުޅޭ ފަރާތްތަކާއެކު ބައްދަލުވުންތަކެއް ބާއްވަވަން ނިންމަވާފައިވާ ކަން ރައީސް ހާމަކުރެއްވީ ސަރުކާރަށް ދެ އަހަރު ފުރުން ފާހަގަކުރުމަށް، ”ރައްޔިތުންނާއެކު ކުރިއަށް- ހަފުތާ 104“ މިނަމުގައި ބޭއްވި ޚާއްޞަ ރަސްމިއްޔާތުގައި ދެއްކެވި ވާހަކަފުޅުގައެވެ. ރައީސުލްޖުމްހޫރިއްޔާ ވިދާޅުވީ ގައުމީ ތަރައްގީގެ އަމާޒުގެ ދަށުން ހުރިހާ އަތޮޅުތަކަށް ވަޑައިގެން ކައުންސިލްތަކާއި، އ.ތ.މ. ކޮމިޓީ، އަދި އަތޮޅުތަކުގެ އިސް ހިންގުންތެރިންނާއި ބައްދަލުކުރައްވާފައިވާ ކަމަށެވެ. އަދި، މި ބައްދަލުވުންތަކަކީ ވަރަށްވެސް ކާމިޔާބު، ނަތީޖާ ފެނިގެންދިޔަ ބައްދަލުކުރެއްވުންތަކެއް ކަމަށްވެސް އެމަނިކުފާނު ފާހަގަކުރެއްވިއެވެ.
އަތޮޅުތަކުގައި މި ބައްދަލުވުންތައް ކުރިއަށް ގެންދެވުނު ފަދައިން މާލޭ ސަރަހައްދުގައި މިފަދަ ބައްދަލުވުންތަކެއް ވަރަށް އަވަހަށް ކުރިއަށް ގެންދެވުމަށް ނިންމަވާފައިވާ ކަމަށާއި މި ބައްދަލުވުންތަކުގައި މާލޭގެ ހަތަރު އަވަށާއި، ވިލިނގިލި، އަދި ހުޅުމާލޭގެ ދެ ފޭސްގައި ދިރިއުޅޭ ރައްޔިތުންނާއެކު މަޝްވަރާ ކުރައްވާނެ ކަމަށް އެމަނިކުފާނު ވިދާޅުވިއެވެ.
މި ނިންމެވުމާ އެއްގޮތަށް ބޭއްވި ފުރަތަމަ ބައްދަލުވުން ބާއްވާފައިވަނީ ވިލިމާލެ ރައްޔިތުންނާއެކުގައެވެ. ދެވަނަ ބައްދަލުވުން މައްޗަންގޮޅީ ރައްޔިތުންނާއެކު ބާއްވާފައިވާއިރު ތިންވަނަ ބައްދަލުވުން ބާއްވާފައިވަނީ މާފަންނު ރައްޔިތުންނާއެކުގައެވެ. އަދި އާދިއްތަ ދުވަހުގެރޭ ރައީސް ވަނީ މި ސިލްސިލާގެ ފަސްވަނަ ބައްދަލުވުމުގައި ހެންވޭރުގެ ރައްޔިތުންނާ ވެސް ބައްދަލުކުރައްވާފައެވެ.
