ވެނެޒުއޭލާގެ ރައީސް ނިކޮލަސް މަދޫރޯ އެމެރިކާގެ ސިފައިން ހައްޔަރުކޮށްފައިވަނިކޮށް، ކޮންގްރެސްގެ ހުއްދަނެތި އެ ގައުމާ ދެކޮޅަށް އިތުރު އަސްކަރީ ފިޔަވަޅެއް އެޅުން ހުއްޓުވުމަށް އެމެރިކާގެ ސެނެޓުން ގަރާރެއް ފާސްކޮށްފިއެވެ.
މި ގަރާރަކީ ރައީސް ޑޮނަލްޑް ޓްރަމްޕްގެ ސަރުކާރުން ވެނެޒުއޭލާއަށް ދެމުންދާ އަސްކަރީ ޕްރެޝަރުތަކާ ގުޅިގެން، ރައީސްގެ “ވޯ ޕަވާސް” ނުވަތަ ހަނގުރާމަ އިއުލާނުކުރުމުގެ ބާރުތައް ހަނިކުރުމަށް ހުށަހެޅިފައިވާ ގަރާރެކެވެ. މީގެ ކުރިން ތިން ފަހަރެއްގެ މަތިން މިފަދަ ގަރާރުތައް ސެނެޓުން ނާކާމިޔާބު ކޮށްލާފައިވީ ނަމަވެސް، މިފަހަރުގެ ވޯޓު ކާމިޔާބުކޮށްފައިވަނީ ޓްރަމްޕް ނިސްބަތްވާ ޕާޓީގެވެސް ބައެއް މެމްބަރުންގެ ވޯޓާއެކުއެވެ.
މިދިޔަ ޖެނުއަރީ 3 ވަނަ ދުވަހު އެމެރިކާގެ ސިފައިން ވެނެޒުއޭލާގެ ވެރިރަށް ކަރަކަސްގައި ހިންގި ވަރުގަދަ އަސްކަރީ އޮޕަރޭޝަނެއްގައި މަދޫރޯ ވަނީ ހައްޔަރުކޮށްފައެވެ. މި އޮޕަރޭޝަން ހިނގަމުން ދިޔައިރު، ރައީސް ޓްރަމްޕް ފްލޮރިޑާގެ މާ-އަ-ލާގޯ ރިސޯޓުގައި ސީ.އައި.އޭގެ ޑައިރެކްޓަރު ޖޯން ރެޓްކްލިފްއާ އެކު ތިއްބަވައިގެން އެ މަންޒަރު ބައްލަވާ ފޮޓޯއެއް ވަނީ އާންމުކުރައްވާފައެވެ.
ގަރާރު ހުށަހެޅުމުގައި އިސްކޮށް އުޅުއްވާ ރިޕަބްލިކަން ސެނެޓަރ ރޭންޑް ޕޯލް ވިދާޅުވި ގޮތުގައި، މީގެ ކުރިން މިކަމާ ދެކޮޅަށް ވޯޓު ދެއްވި ބައެއް ރިޕަބްލިކަން މެންބަރުން ވެސް މި ގަރާރަށް ތާއީދުކުރެއްވިއެވެ.
ސެނެޓުގެ އަގުލަބިއްޔަތު ރިޕަބްލިކަން ޕާޓީއަށް އޮތް ނަމަވެސް، މަދޫރޯ ހައްޔަރުކުރުމާ ގުޅިގެން ވެނެޒުއޭލާގައި ދިގުދެމިގެންދާ އަދި ބޮޑު ހޭދައެއް ހިނގާނެ އަސްކަރީ ކެމްޕޭނެއް ފެށިދާނެތީ ގިނަ މެންބަރުން ކަންބޮޑުވުން ފާޅުކުރެއެވެ. އަދި އެމެރިކާގެ އަސްކަރީ ބަޖެޓު 1 ޓްރިލިއަން ޑޮލަރުން 1.5 ޓްރިލިއަން ޑޮލަރަށް ބޮޑުކުރަން ބޭނުންފުޅުވާ ކަމަށް ޓްރަމްޕް ވިދާޅުވުމަކީ ވެސް މި ކަންބޮޑުވުން އިތުރުވި ސަބަބެކެވެ.
މި ގަރާރާ ދެކޮޅު ހައްދަވާ މެންބަރުން ބުނަނީ މަދޫރޯ ހައްޔަރުކުރުމަކީ “ލޯ އެންފޯސްމަންޓް” ނުވަތަ ގާނޫނީ ފިޔަވަޅެއް ކަމަށާއި، އެއީ ހަނގުރާމައެއް ނޫން ކަމަށެވެ. މަދޫރޯގެ މައްޗަށް އެމެރިކާގެ ކޯޓެއްގައި މަސްތުވާތަކެއްޗާއި ހަތިޔާރުގެ މައްސަލައެއްގައި ވަނީ ދައުވާ އުފުލާފައެވެ.
މި ގަރާރު ސެނެޓުން ފާސްވި ނަމަވެސް، މިއީ ގާނޫނަކަށް ވުމަށްޓަކައި ހައުސް އޮފް ރެޕްރެޒެންޓެޓިވްސް އިން ފާސްވާން ޖެހެއެވެ. އަދި ރައީސް ޓްރަމްޕް މި ގަރާރު ވީޓޯ ކުރައްވާނެ ކަމަށް ބެލެވޭއިރު، އެ ވީޓޯ ބާތިލުކުރުމަށް ދެ މަޖިލީހުގެ ތިންބައިކުޅަ ދެބައި އަގުލަބިއްޔަތު ބޭނުންވާނެއެވެ.
އެމެރިކާއާއި ވެނެޒުއޭލާއާ ދެމެދު އޮތް ގުޅުން ގޯސްވެ، މަދޫރޯގެ ސަރުކާރަށް ޕްރެޝަރު ކުރުމަށް އެމެރިކާއިން ދަތިކުރުމުގެ ފިޔަވަޅުތައް އަޅަމުންދާތާ އަހަރުތަކެއް ވަނީ ވެފައެވެ. ނަމަވެސް، 2025 ވަނަ އަހަރުގެ ސެޕްޓެމްބަރު މަހުން ފެށިގެން އެމެރިކާގެ އަސްކަރިއްޔާއިން ވަނީ ވެނެޒުއޭލާގެ ކަނޑުގެ ސަރަހައްދުގައި ހަރަކާތްތެރިވާ އުޅަނދުފަހަރަށް އަމާޒުކޮށް ހަމަލާދޭން ފަށާފައެވެ.
އެމެރިކާގެ ގާނޫނުއަސާސީ ބުނާގޮތުން، ރައީސަކު ދިގުދެމިގެންދާ އަސްކަރީ އޮޕަރޭޝަނެއް ހިންގަވާނަމަ ކޮންގްރެސްގެ ހުއްދަ ހޯއްދަވަން ޖެހިވަޑައިގަންނަވައެވެ. ނަމަވެސް ޓްރަމްޕްގެ ސަރުކާރުން މަދޫރޯ ހައްޔަރުކުރުމުގެ އޮޕަރޭޝަން ސިފަކުރަނީ ހަނގުރާމައެއްގެ ގޮތުގައެއް ނޫނެވެ. އެއީ މަސްތުވާތަކެއްޗާއި ހަތިޔާރުގެ މައްސަލައެއްގައި އުފުލާފައިވާ ދައުވާތަކަކާ ގުޅިގެން ހިންގި “ލޯ އެންފޯސްމަންޓް” ނުވަތަ ގާނޫނު ތަންފީޒުކުރުމުގެ ހަރަކާތެއްގެ ގޮތުގައެވެ.
