އިރާގަށް ނިސްބަތްވާ އުމުރުން 54 އަހަރުގެ ފަންނާނެއް ކަމަށްވާ ޒަމާން، ހަ އަހަރު ދުވަހުގެ ބުރަ މަސައްކަތަށްފަހު އަތުން ލިޔެފައިވާ ބޮޑު މުޞްޙަފެއް ނިންމާލައިފިއެވެ.
އިސްތަންބޫލްގެ މިސްކިތެއްގައި ހުރެ އޭނާގެ މި ކާމިޔާބީ ފާހަގަކުރަމުން ޒަމާން ބުނީ، މި މަސައްކަތް ނިންމާލެވުމުން އޭނާގެ ހިތް ފަޚުރުވެރިކަމާއި ޝުކުރުވެރިކަމުން ފުރިފައިވާ ކަމަށެވެ.
މި މުޞްޙަފަކީ އޭގެ ސައިޒާއި ފުޅާމިނަށް ބަލާއިރު ފާހަގަކޮށްލެވޭ ބޮޑު މަސައްކަތެކެވެ. މީގައި ދެފަރާތަށް ލިޔެފައިވާ 302 އޮޅާލެވޭ ކަރުދާސް ހިމެނޭއިރު، ކޮންމެ ކަރުދާހެއްގެ ދިގުމިނުގައި ގާތްގަނޑަކަށް ހަތަރު މީޓަރު (13 ފޫޓު) އަދި ފުޅާމިނުގައި 1.5 މީޓަރު ހުރެއެވެ. މި ގަނޑުތަކަކީ ބިހާއި، ކޯންސްޓާޗް އަދި އެލަމް ފަދަ ސަގާފީ ތަކެތި ބޭނުންކޮށްގެން ޚާއްޞަކޮށް ތައްޔާރުކޮށްފައިވާ ބޯ ޕާޗްމަންޓް ކަރުދާސްތަކެކެވެ.
އިސްލާމީ ކެލިގްރަފީ ނުވަތަ ޚައްޠާޠުކަމަކީ އިސްލާމީ ދުނިޔޭގައި ބޮޑު އިޙްތިރާމެއް ލިބިފައިވާ ފަންނެކެވެ. ފަންނީ މާހިރެއް ކަމަށްވާ އުމިތު ކޮސްކުންސޫ ސިފަކުރި ގޮތުގައި، މިއީ އަޅުކަމެއްގެ ގޮތުގައި، އަދި މާތްﷲ އާ ކުއްތަންވުމަށް ކުރެވޭ މަސައްކަތެއްގެ ގޮތުގައި ބެލެވޭ ކަމެކެވެ. ތުރުކީވިލާތުގެ އިސްތަންބޫލަކީ މިއަދުވެސް މި ފަންނުގެ މައި މަރުކަޒެއްގެ ގޮތުގައި ބެލެވޭ ސިޓީއެކެވެ.
ޒަމާންގެ މި މަޝްރޫޢު ފެށުނީ 2017 ވަނަ އަހަރު އޭނާގެ އާއިލާއާއެކު އިސްތަންބޫލަށް ބަދަލުވި ހިސާބުންނެވެ. ހަ އަހަރު ދުވަސް ވަންދެން، ފަތިހުން ފެށިގެން އިރުއޮއްސެންދެން އޭނާ މަސައްކަތް ކުރީ މިހްރިމާ ސުލްޠާން މިސްކިތުގެ ކުޑަ ކޮޓަރިއެއްގައި އިނދެގެންނެވެ. އޭނާގެ ދަރިފުޅު ރޭކާރު ހަނދާންކުރާ ގޮތުގައި، އެ ދުވަސްވަރު އޭނާގެ ބައްޕަ ފެންނަނީ ވަރަށް މަދުންނެވެ.
”އަހަރެމެންނަށް ބައްޕަ ފެންނަނީ ގިނަފަހަރަށް ކާ އެއްޗެހި ގެންގޮސްދޭ ވަގުތު ނުވަތަ ނިދަން ގެއަށް އަންނަ ވަގުތު، މިހާރު، ﷲގެ އިރާދަފުޅުން ބައްޕަ ފެންނަ މިންވަރު އިތުރުވެއްޖެ.“ އޭނާ ބުންޏެވެ.
މިހާރު މި އޮޅާލެވޭ ކަރުދާސްތައް ހުރީ މިސްކިތުގައި ރައްކާތެރިކަމާއެކު ބަހައްޓާފައެވެ. ޒަމާން އުންމީދު ކުރަނީ ކޮންމެވެސް ދުވަހަކުން މި ޤުރުއާން މިއުޒިއަމެއްގައި ނުވަތަ ޚާއްޞަ ސަގާފީ މަރުކަޒެއްގައި އާންމުންނަށް ފެންނާނެހެން ބެހެއްޓި، މީހުންނަށް އޭގެ އަގު ވަޒަންކުރެވޭނެ ކަމަށެވެ. ޒަމާން ބުނި ގޮތުގައި މި ފުރިހަމަ މަސައްކަތް ނިންމާލުމުގެ ހަޔާތާއި ބާރު މާތްﷲ ދެއްވީތީ އޭނާ އިންތިހާއަށް އުފާވެއެވެ.
މިއީ އަތުން ލިޔެފައިވާ ދުނިޔޭގެ އެންމެ ބޮޑު ޤުރުއާން ކަމަށް ބެލެވުނު ނަމަވެސް، ރަސްމީކޮށް އެކަން އަދި ރެކޯޑް ކުރެވިފައެއް ނުވެއެވެ. މިހާރު ގިނިސް ވޯލްޑް ރެކޯޑްސްގައި އޮތީ 2025 ވަނަ އަހަރު މައްކާގައި ތައްޔާރުކުރި، ޗާޕުކޮށްފައިވާ އެންމެ ބޮޑު ޤުރުއާނެވެ.
