މާލޭގެ އުތުރު ފަރާތު ބޮޑުތަކުރުފާނު މަގު ތަރައްގީ ކުރުމުގެ މަޝްރޫއުގެ ދެވަނަ ފިޔަވަހީގެ ދަށުން، މަގުގެ ސަބް-ބޭސް ތައްޔާރުކުރުމުގެ މަސައްކަތް ފަށައިފިއެވެ.
އެމްޓީސީސީއިން ބުނީ މި ހަފްތާގެ ތެރޭގައި މަގުގައި އޭބީސީ އެޅުމާއި ތާރު އެޅުމުގެ މަސައްކަތްތައް ކުރިއަށް ގެންދިއުމަށް ހަމަޖެހިފައިވާ ކަމަށެވެ.
މީގެ އިތުރުން، ފަޅު ފަރާތުގެ ކާނުތައް ހެދުމާއި، މަގުބައްތިތަކާއި ބޯޑުތައް ހަރުކުރުން ފަދަ މަޝްރޫއު ނިންމުމަށްޓަކައި ކުރަންޖެހޭ އެހެނިހެން މުހިންމު މަސައްކަތްތައްވެސް ހުއްޓުމެއްނެތި ކުރިއަށްދާނެ ކަމަށްވެސް އެ ކުންފުނިން ބުންޏެވެ.
މާލެ ސިޓީގެ މަގުތައް ޒަމާނީ ފެންވަރަކަށް ތަރައްގީކޮށް، ހިނގާ ބިނގާވެ އުޅޭ ފަރާތްތަކަށް ފަސޭހަ ވާނެހެން ފަރުމާކުރެވިފައިވާ މި މަޝްރޫއުގެ ސަބަބުން، ދަތުރު ފަތުރުގެ ނިޒާމަށް ބޮޑު ލުއިފަސޭހަކަމެއް ލިބިގެންދާނެ ކަމަށްވެސް އެމްޓީސީސީން ބުނެފައިވެއެވެ.
ބޮޑުތަކުރުފާނު މަގު ޒަމާނީ ފެންވަރަށް ހެދުމުގެ އަމަލީ މަސައްކަތް ފަށާފައިވަނީ މިދިޔަ އަހަރުގެ އޮގަސްޓް މަހުގައެވެ. ތިން ސެގްމަންޓަކަށް ބަހާލައިގެން ކުރިއަށްގެންދާ މި މަޝްރޫއުގެ ދަށުން 830 މީޓަރުގެ މަގެއް ހެދުމާއި 737 މީޓަރުގެ ސަރަހައްދެއްގައި ޝީޓް ޕައިލް މަސައްކަތް ކުރުމަށް ހަމަޖެހިފައިވެއެވެ.
ހަމައެހެންމެ ތާރު އަޅުމާއި ސަބްބޭސް ތައްޔާރުކުރުމުގެ އިތުރުން ހިނގާ މީހުންނަށް ވަކި ލޭނެއް ގާއިމުކުރުންވެސް މި މަޝްރޫއުގައި ހިމެނޭއިރު ފެންހިންދާ ނިޒާމެއްވެސް ގާއިމު ކުރެވިގެންދާނެއެވެ.
