އީރާނުން، ހުރުމޫޒް ކަނޑުއޮޅިއާ ދިމާލުން ކަނޑު އަޑީގައި މިސައިލްތަކުގެ ފުޅާ ނެޓްވޯރކެއް ޤާއިމުކޮށްފައިވާކަން އިޢުލާން ކުރުމާއެކު، ޚަލީޖުގައި ހަމަނުޖެހުން ވަރަށްބޮޑަށް ބޮޑުވެއްޖެއެވެ.
ތެހެރާނުން ބުނާ ގޮތުގައި ކަނޑުގެ އަޑީގައި ޤާއިމުކޮށްފައިވާ، މިސައިލް ކޮށާރުތަކަކީ، ކަނޑުއަޑީގައި މިސައިލްތައް ރައްކާކޮށް، އަދި ބޭނުންވެއްޖެ ހިނދެއްގައި، ޙަމަލާތައް ދިނުމަށް ޤާއިމުކޮށްފައިވާ ތަންތަނެވެ. އީރާނުން ހޯދާފައިވާ އެ ކުރިއެރުމަކީ، ޞައްޙަ ތެދުކަމުގައި ވެއްޖެ ނަމަ، އެއީ ދުނިޔޭގެ މުހިންމު ޝިޕިންގ ކޮރިޑޯއެއް ކަމަށްވާ ހުރުމޫޒު ކަނޑުއޮޅީގެ އިސްތިރާޖީ ހަމަހަމަކަން ވަރަށް ބޮޑަށް ބަދަލުވެގެން ހިނގައިދާނެ ކަމެކެވެ.
އޮފިޝަލުން ސިފަކުރާ ގޮތުގައި އެ ކޮށާރުތަކަކީ، އެ ސަރަޙައްދުގައި ބޭރުގެ އަސްކަރީ ބާރުތަކުން ތިބޭ ތިބުން ހުއްޓުވުމަށް އަމާޒުކޮށްގެން އަޅާފައިވާ ދިފާޢީ ފިޔަވަޅެކެވެ.
ހުރުމޫޒު ކަނޑުއޮޅިއަކީ ބައިނަލްއަޤުވާމީ ހަކަތައާއި، ވިޔަފާރި މުދާ އެއްތަނުން އަނެއް ތަނަށް އުފުލުމުގައި މުހިންމު ހިއްސާއެއް އަދާކުރާ ފެން މަގެކެވެ. އީރާނުގެ އިޢުލާނުން ހާމަވެގެން ގޮސްފައިވަނީ، ބައިނަލްއަޤުވާމީ ހަކަތަ އެއް ތަނުން އަނެއް ތަނަށް އުފުލުމުގައި މުހިންމު ޙިއްޞާއެއް އަދާކުރާ، އަދި ބައިނަލްއަޤުވާމީ ސަލާމަތީ ކަންބޮޑުވުންތަކާއި ގުޅިފައިވާ މުހިންމު މަގަކަށް ބާރު ފޯރުވުމަށް އީރާނުން ކުރަމުންދާ މަސައްކަތެވެ.
އީރާނުގެ އަސްކަރިއްޔާ އަކީ، މެދުއިރުމަތީގައި މިވަގުތު އޮތް އެންމެ ބާރުގަދަ އަސްކަރިއްޔާއެވެ. އީރާނުން މަސައްކަތް ކުރަނީ އީރާނުގެ ދިފާޢުކުރުމުގެ އިތުރުން، ސަރަޙައްދުގެ އަސްކަރީ ބޮޑު ބާރެއްގެ ގޮތުގައި ދެމިއޮތުމުގެ މަސައްކަތެވެ. އީރާނުގެ އަސްކަރިއްޔާގައި އާދައިގެ ސިފައިންނާއި ބާރުގަދަ އިސްލާމިކް ރިވޮލިއުޝަނަރީ ގާޑުންގެ ގޮތުގައި، ގާތްގަނޑަކަށް 580،000-610،000 އަސްކަރީ ސިފައިން ތިބިއިރު، ރިޒާވް ސިފައިންގެ ގޮތުގައި އިތުރު ލައްކައެއްހާ ސިފައިން އެބަ ތިއްބެވެ. އީރާނުގެ އަސްކަރީ މުހިއްމު ބާރުތަކުގެ ތެރޭގައި، އެ ސަރަޙައްދުގައި ހުރި އެންމެ ބޮޑު ބެލިސްޓިކް މިސައިލް ކޮށާރު ހިމެނޭއިރު، އޭގެތެރޭގައި ޝަހާބް، ސެޖިލް، އަދި ޚުއްރަމްޝާހް ސީރީޒްގެ ކުރު އަދި މެދު ރާސްތާގެ 2،000 ކިލޯމީޓަރާއި ހަމައަށް ފޮނުވާލެވޭ މިސައިލްތައް ހިމެނެއެވެ.
މީގެ 13 އަހަރު ކުރިން އީރާނުގެ އިސްވާރު ސައްޔިދު ޢަލީ ޚާމަނާއީ ވިދާޅުވެފައިވެއެވެ. އީރާނުން ނިއުކްލިއާ ފައިލްތައް ބަންދު ކުރިޔަސް، ހުޅަނގުގެ ޢަދާވާތްތެރިކަމަށް ނިމުމެއް ނާންނާނެއެވެ. އެމީހުން އަނެއްކާވެސް އައު ބަހަނާތަކެއް ހޯދާނެއެވެ. ނިއުކުލިއަރ ފައިލްތައް ބަންދު ކޮށްފިނަމަ ދެން ކުރިމަތިވާނެ ސުވާލުތަކަކީ؛ ”މިސައިލް ގެންގުޅެނީ ކީއްވެގެން ހެއްޔެވެ؟ ”ޑްރޯން ގެންގުޅެނީ ކީއްވެގެން ހެއްޔެވެ؟ ”ސަހުޔޫނީ ދައުލަތާއި ގުޅުން ގާއިމުނުކޮށް ތިބީ ކީއްވެގެން ހެއްޔެވެ؟“ ހުޅަނގާއި، ސަހުޔޫނީންގެ ޝަރުޠުތަކަށް ދުވަހަކުވެސް ނިމުމެއް ނާންނާނެއެވެ.
އެމެރިކާއިން ހަނގުރާމަތައް ކުރަނީ ޚުދުމުޚުތާރު ވެރިކަމަށް ނަފްރަތުކޮށް، ޑިމޮކްރަސީ ޤާއިމުކުރުމަށް ބޭނުންވާތީ ކަމަށް، ބައެއް މީހުން އަދިވެސް ގަބޫލުކުރާ ކުރުމަކީ ވަރަށް ބިރުހުރި ކަމެކެވެ. މިހާތަނަށް އެމެރިކާއިން ކޮށްފައިވާ ހަނގުރާމަތަކަށް ރިޢާޔަތް ކުރާއިރު ފެންނަނީ ޚުދުމުޚުތާރު ވެރިކަންތައް ވައްޓާލުމަށް ވުރެ ގިނައިން، ޚުދުމުޚުތާރު ވެރިކަންތައް ޤާއިމުކުރުމަށް އެމެރިކާއިން ހަނގުރާމަ ކޮށްފައިވާ ތަނެވެ. އަދި އެއަށްފަހު ދުނިޔޭގެ ޤައުމުތަކުގެ މުއްސަދިކަމާއި، ވަސީލަތްތަކުގެ ބޭނުން ނަހަމަގޮތުގައި ކޮށްފައިވާ ތަނެވެ. އޭގެ ހެކިތައް، އެމެރިކާ ބައްރާއި، މެދުއިރުމަތިން ވަރަށް ސާފުކޮށް ފެންނާނެއެވެ.
