ރަަމަޟާން މަހުގެ ފުރަތަމަ ދުވަހު، މާލޭގެ ލޯކަލް މާރުކޭޓްގައި ވިއްކަން ހުރި ކަނޑޫދޫ މިރުސް ކިލޯއެއް 420ރ. އަށް އަރައިފިއެވެ.
ނޫސްވެރިން މިއަދު ވަނީ ލޯކަލް މާރުކޭޓަށް ގޮސް، ތަރުކާރީ އާއި މޭވާ އާއި އެހެނިހެން ބާވަތްތަކުގެ އަގު ބަލައިފައެވެ. އަގުތަކަށް ބަލާއިރު، ތަރުކާރީގެ އަގު އުފުލެން ވަނީ ފަށައިފައެވެ.
ލުނބޯ ކިލޯއެއް 60ރ. އަށް ހުރިއިރު ކިއުކަންބާ ކިލޯއެއް ހުރީ 60ރ. އާއި 55 ރ. އާ ދެމެދުގައެވެ. އަދި ބަށި ކިލޯއެއް 55ރ. އަށް ހުރި އިރު ކެރެޓް ކިލޯއެއް ލިބެން ހުރީ 40ރ، އާއި 45ރ. ދެމެދުގައެވެ.
ބަޓާނާ، ޓޮމާޓޯ އަދި ކެބެޖް ކިލޯއެއް 30ރ. އަށް ހުރި އިރު ލީކްސް ކިލޯ އެއް އުޅެނީ 120ރ. އަށެވެ. އަދި ކެޕްސިކަމް، ތޮޅި އަދި ބެލް ޕެޕާ ކިލޯއެއް ލިބެން ހުރީ 75ރ. އަށެވެ.
ތޮޅި މިރުހުގެ އަގު 100 ގްރާމް 10ރ. އަދި 20ރ. އަށް ލިބެން ހުރި އިރު ލަންކާ ގިތެޔޮ މިރުސް ހުރީ ކިލޯއެއް 25ރ. ގައެވެ. އަދި ކަނޑޫދޫ ގިތެޔޮ މިރުހުގެ 100 ގްރާމް 40ރ. އާއި 45ރ. ރުފިޔާ ދެމެދުގައި ހުރި އިރު ކަނޑުދޫ މިރުސް ކިލޯއެއް ބާޒާރުގައި ލިބެން ހުރީ 420ރ. ގައެވެ.
ލެޓިއުސް 100ރ. އިން މަތީގައި ލިބެން ހުރި އިރު ކޮޕީފަތް ބޮނޑިއެއް ލިބެން ހުރީ 10ރ. ގައެވެ. އަދި ކުއްޅަފިލާފަތް ބޮނޑިއެއް 15ރ. އަށް ލިބެން ހުރިއިރު ދެ ބޮނޑި ލިބެން ހުރީ 25ރ. އަށެވެ.
ބީޗު ރޫޓާއި ލޭޑީސް ފިންގާ 65ރ. އަށް ހުރި އިރު ކައްޓަލަ ކިލޯއެއް ލިބެން ހުރީ 100ރ. ގައެވެ. ގަބުޅިއެއް 30ރ. އާއި 40ރ. އާ ދެމެދުގައި ހުރިއިރު ލޮނުމެދު ކިލޯއެއްގެ އަގަކީ 60ރ. އެވެ. އަދި ފިޔާ، އަލުވި ކިލޯ އެއް ހުރީ 20ރ. އަށެވެ.
މާރުކޭޓުގައި މި ރޯދަ މަހުވެސް ދިވެހިންގެ އުފެއްދުންތައް ގިނައިން ލިބެން ހުރިކަން ފާހަގަ ކުރެވެއެވެ.
