”ވަގުތު“ ގެ ފަރާތުން ރާއްޖޭގެ އެކިކަންކޮޅުތަކުގައި މިހާރު ކުރިއަށް ގެންދާ ސާވޭ ފުރިހަމަ ކުރުމަށް ”ވަގުތު“ ގެ ޓީމެއް އދ. ދިގުރަށަށް އެރުމުން އެ ރަށުގެ ކައުންސިލުން ބިރު ދެއްކުމަކީ ނިރުބަވެރި އަމަލެއް ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން މިއަދު ވިދާޅުވެއްޖެއެވެ.
މިއީ ”ވަގުތު“ން ކުރިއަށް ގެންދާ ސާވޭތަކުގައި ރަށެއްގެ ކައުންސިލެއްގެ ފަރާތުން މިފަދަ ގޮތަކަށް ހުރަސް އަޅަން މަސައްކަތް ކުރި ފުރަތަމަ ފަހަރެވެ. ދިގުރަށު ކައުންސިލްގެ ރަސްމީ ޓީޝާޓުގައި ތިބި މީހުން ވަނީ ”ވަގުތު“ ގެ ޓީމުގެ މެމްބަރުން ފަހަތުން ސައިކަލްގައި ގޮސް، އެމީހުންނަށް ތަފާތު އިންޒާރުތައް ދީފައެވެ.
”ވަގުތު“ ގެ 12 މީހުންގެ މައްޗަށް އެކުލެވޭ މި ޓީމު، ދިގުރަށަށް އެރީ މިއަދު ހެނދުނުގެ ވަގުތެއްގައެވެ. ކައުންސިލް ރައީސް އިބްރާހިމް އުސްމާން އިސްކޮށް ހުންނަވައި ”ވަގުތު“ ޓީމަށް ހުރަސް އަޅަން މަސައްކަތް ކުރި ނަމަވެސް ރަށުގެ ގޭގެއަށް ޒިޔާރަތްކޮށް ސާވޭ މިހާރު ވަނީ ފުރިހަމަކޮށްފައެވެ.
ސާވޭ ކުރިއަށް ދަނިކޮށް ކައުންސިލްގެ އަންހެން މެމްބަރު އައިޝަތު އަބޫބަކުރު ވަނީ ރަށުން ނުފައިބައިފި ނަމަ، ”ކުޅި ދައްކާލާނެ“ ކަމަށް ވިދާޅުވެ އިންޒާރު ދެއްވައިފައެވެ. އަދި ކައުންސިލްގެ ރައީސް އުސްމާން ވަނީ ”ވަގުތު“ ގެ ޓީމުގެ މެމްބަރުން އެ ރަށު ފުލުހުން މެދުވެރިކޮށް ހައްޔަރު ކުރާނެ ކަމަށް ވިދާޅުވެ، އިންޒާރު ވެސް ދެއްވައިފައެވެ.
އިދިކޮޅު އެމްޑީޕީގެ މެޖޯރިޓީ އޮންނަ ކައުންސިލުން ބުނަމުން ގެންދިޔައީ ހުއްދަ ނުހޯދައި ރަށަށް އެރުމުގެ ފުރުސަތު ނޯންނާނެ ކަމަށެވެ. އަދި ”ވަގުތު“ ގެ ޓީމު ރަށުން ފޭބުމަށް ކައުންސިލްގެ ރައީސް ގެންދެވީ އިންޒާރު ދެއްވަމުންނެވެ. ”ވަގުތު“ ގެ ޓީމަށް ހުރަސް އަޅަން ކައުންސިލްގައި ހިމެނޭ ގިނަ ބަޔަކު މަގުތަކަށް ނެރެފައިވެއެވެ.
އެލްޖީއޭގެ ރައީސް މުހައްމަދު ނިމާލް ”ވަގުތަށް“ މިއަދު ވިދާޅުވީ އެއްވެސް ކައުންސިލަކުން ރަށަކަށް އަރާ ބަޔަކަށް ބިރު ދެއްކުމަކީ ނިރުބަވެރިކަމުގެ އަމަލެއް ކަމަށެވެ. އަދި އެ މައްސަލަ ފުލުހުންނަށް ހުށަހަޅައިގެން ކުރިއަށް ގެންދިއުމަށް ނިމާލް އެދިވަޑައިގެންނެވިއެވެ.
