ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ތާރީޚެއްގައި ބޭއްވުމާ މެދު ގޮތެއް ނިންމުމަށް ރެފަރެންޑަމް ވޯޓު ނެގުމާއި ދެކޮޅަށް މާޗު މަހުގެ 21 ވަނަ ދުވަހު ބޮޑު މުޒާހަރާއެއް ކުރުމަށް އެމްޑީޕީ އިން ނިންމައިފި އެވެ.
އެމްޑީޕީއިންް ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އެކަން ހާމަ ކުރެއްވީ، ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޛާކިރު އެވެ. މައުރޫފް ވިދާޅުވީ، ހުދުމުޚުތާރު ވެރިކަމަކަށް ރާއްޖެ އަނބުރާލުމަށް ކުރާ މަސައްކަތާ ދެކޮޅަށް ދިވެހި ރައްޔިތުން ތެދުވާން ޖެހޭ ކަމަށާއި، އެކަމުގައި އެމްޑީޕީ އިން ކުރަމުން އަންނަ މަސައްކަތުގައި ބައިވެރިވެ، ދެ އިންތިޚާބު އެއްކޮށްލުމަށް ނޫނެކޭ ބުނަން ޖެހޭ ކަމަށް މައުރޫފް ވަނީ ވިދާޅުވެފަ އެވެ.
މައުރޫފް ވިދާޅުވީ، ފެންނަ ނުފެންނަ ވޯޓު ހުއްޓުވުމަށްޓަކައި އެމްޑީޕީ އިން ގިނަ މަސައްކަތެއް ކުރަމުންދާ ކަމަށެވެ. އެގޮތުން މުޅި ރާއްޖޭގައި ކެމްޕެއިން ހަރަކާތްތަކެއް ކުރިއަށް ގެންދަން ނިންމާފައިވާއިރު މާޗު މަހުގެ 21 ވަނަ ދުވަހު އެކަމާ ދެކޮޅަށް ބޮޑު މުޒާހަރާއެއް ވެސް ބާއްވަން ނިންމާފައިވާކަން މައުރޫފް އިއުލާންކުރެއްވި އެވެ.
މީގެ އިތުރުން މިދިޔަ ހުކުރު ދުވަހުގެ ރޭ ބޭއްވި އެމްޑީޕީގެ ގައުމީ މަޖިލީހުގެ ބައްދަލުވުމުގައި ވަނީ ކުރިއަށް އޮތް ލޯކަލް ކައުންސިލް އިންތިހާބާއެކު ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ތާރީހެއްގައި ބޭއްވުމާ މެދު ގޮތެއް ނިންމަން ނަގާ ވޯޓުގައި އެކަމަށް ނޫނެކޭ ބުނުމަށް ނިންމައިފަ އެވެ.
ފާހަގަކޮށްލެވޭ ގޮތުގައި ޤާނޫނުއަސާސީ އަށް ބަދަލު ގެނެސް ބިލު ދިރާސާ ކުރުމަށާއި ބިލާއި މެދު މަޝްވަރާކުރުމަށް އެކަށީގެންވާ ވަގުތާއި ފުރުސަތު ދިނުމުގެ ބަދަލުގައި އަވަސް އަރުވާލައިގެން ބިލު ފާސްކުރުމަށް ސަރުކާރު ހިންގާ ޕާޓީ ޕީއެންސީގެ މެންބަރުން ވަނީ މަސައްކަތް ކޮށްފަ އެވެ.
އެމްޑީޕީ އިން ފާހަގަކުރާ ގޮތުގައި ސަރުކާރުން އަމާޒު ހިފާފައި ވަނީ އެ ދެ އިންތިޚާބު އެއްކޮށްލަން ކަމަށް ވާއިރު ކައުންސިލް އިންތިޚާބާއި އެކު ރިފަރަންޑަމް އެއް ނެގުމަކީ ރައްޔިތުންނަށް މައުލޫމާތު ދިނުމަށާއި ހޭލުންތެރިކުރުމަށް އަދި ކެމްޕެއިން ކުރުމަށް އެކަށީގެންވާ މުއްދަތެއް ނޫން ކަމަށެވެ.
