އެމެރިކާ އިން އީރާނަށް އެއްގަމު މަގުން އެރިޔަސް އެކަން ހުއްޓުވޭނެ ކަމަށާއި، އެކަމަށް އެ ގައުމު ތައްޔާރު ކަމަށް އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވެެއްޖެއެވެ.
އެމެރިކާ އާއި އިސްރާއީލުން އަސްކަރިއްޔާއިން އީރާނަށް ވަރުގަދަ ހަމަލާތަކެއް ދެމުން އަންނަ ދަނޑިވަޅެއްގައި އެންބީސީއަށް ދެއްވި އިންޓަވިއުއެއްގައި އަރަގްޗީ ވިދާޅުވީ، އެމެރިކާ އާއި އިޒްރޭލުން ފެށި ހަނގުރާމަ މުޅި ސަރަހައްދަށް ހަލުވިކަމާއެކު ފެތުރިފައިވާއިރު، އެމެރިކާ ސިފައިން އެއްގަމަށް އަރައިގަތަސް އެކަމަށް އީރާނުން އޮތީ ތައްޔާރަށް ކަމަށެވެ.
އެމެރިކާ އިން އީރާނަށް އަރައިގަނެ ހަމަލާއެއް ދީފާނެ ތީ ބިރު ގަންނަތޯ ސުވާލު ކުރުމުން އަރަގްޗީ ވަނީ ވަރަށް އެކަަމަށް ވަރަށް ރަނގަޅު ރައްދު ދެއްވާފައެވެ.
”ނޫން، އަޅުގަނޑުމެން އިންތިޒާރު ކުރަމުން މިދަނީ، އަޅުގަނޑުމެންނަށް އެ މީހުންނާ ކުރިމަތިލެވޭނެކަމުގެ ޔަގީންކަން އޮތުމުން. އެއީ އެ މީހުންނަށް ވަރަށް ބޮޑު ކާރިސާއަކަށް ވާނެ،“ އޭނާ ވިދާޅުވިއެވެ.
އަރަގްޗީ ވިދާޅުވީ އެމެރިކާ އާއި އިސްރާއީލުން ހަމަލާ ދިން ނަމަވެސް އީރާނުން ހަނގުރާމަ ހުއްޓާލުމަށް އެދިފައި ނުވާ ކަމަށެވެ.
”އަޅުގަނޑުމެން އެންމެ ފަހުން ވެސް ހަނގުރާމަ ހުއްޓާލުމަށް އެދިފައެއް ނުވޭ. މީގެ ކުރިން އިސްރާއީލުން ހަނގުރާމަ ހުއްޓާލުމަށް އެދުނެވެ. 12 ދުވަސް ފަހުން އެއްވެސް ޝަރުތެއް ނެތި ހަނގުރާމަ ހުއްޓާލުމަށް އެމީހުން އެދުނު، އެކަމަކު އަޅުގަނޑުމެން އެ ހަމަލާތަކާ ދެކޮޅު ހެދީ،“ މިދިޔަ އަހަރުގެ ޖޫން މަހު އިސްރާއީލާއި އެމެރިކާ ސިފައިން އީރާނުގެ ނިއުކްލިއާ މަރުކަޒުތަކަށް އަމާޒުކޮށް 12 ދުވަހަށް ދެމިގެންދިޔަ ހަނގުރާމައަށް އިޝާރާތް ކުރައްވައި އޭނާ ވިދާޅުވިއެވެ.
