މިދިޔަ ހޮނިހިރު ދުވަހު އެމެރިކާ އާއި އިސްރާއީލުގެ އަސްކަރިއްޔާއިން އިރާނަށް ދޭން ފެށި ވަރުގަދަ ހަމަލާތަކު އަސަރު އިންޑިއާ ކަނޑަށް ފޯރުމަކީ ކަންބޮޑުވުމެއް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ނަޝީދު މިހެން ވިދާޅުވެފައިވާއިރު ސްރީ ލަންކާގެ ކަނޑުގެ ސަރަހައްދާ ކައިރިއަށް އެމެރިކާގެ އަސްކަރިއްޔާއިން ދިން ހަމަލާއެއްގައި ވަނީ އިރާނުގެ މަނަވަރެއް ފައްތާލާފަ އެވެ. އީރާނުގެ މަނަވަރު ފައްތާލީ ޓޯޕިޑޯއަކުން ދިން ހަމަލާއެއްގައި ކަމަށް އެމެރިކާއިން ވަނީ ބުނެފަ އެވެ. މި ހަމަލާއަށް ފަހު އިރާންގެ އިތުރު މަނަވަރެއް ލަންކާގައި މިހާރު ވަނީ ބަނދަރުކޮށްފަ އެވެ.
މެދުއިރުމަތީގެ ހަަމަނުޖެހުންތަކާއި ހަނގުރާމައާ ގުޅޭ ގޮތުން އިންޑިއާގެ މީޑިއާއަކަށް ދެއްވި އިންޓަވިއުއެއްގަައި ނަޝީދު ވިދާޅުވީ މެދުއިރުމަތީގެ ހާލަތާ މެދު ކަންބޮޑުވެވަޑައިގަންނަވާ ކަމަށާއި އެ ހަމަނުޖެހުންތަކުގެ ގެއްލުމާއި އަސަރު ކުރާ ގިނަ ގައުމުތަކުން އެ ހަމަނުޖެހުންތަކުގެ ތެރެއަށް ވަންނަން ވެސް ބޭނުން ނުވާ ކަމަށެވެ.
ނަޝީދު ވިދާޅުވީ މިއީ އިޒްރޭލުން ފެށި ހަނގުރާމައެއް ކަމަށާއި މި ހަނގުރާމައިގެ ތެރެއަށް އެހެން ގައުމުތައް ވައްދަނީ ވެސް އިޒްރޭލުން ކަމަށެވެ. އަދި އިންޑިއާ ކަނޑުގެ ސަރަހައްދުގެ ގައުމުތައް މި ހަނގުރާމައިގެ ތެރެއަށް ނުވައްދާނެ ކަމަށް އުއްމީދުކުރާ ކަމަށާއި މިކަން އެމެރިކާ އާއި އިޒްރޭލަށް ވެސް ވިސްނޭނެ ކަމަށް އުއްމީދުކުރައްވާ ކަމަށްވެސް ވިދާޅުވި އެވެ.
އެމެރިކާ އާއި އިޒްރޭލު ގުޅިގެން އިރާނުގެ ވެރިކަން ބަދަލުކުރުމުގެ ބޭނުމުގައި އެގައުމަށް ހަމަލާތައް ދޭން ފެށީ މިދިޔަ ހޮނިހިރު ދުވަހު އެވެ. ހަމަލާތަކުގައި އީރާންގެ ރޫހީ ލީޑަރު އާޔަތުﷲ އަލީ ޚާަމަނާއީ އާއި އިސް އެތައް ވެރިންނެއް އަވަހާރަކޮށްލާފައި ވާއިރު އެމެރިކާއިން ބުނެފައިވަނީ މިހާރު އީރާންގެ މިސައިލް ހަމަލާތައް ވެސް މަދުވާން ފަށާފައިވާ ކަމަށާއި ހަނގުރާމައިގެ ކުރީކޮޅާ އަޅާބަލާއިރު މިސައިލް ހަމަލާތައް މިހާރު 90 ޕަސެންޓް މަދު ކަމަށެވެ. އަދި ޑްރޯން ހަމަލާތައް ވެސް މިހާރު 83 ޕަސެންޓް މަދުވެއްޖެ ކަމަށް ބުންޏެވެ.
އީރާނުން ރައްދުގައި ދަނީ އިޒްރޭލަށް އަދި ގަލްފުގައިވާ އެމެރިކާގެ މަސްލަހަތު ހިމެނޭ ތަންތަނަށް ވަރުގަދަ ހަމަލާތައް ދެމުންނެވެ. މި ހަމަލާތަކުގައި ބަހްރެއިނާއި ކުވައިތު އަދި ގަތަރު ފަދަ ގައުމުތަކުގައިވާ އެމެރިކާގެ އަސްކަރީ މަރުކަޒުތަކަށް ގެއްލުންތައް ދީފައި ވާއިރު އެމެރިކާ ސިފައިންގެ ހަ މީހަކު މަރުވެފައިވެ އެވެ.
އީރާނުން މީގެ ކުރިން ވަނީ ކިތަންމެ ދުވަހަކު ހަނގުރާމަ ކުރަން ޖެހުނަސް އެކަމަށް ތައްޔާރު ކަމަށާއި ހަނގުރާމަ ހުއްޓާލަން އަމިއްލައަށް ނޭދޭނެ ކަމަށް ވެސް ބުނެފަ އެވެ. އެ ގައުމުގެ ފޮރިން މިނިސްޓަރު އައްބާސް އަރަޣްޗީ ވިދާޅުވީ އީރާނުން އިންތިޒާރުކުރަނީ އެމެރިކާ ސިފައިން އެ ގައުމަށް އަރާނެ ދުވަހަކަށް ކަމަށާއި އޭރުން ރަނގަޅު ފިލާވަޅެއް ދޭނެ އެވެ.
މި ހަނގުރާމައިގެ ސަބަބުން މެދުއިރުމަތީގެ ސަލާމަތީ މަސްރަހު ވަނީ މުޅިން ގޯސްވެ، ކުރިއަށް އޮތް ތަނުގައި ހަނގުރާމަ އިތުރަށް ފުޅާވެދާނެކަމުގެ ބިރު ވަނީ ބޮޑުވެފަ އެވެ.
