ނިމިދިޔަ، ރައީސް އިބްރާހިމް މުހައްމަދު ސޯލިހްގެ ވެރިކަމުގައި ބަޖެޓު ސަޕޯޓުގެ ގޮތުގައި އިންޑިއާއިން ނެގި 200 މިލިއަން ޑޮލަރުގެ ލޯނުގެ ތެރެއިން 150 މިލިއަން ޑޮލަރު ދެއްކުން ފަސްކޮށްދޭން ދިވެހި ސަރުކާރުން ރަސްމީކޮށް އެދިފައިވާ ކަމަށް ހާރިޖީ ވަޒީރު މޫސާ ޒަމީރް ވިދާޅުވެއްޖެއެވެ.
ޒަމީރު މިފަދައިން ވިދާޅުވީ، މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި، ނޫސްވެރިޔަކު ކުރެއްވި ސުވާލަކަށް ޖަވާބު ދެއްވަމުންނެވެ.
ޒަމީރު ވިދާޅުވީ، މިދިޔަ ސަރުކާރުން 2019 ވަނަ އަހަރު ވެރިކަމަށް އައިސް ބަޖެޓް ސަޕޯޓުގެ ގޮތުގައި 200 މިލިއަން ޑޮލަރު އިންޑިއާ ސަރުކާރުން ނަގާފައިވާ ކަމަށެވެ. އަދި އޭގެތެރެއިން 50 މިލިއަން ޑޮލަރު މިދިޔަ ޖަނަވަރީ މަހުގެ ތެރޭގައި މި ސަރުކާރުން ދައްކާފައިވާ ކަމަށެވެ.
އިތުރަށް ޒަމީރު ވިދާޅުވީ، ބާކީ އޮތް 150 މިލިއަން ޑޮލަރު ދެއްކުން ފަސްކޮށްދިނުމަށް އެދިފައިވާ ކަމަށެވެ. އަދި އޭގެ ބަދަލުގައި އިންޑިއާ ސަރުކާރުން އެއްވެސް ކަމަކަށް އެދިފައިނުވާ ކަމަށް ޒަަމީރު ވިދާޅުވިއެވެ.
”މި 200 މިލިއަން ޑޮލަރު މިދިޔަ އަހަރާ ހަމައަށް ރޯލް އޯވާ (ފަސްކޮށް ދެމުން) އައީ. އެކަމަކު މި އަހަރުގެ ޖެނުއަރީ މަހު ވަނީ މީގެ އެއްބައި ދައްކާފައި. އަދި ބާކީ އޮތް 150 މިލިއަން ޑޮލަރު ފަސްކޮށްދޭން ވާނީ އެދިފަ،“ ޒަމީރު ވިދާޅުވިއެވެ.
ދާދި ފަހުން އިންޑިއާ އަށް ކުރެއްވި ރަސްމީ ދަތުރުފުޅުގައި މި ލޯން ފަސްކޮށްދިނުމާ ގުޅޭ ގޮތުން އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރު އާ ވެސް ވަޒީރު މަޝްވަރާ ކުރެއްވި ކަމަށް ވެސް ވިދާޅުވިއެވެ. އަދި ލޯނު ފަސްކޮށްދޭން އެދުމުންޖައިޝަންކަރު ވަނީ ރާއްޖެއަށް ކުރިމަތިވާ ބޮޑެތި ކަންކަމުގައި އަބަދުވެސް އެހީތެރިވެދޭނެކަމުގެ ޔަގީންކަން ދެއްވާކަމަށާއި، ބޮންޑު ރޯލް އޯވާކޮށްދެއްވާނެ ކަމުގެ ފެހި ސިގްނަލް އިންޑިއާއިން ލިބިފައިވާ ކަމަށް ވެސް ވަޒީރު ވިދާޅުވިއެވެ.
