އެގޮތުން ކޯޓުގައި އިއްޔެ ސީބީއައިއިން ބުނެފައިވަނީ 1994 އެ މައްސަލައަކީ ކެރަލާގެ އޭރުގެ އިސް ފުލުސް އޮފިސަރެއްކަމުގައިވާ އެސް ވިޖަޔަން ނަމަކަށްކިޔާ އޮފިސަރަކު އުފެއްދި މައްސަލައެކެވެ.
ސީބީއައިއިން ބުނެފައިވަނީ އެންމެ ފުރަތަމަ އެ ފުލުސް އޮފިސަރު ރަޝީދާގެ ޕާސްޕޯޓާއި އެހެނިހެން ލިޔެކިޔުންތައް ހިފެހެއްޓީ އޭނާއާއި ލޯބީގެ ނަހަލާލު ގުޅުންތަކެއް ބޭއްވުމަށް ރަޝީދާއަށް ހުށަހެޅި ހުށަހެޅުމަށް ރަޝީދާ އިންކާރު ކުރުމުންނެވެ.
އެއަށްފަހު އެ ފުލުސް އޮފިސަރުގެ އޯޑަރަށް ކެރަލާ ފުލުހުން ރަޝީދާއާއި ފައުޒިއްޔާއަށް ފާރަލަމުންދިޔަކަމަށާއި ނަމަވެސް ތުހުމަތުވާކަމެއް ނުވަތަ ޝައްކުވާ އެއްވެސް ކަމެއް ނުފެނުމުން އެންމެ ފުރަތަމަ ރަޝީދާ ހައްޔަރުކުރީ ވިސާ ގަވާއިދާއި ޚިލާފަށް ގިނަ ދުވަހު އިންޑިއާގައި މަޑުކުރިކަމުގެ ތުހުމަތުގައެވެ. އަދި ރަޝީދާއާއި ފައުޒިއްޔާގެ މައްޗަށް ފޭކު ރިޕޯޓެއް އުފައްދައި ދެމީހުން ހައްޔަރުކޮށް އިތުރަށް ތަހުޤީޤުކުރާ މައްސަލައެއްގެ ގޮތުގައި ކުރިއަށްގެންދިޔައިރު އިންޑިއަން ސްޕޭސް ރިސާޗް އޮގަނައިޒޭޝަން (އިސްރޯ)ގެ ބައެއް ސައިންޓިސްޓުންނާއި ފައުޒިއްޔާއާއި ރަޝީދާ ރަހުމަތްތެރިކަން އޮންނަކަން އެނގުނު ހިސާބުން އިސްރޯގެ ސައިންސްވެރިޔާ ނަމްބީ ނަރަޔަން ހިމެނޭހެން އަނެއްކާވެސް ފޭކު ކޭސްއެއް އުފައްދައި އެ ތިން މީހުން ހައްޔަރުކުރީއެވެ.
ސީބީއައިއިން ވަނީ މި މައްސަލައިގާ ފަސް މީހެއްގެ މައްޗަށް ދައުވާކޮށްދިނުމަށް ހުށަހަޅާފައެވެ. އެއީ ފުލުހުންގެ ކުރީގެ ދެ ޑިރެކްޓަރ ޖެނެރަލުން ކަމުގައިވާ އާރް ބީ ސްރީކުމާރާއި ސިބީ މެތިއުގެ އިތުރުން ކުރީގެ ދެ ސުޕްރިޓެންޑެންޓް އޮފް ޕޮލިސް އެސް ވިޖަޔަން އާއި ކޭކޭ ޖޯޝުއާގެ އިތުރުން ކުރީގެ އިންޓެލިޖަންސް އޮފިސަރު ޕީ އެސް ޖަޔަޕްރަކާޝްއެވެ.
1994ގައި އިންޑިއާގެ ކެރެލާ ސްޓޭޓްގައި ހައްޔަރުކޮށް، ފައުޒިއްޔާމެން ޖަލަށްލީ އިސްރޯގެ ސިއްރުތަކެއް ދިވެހި ސަރުކާރު މެދުވެރިވެ ޕާކިސްތާނަށް ފޯރުކޮށްދޭން އުޅުނުކަމުގެ ތުޙުމަތުގައެވެ.
ފައުޒިއްޔާމެން މިނިވަންވީ ޖަލުގައި ދެ އަހަރު ހޭދަކުރިފަހުން، އިންޑިއާގެ ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި) އިން ކުރި ތަޙްޤީޤަކުންނެވެ. އެ ތަޙްޤީޤުން އެނގުނީ އެއީ ކެރަލާގެ ފުލުހުން އަމިއްލައަށް އުފައްދައިގެން އުޅުނު މައްސަލައެއްކަމެވެ.
އެއަށްފަހު އެ މައްސަލައިގާ ކެރެލާ ފުލުހުންގެ ބައިވެރިވުން އޮތް މިންވަރު ބެލުމަށް އިންޑިއާގެ ސުޕްރީމް ކޯޓުން ސީބީއައިއަށް އެންގިއެވެ.
ކުރީގެ ފިލްމީތަރި ފައުޒިއްޔާ ނިޔާވީ 30 އޯގަސްޓް 2022 ވަނަ އަހަރުގައެވެ.
އޭގެ ކުރިން 2021 ވަނަ އަހަރުގެ އޭޕްރީލްގައި ފައުޒިއްޔާ އިންޑިއާގެ ދަ ހިންދޫއަށް ދީފައިވާ އިންޓަވިއުއެއްގައި ބުނެފައިވާގޮތުގައި އެކަމުގެ ބަދަލު ހޯދަން ކޯޓަށް ހުށަހެޅުމަށް ވަކީލުންނާއި ވާހަކަދައްކަމުންދާކަމުގައި ބުނެފައިވެއެވެ. އެހެންނަމަވެސް އެ މައްސަލަ ކޯޓަށް ހުށަހެޅިކަން އިންޓަނެޓުގެ އާކައިވުން އެނގޭކަށް ނެތެވެ.
ފައުޒިއްޔާ ބަދަލު ހޯދަން ކޯޓަށް ދާން ނިންމިކަން އޭރު ހާމަކުރިއިރު، އެ މީހުންނާ އެކު ދެން ހައްޔަރުކުރި އިންޑިއާގެ ސައިންޓިސްޓް، ނަބްމީއަށް ބަދަލުގެ ގޮތުގައި ފަސް މިލިއަނަށް ވުރެ ގިނަ އިންޑިއާ ރުޕީސް އިންޑިއާ ސަރުކާރުން ދީފައިވެއެވެ. އެ ފައިސާ ދިނީ އިންޑިއާގެ ސުޕްރީމް ކޯޓުން 2018 ވަނަ އަހަރު ކުރި ހުކުމަކާއި ގުޅިގެންނެވެ.
