ކައިވެނިތައް ރޫޅެން މެދުވެރިވާ އެންމެ ބޮޑު އެއް ސަބަކަށް ތިމާއަކީ ކާކުކަން ނުވެސް އެނގޭ އަދި ދުވަހަކު ބައްދަލުވެސް ނުވާ މީހުންދޭ ލަފައާއި އެއްގޮތަށް ކަންކަން ކުރުމުން މެދުވެރިވާ މައްސަލަތައް މިއޮތީވެފައެވެ. އެކަން އެގޮތަށް މެދުވެރިވަނީ މާހެޔޮއެދޭ މީހަކުކަމަށް ހެދިގެން އޭނާ ދައްކާ ވާހަކަތަށް މާބޮޑަށް ހެއްލެވޭތީއެވެ.
މިހާރަކަށް އައިސް ހުސްވަގުތެއް ލިބުމުންނާއި ހުސްވަގުތު ހޯދައިގެންވެސް ގިނަ ބައަކު ވަގުތު ހޭދަކުރަނީ ފޭސްބުކް ފަދަ ސޯޝަލް މީޑިއާގައި މީސްމީހުންނާއި މަޝްވަރާ ކުރުމަށެވެ. ޗެޓް ކުރުމަށެވެ. މިގޮތުން އެމީހަކު އެއްގޮތަކަށްވެސް ނުދަންނަ ގިނަ ބައަކާއިވެސް މަޝްވަރާ ކުރެއެވެ. އެމީހުންނަށް ތިމާގެ އަމިއްލަ ދިރިއުޅުމުގެ ވާހަކަތައްވެސް ކިޔައިދެވެއެވެ.
އެއީ ހެދޭ ވަރަށް ބޮޑު ގޯހެކެވެ. ނުވެސް ދަންނަ މީހަކު ކޮންމެފަދަ ލަފައެއްވެސް ދީފާނެއެވެ. އެކަމަކުން އަނެކާއަށް ލިބިދާނެ ގެއްލުމަކަށް ނުވިސްނާނެއެވެ. ވިސްނި ނަމަވެސް ތިމާ ދަންނަ، ހެޔޮ ލަފާ މީހުން ވިސްނާ ވަރަކަށް ނުވިސްނާނެއެވެ. ވީމާ ކަންކަމުގައި މަޝްވަރާ ކުރަން އެންމެ ރަނގަޅީ އެމީހަކު ރަނގަޅަށް ދަންނަ ހެޔޮ ލަފާ މީހުންނާއިއެވެ. ޚާއްޞަކޮށް މޫނާއި މޫނު ދިމާކޮށްގެން ތިބެއެވެ.
ފުރުޞަތުތައް ހުޅުވާލެވިފައި މިވާ ދުނިޔޭގައި ސޯޝަލް މީޑިއާ ބޭނުން ނުކޮށް އުޅުމަކީ ކުރަން އެހައި ފަސޭހަ ކަމަކަށް ނުވެދާނެއެވެ. ރަނގަޅު ކަންކަން ކުރުމަށް، އިސްލާމް ދީން ހުއްދަކުރާ ކަންކަން ކުރުމަށް ސޯޝަލް މީޑިއާ ބޭނުންކުރުމަކީ އެއްވެސް މައްސަލައެއް ނޫނެވެ. ހަމަ ބޭނުންކުރަންވީއެވެ. މައްސަލައަކަށްވެގެންދަނީ ސޯޝަލް މީޑިއާ ބޭނުން ކުރެވޭ ގޮތެވެ. ބަދަލުކުރަން ޖެހިފައި މިވަނީ ދިރިއުޅެން ކުރަންޖެހޭ އެންމެ މުހިންމު ކަމަކީ ސޯޝަލް މީޑިއާގައި ވަގުތު ހޭދަކުރުން ކަމަށް ދެކޭ ދެކުމެވެ.
ދިރިއުޅުމުގައި ދިމާވާ ކަންކަމަށް މަޝްވަރާކުރަންވާނީ އެކަންކަމުގެ ތަޖުރިބާ ލިބިފައިވާ އަދި ﷲ ތަޢާލާއަށް ތެދުވެރި ތަޤްވާވެރިންނާއިއެވެ. އެކަމަށް ސަމާލުކަން ނުދީ މީސްމީހުންނާއި މަޝްވަރާކުރުމުން ކަންކަން ޙައްލުވުމުގެ ބަދަލުގައި ކަންކަން ދަނީ ގޯހުން ގޯހަށެވެ. ޙައްލުކުރެވޭނެ ފެންވަރުގައި ހުންނަ މައްސަލަތައްވެސް ހޫނުވެ އޮންނަނީ ވަރިއާއި ހަމައަށް ކަންކަން ގޮސްފައެވެ.
– އިސްލާމީ ތިލަފަތުގެ ދަރުސަކުން
