އިމިގްރޭޝަނަށް 75 އަހަރު: ރައީސްގެ ޝުކުރު ހިދުމަތްތެރީންނަށް އަދާ ކުރައްވައިފި
ދެންމެ | 24 މާރޗް 2025

އިމިގްރޭޝަނަށް 75 އަހަރު ފުރުމުގެ މުނާސަބަތުގައި ރައީސް ޑރ. މުހައްމަދު މުއިއްޒު އެ ދާއިރާގެ ހިދުމަތްތެރީންނަށް ޝުކުރު އަދާކުރައްވައިފިއެވެ.

ރައީސް ޑރ. މުއިއްޒުގެ ރަސްމީ އެކްސް އެކައުންޓުން ހިއްސާކުރެއްވި ޕޯސްޓެއްގައި ވަނީ އިމިގްރޭޝަންގެ އަހަރީ ދުވަހުގެ ތަހުނިޔާ އަރިސް ކުރައްވައިފައެވެ.

‎ރައީސްގެ ޕޯސްޓުގައި އިމިގްރޭޝަންގެ ހިދުމަތް ރާއްޖެއިން ލިބެން ފެށިތާ 75 އަހަރު ފުރޭ އަލިމަސް ޔޫބީލް މުނާސަބަތުގައި، އެ ދާއިރާގައި ކުރީން މަސައްކަތްކޮށްދެއްވި، އަދި މިހާރުވެސް މަސައްކަތުގައި ދެމިތިއްބެވި ހުރިހާ ހިދުމަތްތެރީންނަށް މަރްހަބާ ވިދާޅުވެ، ޝުކުރު ދަންނަވާފައިވެއެވެ.

އިމިގްރޭޝަންގެ އަހަރީ ދުވަހާ ގުޅިގެން ކޮންޓްރޯލާ ޖެނެރަލް އޮފް އިމިގްރޭޝަން، ކޮމިޝަނާ އޮފް ޕޮލިސް (ރިޓަޔާޑް) އަހްމަދު ފަސީހް ވިދާޅުވީ އިމިގްރޭޝަންގެ 75 އަހަރުގެ ދިގު ތާރީހުގައި ގައުމުގެ ދޮރާށިތައް ރައްކާތެރިކޮށް ބެލެހެއްޓުމުގައި އާއި ރާއްޖެއިން ބޭރަށް ދަތުރުފަތުރުކުރާ ދިވެހިންނާއި ރާއްޖޭގައި މަސައްކަތްކުރުމަށް އުޅޭ ބިދޭސީންނަށް ބޭނުންވާ ގިނަ ހިދުމަތްތަކެެއް ޒަމާނުއްސުރެ ފޯރުކޮށްދެމުންދާ ކަމަށެވެ.

އުއްމީދަކީ ކުރިއަށް އޮތް ތަނުގައި ވެސް އިމިގްރޭޝަންގެ ހިދުމަތްތައް އިތުރަށް ފުޅާވެ ލުއިފަސޭހަ ހިދުމަތްތަކެއް ފޯރުކޮށްދެވި ރާއްޖޭގެ ސަލާމަތާއި ރައްކާތެރިކަން ދެމެހެއްޓުމަށް ކުރަމުންދާ މަސައްކަތުގައި އިތުރު ކުރިއެރުންތައް ލިބިގެންދިއުން ކަމަށް އޭނާ ވިދާޅުވިއެވެ.

‎އަލިމަސް ޔޫބީލް ފާހަގަކުރުމަށް އެކި ދުވަސްތަކަށް ބަހާލައިގެން ގިނަ ހަރަކާތްތަކެއް ކުރިއަށްގެންދިއުމަށް މޯލްޑިވްސް އިމިގްރޭޝަނުންވަނީ ނިންމައިފއެވެ. އެގޮތުން ރަސްމީ ޖަލްސާއެއް ބޭއްވުމާއި، ފަންފެއާ، ޗެރިޓީ ރަން، އަދި ކުޑަކުދިންގެ ހަވީރީ ކުއިޒް އެއް ކުރިއަށްގެންދިއުމަށްވެސް ވަނީ ހަމަޖެހިފައެވެ.

‎ރާއްޖޭގައި އިމިގްރޭޝަންގެ ހިދުމަތް ދޭން ފެށީ މާޗް 24، 1950 ގައެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!