އައްޑޫ ސިޓީގެ ރަށްތަކުގައި ވަކިވަކި ކައުންސިލްތަކެއް އޮންނަން ރައްޔިތުންނަށް ފެނޭތޯ ބެލުމަށް އަންނަ އޮކްޓޯބަރު މަހު ފެންނަ ނުފެންނަ ވޯޓެއް ނަންގަވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
”ރައްޔިތުންނާ އެކު“ މި ނަމުގައި ރައީސް މުއިއްޒު ކުރިއަށް ގެންދަވާ ޕޮޑްކާސްޓުގައި މިއަދު ވާހަކަފުޅު ދައްކަވަމުން އެމަނިކުފާނު ވިދާޅުވީ ރައްޔިތުން ބޭނުންވަނީ އައްޑޫގެ ކޮންމެ ރަށަކަށް ވަކިން ކައުންސިލެއް އުފައްދަންތޯ ނުވަތަ މިހާރު އޮތް ގޮތަށް އައްޑޫ ސިޓީ ކައުންސިލްގެ ގޮތުގައި އޮންނަންތޯ ބަލަން އާއްމު ވޯޓެއް ނަންގަވާނެ ކަމަށެވެ.
އެވޯޓްގައި ވަކިވަކި ކައުންސިލްތައް އުފައްދަން ރައްޔިތުން ވޯޓް ދިން ނަމަވެސް ރަށްރަށުގެ ކައުންސިލްތައް އުފައްދާނީ ކޮންމެ ރަށެއްގެ ނަމުގެ ކުރިއަށް އައްޑޫ އިތުރުކޮށްގެން ކަމަށް ރައީސް ވިދާޅުވިއެވެ. ”އަޅުގަނޑު ބޭނުމެއް ނޫން ދެން އަންނަ ބަދަލެއްގެ ސަބަބުން އައްޑޫގެ ނަން އުނިވެގެންދާކަށް.“ ރައީސް ވިދާޅުވިއެވެ.
”އައްޑޫ މަރަދޫ ފޭދޫ އައްޑޫ މަރަދޫ މިއިން ކޮންމެ ތަނެއްގަ ވަކިން ކައުންސިލްތަކެއް ގޮތަށް ވަކި ރަށްތަކެއް ގޮތަށް ކައުންސިލް އުފެދިގެން ވަކި ކައުންސިލްތަކެއް ގޮތަށް އަންނަންތޯ ނޫންތޯ މި އަހަނީ. ދެން ހިތަދޫގައި ހިތަދޫ ކައުންސިލް ހިތަދޫ ސިޓީ ކައުންސިލްގެ ގޮތަށްތޯ ނޫނިއްޔާ އައްޑޫ ސިޓީ ކައުންސިލްގެ ގޮތަށްތޯ އޮންނަންވީ؟ ހިތަދޫގައި ހިތަދޫ ސިޓީއަކީ މިހާރުވެސް ސިޓީ ކައުންސިލަކަށް ހެދޭނެ ތަނެއް ޤާނޫނާ އެއްގޮތަށް. އެހެންވީމަ އެ ވޯޓު އަޅުގަނޑު ނަގަން ބޭނުން. އަޅުގަނޑު ބޭނުން އައްޑޫ ރައްޔިތުން ބޭނުންވާ ގޮތަކަށް އެކަން ކުރަން. އެ ވޯޓުގެ ނަތީޖާ މިއަންނަ އޮކްޓޫބަރު މަހުގެ އެބަ ބޭނުންވޭ ސަރުކާރުގެ ފަރާތުން އިލެކްޝަންސް ކޮމިޝަނަށް ދޭން.“ ރައީސް ވިދާޅުވިއެވެ.
ރައީސް ވިދާޅުވީ މިއީ ވަރަށް މުހިންމު ތާރީޚީ ވޯޓެއް ކަމަށާއި މިކަން މިގޮތަށް ކުރުމުގެ ސަބަބުން އައްޑޫގެ ކުރިއެރުމަށް ކުރަން ހުރި ކަންކަމުގައި ރައްޔިތުން އެދޭގޮތަށް ކަންކަން ކުރެވޭނެ ކަމަށެވެ.
”މިސާލަކަށް އަޅުގަނޑަށް އެންމެ ބޮޑަށް ލިބޭ އެއްޝަކުވާއަކީ ހުޅުދޫގައި، ހުޅުދޫ މީދޫގައި ވަކިން ޚާއްޞަކޮށް މިއޮންނަ އޮތުމުގެ ތެރެއިން ވަރަށް ބޮޑަށް ނިގްލެޓް ކުރެވިފައި ނޫނިއްޔާ ކަންނުކުރެވި އޮންނަކަން އައްޑޫ ސިޓީ ކައުންސިލްގެ ދަށުގައި ހުޅުދޫ މީދޫ އޮންނާތީ. ލިބެންޖެހޭ ސަމާލުކަން ނުލިބުމާ މިކަހަލަ ވަރަށް ގިނަ ވާހަކަތައް އާދޭ. ހަމަ އެގޮތަށް ފޭދޫން ވެސް އަޅުގަނޑަށް އެކަން ރައްޔިތުންގެ ކިބައިން އާދޭ. އެހެންވެ ގަސްތުކުރީ ހުރިހާ ރަށެއްގަ ވޯޓެއްގެ ނަގާނީ ރައްޔިތުން ބޭނުންވާ ގޮތެއް ރައްޔިތުން ނިންމަވާނީ. ނިންމަވާ ގޮތަކަށް އަޅުގަނޑުމެން ކުރިއަށް ދާނަން.“ ރައީސް ވިދާޅުވިއެވެ.
އާއްމު ރައްޔިތުންގެ ފެންނަ ނުފެންނަ ވޯޓް ނެގުމަށް މަގުފަހިކުރުމަށް ސަރުކާރުން މިހަފްތާގައި ވަނީ ގާނޫނެއް ފާސްކޮށްފައެވެ. އެގާނޫނު އިއްޔެ ރައީސް ތަސްދީގު ކުރައްވާ މިހާރު ވަނީ އަމަލު ކުރަން ފަށާފައެވެ.
ކައުންސިލް އިންތިހާބު އަންނަ އަހަރުގެ އޭޕްރީލް މަހު ބޭއްވުމަށް އިލެކްޝަންސް ކޮމިޝަނުން އަންނަނީ ތައްޔާރުވަމުންނެވެ.
