ރައްޔިތުންނަށް ހިދުމަތްދިނުމަށް ހަދާފައިވާ ކުންފުނިތަކުގެ ވެރީންގެ މައްޗަށް ސާބިތުވާ ކޮރަޕްޝަންގެ މައްސަލަތަކުގައި އެ މީހުންގެ މައްޗަށް އެ ކުށާ ގުޅިގެން ގާނޫނުގައި ކަނޑައަޅާފައިވާ އެންމެ ހަރުކަށި އަދަބު ދޭން ޖެހޭ ކަމަށް ކްރިމިނަލް ކޯޓުގެ އިސް ގާޒީ އާދަމް މުހައްމަދު ވިދާޅުވެއްޖެއެވެ.
ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަހްމަދު ސައީދުގެ މައްޗަށް އުފުލާފައިވާ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ކުށުގެ ދައުވާ ސާބިތުވެ، ހަތަރު އަހަރަށް ޖަލަށްލުމަށް މިއަދު ކުރި ހުކުމްގައި، އިސް ގާޒީ ވިދާޅުވީ، ރައްޔިތުންގެ ފައިސާއިން ހިންގާ ކުންފުނިތަކުގެ އިސްވެރިންގެ ގޮތުގައި ތިބޭ ފަރާތްތަކުން ހިންގާ ބޮޑެތި ކޮރަޕްޝަންގެ އަމަލުތަކުގެ ސަބަބުން އެ ކުންފުނި ތެރޭގައިވެސް ކޮރަޕްޝަނަށް ދޮރު ހުޅުވި، އެ ފަސާދަ ފުޅާވެގެން ދިއުމަކީ ކަންބޮޑުވާން ޖެހޭ ކަމެއް ކަމަށެވެ.
އިސް ގާޒީ ވިދާޅުވީ، އެފެދަ ކޮރަޕްޝަންގެ އަމަލުތަކުގެ ނަތީޖާއަކަށްވަނީ ކުންފުނީގެ ހިންގުމުގެ ހަރަދު ބޮޑުވެ، އެ ފޫބެއްދުމަށްޓަކައި ރައްޔިތުންނަށް ފޯރުކޮށްދޭ ހިދުމަތުގެ އަގު ބޮޑުކުރުން ކަމަށެވެ. އަދި އާހިރުގައި އެކަމުގެ ތަކުލީފު އުފުލަން ޖެހެނީ އާންމު ރައްޔިތު މީހާއަށް ކަމަށްވެސް ވިދާޅުވިއެވެ.
”އެހެންކަމުން، މިފަދަ ރައްޔިތުންނަށް ހިދުމަތް ފޯރުކޮށްދިނުމަށް ހަދާފައިވާ ކުންފުނިތަކުގެ ވެރިންގެ މައްޗަށް ސާބިތުވާ މިފަދަ ކޮރަޕްޝަންގެ މައްސަލަތަކުގައި އެ މީހުންގެ މައްޗަށް އެ ކުށާ ގުޅިގެން ގާނޫނުގައި ކަނޑައަޅާފައިވާ އެންމެ ހަރުކަށި އަދަބު ދޭން ޖެހޭކަމަށް ގަބޫލުކުރަމެވެ..،“ އިސް ގާޒީ ވިދާޅުވިއެވެ.
އިސް ގާޒީ ވިދާޅުވީ، ދައުލަތުގެ ކުންފުނިތަކުގައި ކޮރަޕްޝަން ހިންގުން މިހާރު އާންމުވެފައިވާ ކަމަށާއި ދައުލަތުގެ ފައިސާއަށް ހިޔާނާތްތެރިވެ، ކޮރަޕްޝަންގެ އަމަލުތައް ހިންގުމަކީ އާދައިގެ މަތިން އާންމު އުސޫލުން ހިނގާކަމެއްގެ ގޮތުގައި ބެލެވޭ މިންވަރަކަށް އެކަން އާންމުވެފައިވާ ކަމަށެވެ.
ކޮރަޕްޝަންގެ އަމަލު ހިންގާ ފަރާތްތަކަށް ހައްގު އަދަބު ލިބެނީ މަދު ފަހަރެއްގައި ކަމުގެ ކަންބޮޑުވުންވެސް އިސް ގާޒީ ފާޅުކުރެއްވިއެވެ. އަދި އެއީ އެކަން ކުރާ ފަރާތްތަކަށް ލިބޭނެ ހިތްވަރެއްކަމުގައިވެސް ވިދާޅުވިއެވެ.
އެ މައްސަލައަކީ، 2018 އަހަރު ފެނަކަ ކޯޕަރޭޝަން ލިމިޓެޑާއި ބްލޭޒަން އިންކް ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމުގެ ދަށުން ބްލޭޒަން އިންކް ޕްރައިވެޓް ލިމިޓެޑްގެ ފަރާތުން މަސައްކަތް ފުރިހަމަ ކޮށްފައިނުވަނީސް އަދި މަސައްކަތް ނިންމިކަން ކަށަވަރުކުރުމެއް ނެތި، އެ މަސައްކަތަށްވާ ފައިސާ ބްލޭޒަން އިންކް ޕްރައިވެޓް ލިމިޓެޑަށް 2019 ވަނަ އަހަރު ދޫކޮށް، އެ ކުންފުންޏަށް ނާޖާއިޒު މަންފާ ހޯދައިދީފައިވާ މައްސަލައިގައި ސައީދުގެ މައްޗަށް 26 ޑިސެންބަރު 2024 ދުވަހު ކްރިމިނަލް ކޯޓަށް ހުށަހެޅި މައްސަލައެވެ.
ދައުލަތުން ބުނެފައިވާ ގޮތުގައި އެ އަމަލުގެ ސަބަބުން ފެނަކަ ކޯޕަރޭޝަނަށް 848,000 ރުފިޔާގެ ގެއްލުން ލިބިފައިވާ ކަމަށެވެ.
