އުތުރު ތިލަފަޅުގެ އެއްބަސްވުމުގައި ސޮއިކުރީ 32 މިލިއަން ޑޮލަރުގެ ރިޝްވަތު ނަގައިގެން ކަމަށް ތުހުމަތުކޮށްފި އެވެ.
ވޭތުވެދިޔަ އެމްޑީޕީގެ ސަރުކާރުން އުތުރު ތިލަފަޅު (ޔޫޓީއެފް) އެއްބަސްވުމުގައި ސޮއިކުރީ އިންޑިއާ ސަރުކާރުން ބޭނުންވި ގޮތަށް އެއްބަސްވުމަށް ބަދަލުތަކެއް ގެނައުމަށްފަހު، ރިޝްވަތުގެ ގޮތުގައި 32 މިލިއަން އެމެރިކާ ޑޮލަރު ނަގައިގެން ކަމަށް އެމްޑީޕީގެ ކުރީގެ މަޖިލިސް މެންބަރަކު ވިދާޅުވެ ބޮޑު ތުހުމަތެއް ކުރައްވައިފިއެވެ.
އުތުރު ތިލަފަޅުގައި ކޯސްޓްގާޑުގެ ބަނދަރަކާއި ޑޮކްޔާޑެއް ތަރައްޤީ ކުރުމަށް އިންޑިއާއާއެކު ވެވުނު މި އެއްބަސްވުމަކީ ރާއްޖޭގެ ސިޔާސީ މަސްރަޙުގައި ބޮޑެތި ބަހުސްތަކަކާއި ކަންބޮޑުވުންތަކެއް އުފެދުނު މައްސަލައެކެވެ.
މިކަމާ ގުޅޭގޮތުން ވާހަކަދައްކަވަމުން، އެމްޑީޕީ ސަރުކާރުގެ ދުވަސްވަރު ރައްޔިތުންގެ މަޖިލީހުގައި ތަމްސީލުކުރެއްވި މެންބަރު ހާމަކުރެއްވި ގޮތުގައި، މި އެއްބަސްވުމުގެ އަސްލު ޑްރާފްޓަށް އިންޑިއާއިން ބޭނުންވި ގޮތަށް ބޮޑެތި އިސްލާޙުތަކެއް ވަނީ ގެނެސްފައެވެ. އަދި އެ ބަދަލުތަކާއެކު އެއްބަސްވުމުގައި ސޮއިކުރުމުގެ ބަދަލެއްގެ ގޮތުން 32 މިލިއަން ޑޮލަރު (ގާތްގަނޑަކަށް 493 މިލިއަން ދިވެހި ރުފިޔާ) ގެ ބޮޑު އަދަދެއް ރިޝްވަތުގެ ގޮތުގައި ނަގާފައިވާ ކަމަށްވެސް އޭނާ ތުހުމަތު ކުރެއްވިއެވެ.
ޔޫޓީއެފް އެއްބަސްވުމުގައި ދިވެހިރާއްޖޭގެ މިނިވަންކަމާއި ސިޔާދަތަށް އުނިކަން އަންނަ ފަދަ މާއްދާތަކެއް ހިމެނޭ ކަމަށް ބުނެ، އޭރުގެ އިދިކޮޅު ފަރާތްތަކުންނާއި އާންމުންގެ ގިނަ ބަޔަކު ވަނީ އެ އެއްބަސްވުން ހާމަކުރުމަށް ތަކުރާރުކޮށް ގޮވާލާފައެވެ. ނަމަވެސް، ވޭތުވެދިޔަ އެމްޑީޕީ ސަރުކާރުން އެ އެއްބަސްވުން ސިއްރުކޮށްފައި ވަނިކޮށް، ސަރުކާރުގެ އިސް ފަރާތްތަކަކަށް މިފަދަ ބޮޑު މާލީ މަންފާއެއް ލިބުނު ކަމަށް ކުރެވުނު މި ތުހުމަތާއެކު، މައްސަލަ މިހާރު ވަނީ އަނެއްކާވެސް ހޫނުވެފައެވެ.
މި ތުހުމަތުތަކާ ގުޅިގެން އެމްޑީޕީގެ އިސް ލީޑަޝިޕުން އަދި މިހާތަނަށް ރަސްމީކޮށް އެއްވެސް އެއްޗެއް ވިދާޅުވެފައެއް ނުވެއެވެ. އެމްޑީޕީގެ ޗެއާ ޕާސަން މުޙުއްމަދު ނަޝީދު އަށް ގުޅާ ލުމުން އެމަނިކުފާނު ފޯނަށް ޖަވާބު ނުދެއްވުމުން އިތުރަށް ސާފްވާ ގޮތްވަނީ ނުވެފައި.
